സിനിമാനടി ആക്രമിക്കപ്പെട്ട സംഭവത്തിൽ എ.ഡി.ജി.പി. ബി സന്ധ്യയ്‌ക്കെതിരെ പി.സി ജോർജ് മുഖ്യമന്ത്രിക്ക് കത്തെഴുതിയിരുന്നു. സന്ധ്യ ഐപിഎസിനെതിരായ പരാതി അത്യന്തം ഗൗരവമുള്ളതെന്നും അന്വേഷണത്തിൽ തെളിവുകൾ നൽകാൻ താൻ തയ്യാറുമാണെന്നും കത്തിൽ ചൂണ്ടിക്കായിരുന്നു. ആക്രമണത്തിനിരയായ നടിയെക്കുറിച്ചു നടത്തിയ പരാമർശങ്ങളിൽ ഉറച്ചുനിൽക്കുന്നുവെന്ന് പി.സി. ജോർജ് എംഎൽഎ. കേസിൽ ദിലീപിനെ പ്രതിയാക്കി അറസ്റ്റ് ചെയ്തതു ഗൂഢാലോചനയാനിന്നും അദ്ദേഹം പറഞ്ഞു.

സിപിഎം നേതാവും മകനും പ്രമുഖ നടിയും എഡിജിപി സന്ധ്യയും ചേർന്നുള്ള ഗൂഢാലോചനയായിരുന്നു അതെന്നും കോട്ടയത്ത് മാധ്യമ പ്രവര്‍ത്തകരോടു സംസാരിക്കവെ ജോർജ് പറഞ്ഞു. അറസ്റ്റിലായ നടൻ ദിലീപിനു ജാമ്യത്തിന് അർഹതയുണ്ട്. എന്തുകൊണ്ട് ഇത്രയും നാളായി അതു നൽകുന്നില്ല എന്നു കോടതി പറയണം.

കേസ് അന്വേഷിക്കുന്നതു വട്ടിളകിയ പൊലീസുകാരാണ്. അവർ നടൻ നാദിർഷായെ ഭീഷണിപ്പെടുത്തി മൊഴിയെടുക്കാൻ ശ്രമിക്കുകയാണ്. പൾസര്‍ സുനി ഭീഷണിപ്പെടുത്തുന്നുവെന്നു നാദിർഷാ നേരിട്ടു വന്നു പറഞ്ഞിരുന്നു. ആക്രമിക്കപ്പെട്ട നടിയെ അപമാനിക്കുന്ന വിധത്തിൽ സംസാരിച്ചു എന്ന പേരിൽ തനിക്കെതിരെ പൊലീസ് കേസെടുത്തതായി അറിയില്ലെന്നും പി.സി.ജോർജ് പറഞ്ഞു.