വേങ്ങര ഉപതെരഞ്ഞടുപ്പില്‍ പ്രതിപക്ഷ നേതാവ് രമേശ് ചെന്നിത്തലയെ സജീവമായി പങ്കെടുപ്പിക്കേണ്ടതില്ലെന്ന് മുസ്ലീം ലീഗ് രഹസ്യ തീരുമാനം. രമേശിനെ ഇറക്കിയാല്‍ കളം മാറാന്‍ സാ ധ്യതയുണ്ടെന്നാണ് ലീഗിന്റെ വിലയിരുത്തല്‍. രമേശിന് പകരം ഉമ്മന്‍ ചാണ്ടിയെ പരമാവധി യോഗങ്ങളില്‍ പങ്കെടുപ്പിക്കാനും തീരുമാനമായി. കെ എം മാണിയെ യോഗങ്ങളില്‍ എത്തിക്കാനും ലീഗ് തീരുമാനിച്ചു. രമേശിന് മതേതര മുഖമില്ലെന്ന അണികളുടെ നിലപാടിനെ തുടര്‍ന്നാണ് മനസില്ലാ മനസോടെ ലീഗ് ഇത്തരമൊരു തീരുമാനത്തിലെത്തിയത്.

നേരത്തെയും ചെന്നിത്തലയുമായി നല്ല ബന്ധത്തിലായിരുന്നില്ല കുഞ്ഞാലിക്കുട്ടി. ഉമ്മന്‍ ചാണ്ടിയെ ലീഗ് അമിതമായി പിന്തുണക്കുന്നതില്‍ അസഹ്യനായിരുന്നു ചെന്നിത്തല. മുഖ്യമന്ത്രിയാകാന്‍ രമേശ് നടത്തിയ നീക്കങ്ങള്‍ക്ക് വിലങ്ങുതടിയായത് കുഞ്ഞാലിക്കുട്ടിയാണ്. പിന്നീട് രമേശ് മന്ത്രിയായെങ്കിലും കുഞ്ഞാലിക്കുട്ടി ഉമ്മന്‍ ചാണ്ടിയോട് കാണിക്കുന്ന താല്പര്യം രമേശിനോട് കാണിച്ചില്ല. രമേശ് തിരിച്ചും അങ്ങനെ തന്നെയായിരുന്നു. ലീഗിന്റെ അഞ്ചാം മന്ത്രി പ്രശ്‌നവും മറ്റും ഉയര്‍ത്തി കൊണ്ടുവന്നത് രമേശാണ്.
ഉമ്മന്‍ചാണ്ടി പ്രതിപക്ഷ നേതാവാകണം എന്ന കാര്യത്തില്‍ ലീഗിന് നിര്‍ബന്ധമുണ്ടായിരുന്നു. എന്നാല്‍ ഉമ്മന്‍ ചാണ്ടി അതിന് തയ്യാറായില്ല. ഇക്കാര്യത്തില്‍ ലീഗ് ഹൈക്കമാന്റിനെ ഇടപെടുത്തിയിട്ടും ഫലമുണ്ടായില്ല. കെ.എം മാണി മുന്നണി വിട്ടതിനു കാരണം കോണ്‍ഗ്രസിലെ ചില നേതാക്കളാണെന്ന് ലീഗ് വിശ്വസിക്കുന്നു. ഇക്കാര്യത്തിലുള്ള ലീഗിന്റെ വികാരം രമേശിനുമറിയാം.

മുഖ്യമന്ത്രിയായി കാലയളവില്‍ ലീഗിനെ കൈമറന്ന് സഹായിച്ചത് ഉമ്മന്‍ ചാണ്ടിയാണെന്ന് ലീഗ് നേതൃത്വം വിശ്വസിക്കുന്നു. ഉമ്മന്‍ ചാണ്ടിക്കുള്ള മതേതര മുഖം മറ്റാര്‍ക്കുമില്ലെന്നും ലീഗ് വിശ്വസിക്കുന്നു. ഉമ്മന്‍ ചാണ്ടി വേങ്ങരയിലെത്തിയാല്‍ അത് വോട്ടായി മാറുമെന്നു തന്നെയാണ് ലീഗിന്റെ വിശ്വാസം. അതിനാലാണ് കൂടുതല്‍ യോഗങ്ങളിലും ഉമ്മന്‍ചാണ്ടിയെ എത്തിത്താന്‍ ലീഗ് ശ്രമിക്കുന്നത്. രമേശ് ചെന്നിത്തലയും സര്‍ക്കാരും തമ്മിലുള്ള അടുത്ത ബന്ധവും ലീഗിനെ സംശയ നിഴലിലാക്കിയിട്ടുണ്ട്. ചുരുക്കത്തില്‍ ചെന്നിത്തലയെ വിശ്വസിക്കാന്‍ ലീഗ് ഇപ്പോഴും തയ്യാറല്ല.