സംസ്ഥാനത്തെ സ്‌കൂളുകളിലെ തസ്തിക നിര്‍ണയ നടപടികള്‍ അന്തിമഘട്ടത്തിലെത്തിലേക്ക്. അതിനായി അധ്യാപക ബാങ്ക് പുതുക്കാന്‍ പൊതുവിദ്യാഭ്യാസ ഡയറക്ടറുടെ ഉത്തരവ്. തസ്തിക നഷ്ടമായി പുറത്താകുന്ന സംരക്ഷണത്തിന് അര്‍ഹതയുള്ള അധ്യാപകരെ ഉള്‍പ്പെടുത്തിയാണ് അധ്യാപക ബാങ്ക് നവീകരിക്കേണ്ടത്.

ഈ മാസം 11ന് ജില്ലയിലെ അധ്യാപക ബാങ്ക് നവീകരിക്കാനും ശേഷം തസ്തിക നഷ്ടപ്പെടുന്ന സംരക്ഷിത അധ്യാപകരുടെ പുനര്‍വിന്യാസ പ്രവര്‍ത്തനങ്ങള്‍ നടത്താനും നിര്‍ദേശമുണ്ട്. 14നുതന്നെ പുനര്‍വിന്യാസ ഉത്തരവിറക്കാനും സംരക്ഷിത അധ്യാപകര്‍ക്ക് 15നു പുതിയ സ്‌കൂളില്‍ ജോലിയില്‍ പ്രവേശിക്കാനും ശമ്പളം മുടങ്ങാതിരിക്കാനും നടപടി വേണമെന്നും ഉത്തരവില്‍ പറയുന്നു. മുഴുവന്‍ വിദ്യാഭ്യാസ ഉപഡയറക്ടര്‍മാര്‍ക്കും ജില്ല വിദ്യാഭ്യാസ ഓഫിസര്‍മാര്‍ക്കും ഉപജില്ല വിദ്യാഭ്യാസ ഓഫിസര്‍മാര്‍ക്കുമാണ് ഉത്തരവ് നല്‍കിയിരിക്കുന്നത്.

തസ്തിക നഷ്ടപ്പെട്ട് പുനര്‍വിന്യാസം ലഭിക്കാതിരിക്കുന്ന കാലയളവില്‍ സംരക്ഷിത അധ്യാപകര്‍ക്ക് ശമ്പളം മുടങ്ങും. ഈ സാഹചര്യം ഒഴിവാക്കാനാണ് 15 ദിവസത്തെ കര്‍മപരിപാടി സഹിതം ഡി.പി.ഐയുടെ ഉത്തരവ്. വിദ്യാഭ്യാസ ജില്ലയിലെ/ ഉപജില്ലയിലെ നിലവിലെ അധ്യാപക ബാങ്ക് ഈമാസം മൂന്നു മുതല്‍ ഐ.ടി@ സ്‌കൂള്‍ വെബ്‌സൈറ്റില്‍ ലഭ്യമാക്കും. ഇതില്‍നിന്ന് മാതൃവിദ്യാലയത്തിലേക്ക് മടങ്ങിപ്പോയവരെയും വിരമിച്ചവരെയും ഒഴിവാക്കിയും ഈ വര്‍ഷത്തെ തസ്തിക നിര്‍ണയത്തില്‍ തസ്തിക നഷ്ടമാകുന്ന സംരക്ഷിത അധ്യാപകരെ ഉള്‍പ്പെടുത്തിയുമാണ് പരിഷ്‌കരിക്കുക.

2011 മാര്‍ച്ച് 31ന് നിയമനാംഗീകാരത്തോടെ റെഗുലര്‍ സര്‍വിസില്‍ തുടര്‍ന്ന അധ്യാപക, അനധ്യാപകര്‍ എന്നിവര്‍ക്ക് സംരക്ഷണത്തിന് അര്‍ഹതയുണ്ടായിരുക്കും. അധ്യാപക പാക്കേജ് വഴി 2011 ജൂണ്‍ ഒന്നു മുതല്‍ നിയമനാംഗീകാരം ലഭിച്ച അധ്യാപകരും അനധ്യാപകരും സംരക്ഷണം ലഭിക്കുന്നവരില്‍ ഉള്‍പ്പെടും.

1999, 2000 വര്‍ഷങ്ങളിലെ ഉത്തരവുകള്‍ വഴി സംരക്ഷണം ലഭിച്ച ജീവനക്കാരും അധ്യാപക പാക്കേജ് വഴി ക്ലസ്റ്റര്‍ കോഓഡിനേറ്റര്‍മാരായി നിയമിക്കപ്പെട്ട റിട്രഞ്ച്ഡ് അധ്യാപകര്‍, പാക്കേജിന്റെ ഭാഗമായി തസ്തികയില്ലാതെ മറ്റ് സ്‌കൂളുകളിലേക്ക് പുനര്‍വിന്യസിക്കപ്പെട്ട് ശമ്പളം വാങ്ങുന്ന സ്‌പെഷലിസ്റ്റ് അധ്യാപകര്‍, 2011- 12 മുതല്‍ '14- 15 വരെ രാജി, മരണം, റിട്ടയര്‍മെന്റ്, സ്ഥലംമാറ്റം, പ്രമോഷന്‍ എന്നീ റെഗുലര്‍ തസ്തികകളില്‍ നിയമിക്കപ്പെടുകയും അംഗീകാരം ലഭിക്കുകയും ചെയ്തവര്‍ എന്നിവര്‍ക്കും സംരക്ഷണ ആനുകൂല്യം ലഭിക്കും. എന്നാല്‍, 2011- 12 മുതല്‍ അധിക തസ്തികകളിലെ ഒഴിവുകളില്‍ നിയമനാംഗീകാരം ലഭിച്ചവര്‍ക്ക് സംരക്ഷണാനുകൂല്യം ലഭിക്കില്ല.