കേവലം മണിക്കൂറുകള്‍ കൊണ്ട് നടിയെ ആക്രമിക്കാന്‍ ഗൂഢാലോചന നടത്തിയ കേസില്‍ കുറ്റപത്രം സമര്‍പ്പിക്കാന്‍ 90 ദിവസം കഴിയുമ്പോഴും പോലീസിനാകുന്നില്ല. അങ്ങനെ ദിലീപിന്റെ അറസ്റ്റോടെ കൈയ്യടി നേടിയ പോലീസ് വിമര്‍ശിക്കപ്പെടുകയാണ്. അന്വേഷണ സംഘത്തിന്റെ താത്പര്യ കുറവാണ് അവസാന വട്ടം ജാമ്യം കിട്ടാന്‍ ദിലീപിനെ സഹായിച്ചതെന്നാണ് പൊതുവേയുള്ള ആരോപണം. 

ഇതോടെ ഈ ആരോപണങ്ങള്‍ക്കെതിരെ ഡിജിപി തന്നെ രംഗത്തെത്തി. ദിലീപിന് ജാമ്യം ലഭിച്ചത് പ്രോസിക്യൂഷന്റെ വീഴ്ച കൊണ്ടല്ലെന്ന് ഡിജിപി ലോക്‌നാഥ് ബെഹ്‌റ പറഞ്ഞു. കേസില്‍ ഉടന്‍ കുറ്റപത്രം സമര്‍പ്പിക്കേണ്ട ആവശ്യമില്ല. കുറ്റപത്രം സമര്‍പ്പിക്കാന്‍ സമ്മര്‍ദ്ദമില്ലെന്നും ഡിജിപി പറഞ്ഞു.

അതേസമയം നടി ആക്രമിക്കപ്പെട്ട കേസില്‍ ഇന്നലെ ജാമ്യം ലഭിച്ച നടന്‍ ദിലീപിന്റെ സുഹൃത്തും സംവിധായകനുമായ നാദിര്‍ഷയുടെ ജാമ്യാപേക്ഷ ഇന്ന് ഹൈക്കോടതി പരിഗണിക്കും. നിരപരാധിയായ തന്നെ കള്ളക്കെസില്‍ കുടുക്കാനൊരുങ്ങുന്നു എന്നാണ് നാദിര്‍ഷ ആരോപിച്ചിരിക്കുന്നത്. താരത്തെ വീണ്ടും ചോദ്യം ചെയ്യാന്‍ അന്വേഷണ സംഘം ഒരുങ്ങുന്നതിനിടയിലാണ് താരത്തിന്റെ ജാമ്യാപേക്ഷ പരിഗണിക്കുന്നത്. കഴിഞ്ഞ തവണ ചോദ്യം ചെയ്യാന്‍ വിളിച്ചെങ്കിലും ചെയ്തിരുന്നില്ല.

കേസില്‍ ഗൂഡാലോചനക്കുറ്റത്തില്‍ പ്രതി ചേര്‍ത്തിരിക്കുന്ന നടന്‍ ദിലീപിന് 85 ദിവസത്തിന് ശേഷം ഇന്നലെ ജാമ്യം അനുവദിച്ചിരുന്നു. പാസ്‌പോര്‍ട്ട് കെട്ടിവെക്കുക, ഇരയെക്കുറിച്ച് പരാമര്‍ശിക്കരുത്, ഒരു ലക്ഷം രൂപ ബോണ്ടും രണ്ടു ആള്‍ജാമ്യവും നല്‍കുക, സാക്ഷികളെ സ്വാധീനിക്കാന്‍ ശ്രമിക്കരുത് തുടങ്ങിയ ഉപാധികളോടെയാണ് ജാമ്യം അനുവദിച്ചത്. ആലുവ സബ്ജയിലില്‍ കിടക്കുകയായിരുന്ന താരത്തിനെതിരേ സ്വാഭാവികജാമ്യത്തിന് അവസരം നല്‍കാതെ ശനിയാഴ്ച കുറ്റപത്രം സമര്‍പ്പിക്കാനിരിക്കെയാണ് ദിലീപിന് ഹൈക്കോടതി ജാമ്യം നല്‍കിയത്.

താരത്തിന് ജാമ്യം കിട്ടിയതോടെ ഇനി കുറ്റപത്രം തിടുക്കത്തില്‍ സമര്‍പ്പിക്കേണ്ട എന്ന നിലപാടിലാണ് അന്വേഷണസംഘം. കേസില്‍ അന്വേഷണം പൂര്‍ത്തിയാകുന്ന മുറയ്ക്ക് നല്‍കിയാല്‍ മതിയെന്നാണ് ഇപ്പോഴത്തെ നിലപാട്. കേസില്‍ നാലു പേരെ കൂടി പോലീസ് ചോദ്യം ചെയ്യും. നാദിര്‍ഷയെ വീണ്ടും ചോദ്യം ചെയ്യേണ്ട സാഹചര്യം ഉണ്ടെന്നും ഇദ്ദേഹം ആദ്യം നല്‍കിയ മൊഴികളില്‍ വൈരുദ്ധ്യമുണ്ടെന്നുമാണ് അന്വേഷണ സംഘത്തിന്റെ നിലപാട്. എന്നിരുന്നാലും കുറ്റപത്രം എത്രയും വേഗം സമര്‍പ്പിക്കുമെന്ന് തന്നെയാണ് അന്വേഷണസംഘത്തിന്റെ തലവന്‍ പറയുന്നത്.

ദിലീപിന്റെ ജാമ്യാപേക്ഷയില്‍ പ്രോസിക്യൂഷന്റെ വാദത്തിലും അന്വേഷണസംഘത്തിന് അതൃപ്തിയുണ്ട്. ദിലീപിനെതിരേയുള്ള നിര്‍ണ്ണായക വിവരങ്ങള്‍ ഉന്നയിക്കാന്‍ പ്രോസിക്യൂഷന് കഴിഞ്ഞില്ലെന്നാണ് പോലീസിന്റെ ആരോപണം. ഇക്കാര്യത്തില്‍ അന്വേഷണസംഘം മേലുദ്യോഗസ്ഥരെ വിവരം അറിയിക്കുകയും ചെയ്തിട്ടുണ്ട്. ജാമ്യം കിട്ടിയതോടെ ഇന്നലെ വൈകുന്നേരം ദിലീപ് ആലുവ സബ്ജയിലില്‍ നിന്നും സ്വതന്ത്രനായി. ജയില്‍ മോചിതനായ അദ്ദേഹത്തിന് ആരാധകര്‍ ഉജ്വല സ്വീകരണമാണ് നല്‍കിയത്.