പ്രധാനാധ്യാപിക മുഖ്യമന്ത്രിയെകണ്ട് ഖേദം പ്രകടിപ്പിച്ചു
കോട്ടണ്‍ഹില്‍സ്‌ സ്‌കൂളില്‍ നിന്നും സ്ഥലം മാറ്റ നടപടിക്ക്‌ വിധേയയായ അധ്യാപിക ഊര്‍മ്മിളാ ദേവി മുഖ്യമന്ത്രി ഉമ്മന്‍ചാണ്ടിയെ നേരില്‍ കണ്ട്‌ ഖേദം പ്രകടിപ്പിച്ചു. വി. ശിവന്‍കുട്ടി എംഎല്‍എയോടൊപ്പം എത്തിയാണ്‌ അധ്യാപിക മുഖ്യമന്ത്രിയോട്‌ ഖേദം പ്രകടിപ്പിച്ചത്‌. വിദ്യാഭ്യാസ മന്ത്രി അബ്‌ദുറബ്ബ്‌ സ്‌കൂളില്‍ എത്തിയപ്പോള്‍ മനപൂര്‍വ്വമല്ല ഗേറ്റ്‌ അടച്ചിട്ടിരുന്നതെന്നും ഉച്ച ഭക്ഷണത്തിന്റെ ഇടവേളയില്‍ കുട്ടികള്‍ പുറത്ത് പോകാതിരിക്കാനാണ്‌ ഗേറ്റ്‌ അടച്ചിട്ടതെന്നും അധ്യാപിക മുഖ്യമന്ത്രിയുടെ നിയമസഭയിലെ ഓഫീസിലെത്തി പറഞ്ഞു.
തന്റെ വാക്കുകള്‍ മന്ത്രിയെ ഏതെങ്കിലും തരത്തില്‍ വേദനപ്പിച്ചുവെങ്കില്‍ ഖേദം പ്രകടിപ്പിക്കുന്നതായും അവര്‍ മുഖ്യമന്ത്രിയെ അറിയിച്ചു. മൂന്ന് പേജുള്ള എഴുതി തയ്യാറാക്കിയ കുറിപ്പ്‌ അധ്യാപിക മുഖ്യമന്ത്രിക്ക്‌ നല്‍കി. ഇതിലാണ്‌ തന്റെ ഭാഗം അവര്‍ വ്യക്തമാക്കുന്നത്‌. തന്റെ നിരപരാധിത്വം വിദ്യാര്‍ഥികളുടെയും പൊതുസമൂഹത്തിന്റെയും മുന്നില്‍ തെളിയിക്കണമെങ്കില്‍ തന്നെ അതെ സ്‌കൂളില്‍ തന്നെ ജോലി ചെയ്യാന്‍ അനുവദിക്കണമെന്നും അധ്യാപിക ആവശ്യപ്പെട്ടു. സ്ഥലം മാറ്റ നടപടി പുനപരിശോധിക്കണമെന്ന്‌ അധ്യാപിക നേരിട്ട്‌ അപേക്ഷ നല്‍കിയാല്‍ അത്‌ പരിഗണിക്കുമെന്ന്‌ മുഖ്യമന്ത്രി നിയമസഭയില്‍ പറഞ്ഞിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
