ബ്രഹ്മാണ്ഡ വിജയം നല്‍കിയ പുലിമുരുകനു ശേഷം ടോമിച്ചന്‍ മുളകുപാടം നിര്‍മിക്കുന്ന ചിത്രമാണ് രാമലീല. പുലിമുരുകനായി കോടികള്‍ ഇറക്കിയപ്പോഴും ഇല്ലാതിരുന്ന അങ്കലാപ്പ് ഇപ്പോഴുണ്ടെന്ന് അദ്ദേഹത്തിന്റെ വാക്കുകളിലൂടെ വായിചെടുക്കാനാവും.

കൊച്ചിയില്‍ നടി ആക്രമിക്കപ്പെട്ട സംഭവത്തില്‍ ദിലീപിനെതിരെ അനുദിനം ആരോപണങ്ങള്‍ ശക്തിപ്പെടുന്നതിനിടെയാണ് രാമലീല റിലീസിനായി ഒരുങ്ങുന്നത്. 14 കോടി രൂപയാണ് രാമലീലയ്ക്കായി മുളകുപാടം മുടക്കുന്നത്. കഴിഞ്ഞ വെള്ളിയാഴ്ച ചിത്രം റിലീസ് ചെയ്യാന്‍ നിശ്ചയിച്ചിരുന്നെങ്കിലും സാങ്കേതിക പ്രശ്‌നങ്ങള്‍ ചൂണ്ടിക്കാട്ടി മാറ്റി വയ്ക്കുകയായിരുന്നു.

ഈ വിവാദങ്ങള്‍ക്കിടയില്‍ റിലീസ് ചെയ്താല്‍ പ്രേക്ഷകര്‍ കൈവിടുമോയെന്ന ഭയം അദ്ദേഹത്തിനുണ്ട്. എന്നാല്‍ രണ്ടും കല്‍പ്പിച്ച് ഇറങ്ങാന്‍ തന്നെയാണ് ടോമിച്ചന്‍ ഇപ്പോഴത്തെ തീരുമാനിച്ചിരിക്കുന്നത്. ഈ മാസം ഇരുപത്തി ഒന്നിന് റിലീസ് ചെയ്യുന്ന ചിത്രം മികച്ചതാണെങ്കില്‍ പ്രേക്ഷകര്‍ സ്വീകരിക്കുമെന്ന് ടോമിച്ചന്‍ മാധ്യമങ്ങളോട് പറഞ്ഞു. 'എന്റെ ജീവിതത്തില്‍ പരീക്ഷണങ്ങള്‍ ഒരുപാട് ഉണ്ടായിട്ടുണ്ട്. പുലിമുരുകനായി കോടികള്‍ എറിഞ്ഞതും ബ്രഹ്മാണ്ടവിജയം പ്രതീക്ഷിച്ചല്ല. ചിത്രത്തിന്റെ കഥ മികച്ചതാണെങ്കില്‍ ദിലീപിനെതിരായ വിവാദങ്ങളോ ആരോപണങ്ങളോ പ്രേക്ഷകര്‍ ചിന്തിക്കില്ല. അതല്ലാ മറിച്ചാണേല്‍ അതും നേരിടാന്‍ തയ്യാറാണ്'ടോമിച്ചന്‍ പറയുന്നു.

നവാഗതനായ അരുണ്‍ ഗോപിയാണ് രാമലീല സംവിധാനം ചെയ്യുന്നത്. സച്ചിയുടേതാണ് തിരക്കഥ. കേരളത്തിലെ സമകാലിക രാഷ്ട്രീയരംഗത്തെ ചുറ്റിപ്പറ്റിയാണ് കഥ . ദിലീപിന്റെ കഥാപാത്രമായ രാമനുണ്ണി ഒരു അഭിഭാഷകനാണ്. തന്റെ വക്കീല്‍ ജീവിതം ഉപേക്ഷിച്ച് നിര്‍ബന്ധിതമായ ചില സാഹചര്യങ്ങളില്‍ രാഷ്ട്രീയത്തില്‍ പ്രവേശിക്കുന്നതാണ് കഥ.

രാമലീലയിലൂടെ രാധിക ശരത് കുമാര്‍ നീണ്ട ഇടവേളയ്ക്കു ശേഷം മലയാള സിനിമയിലേക്ക് തിരിച്ചുവരികയാണ്. പ്രയാഗ മാര്‍ട്ടിന്‍, രണ്‍ജി പണിക്കര്‍, സലിം കുമാര്‍, സിദ്ദിഖ്, വിജയരാഘവന്‍, കലാഭവന്‍ ഷാജോണ്‍, സുരേഷ് കൃഷ്ണ എന്നിവരാണ് മറ്റു താരങ്ങള്‍.