ഇറാഖ്‌ ; നമ്മുടെ സഹോദരിമാര്‍ രക്ഷപ്പെട്ടതെങ്ങനെ? കേന്ദ്ര സര്‍ക്കാരിനൊപ്പം ജോസ്‌ കെ. മാണിക്കും അഭിമാനിക്കാം
നമ്മുടെ കൂടെപ്പിറപ്പുകളായ ആ മലയാളി നഴ്‌സുമാര്‍ എല്ലാ പ്രതിബന്ധങ്ങളും കടന്ന്‌ ഇര്‍ബലിന്‍ വിമാനത്താവളത്തിലെത്തി. കേന്ദ്ര സര്‍ക്കാര്‍ അയച്ച എയര്‍ ഇന്ത്യയുടെ പ്രത്യേക വിമാനത്തില്‍ നാളെ രാവിലെ ഏഴ്‌ മണിക്ക്‌ അവര്‍ കൊച്ചിയിലെത്തും. മലയാളികളെ സംബന്ധിച്ചടുത്തോളം ആശങ്കകളുടെ ദിവസങ്ങളായിരുന്നു.
ഇറാഖിലെ വിമതരില്‍ നിന്നും ആ മലയാളി നഴ്‌സുമാര്‍ രക്ഷപ്പെട്ട്‌ തിരിച്ചെത്തുമ്പോള്‍ കേന്ദ്ര സര്‍ക്കാരിനോടും മുഖ്യമന്ത്രി ഉമ്മന്‍ ചാണ്ടിയോടും കോട്ടയം എം.പി. ജോസ്‌ കെ മാണിയോടും അവരുടെ കുടുംബങ്ങള്‍ ഒന്നടങ്കം നന്ദി പറയുകയാണ്‌.
വിമതരുടെ ഇടയില്‍ അകപ്പെട്ടുപോയ മലയാളി നഴ്‌സുമാരില്‍ അധികവും കോട്ടയം ജില്ലക്കാരാണ്‌. അതിനാല്‍ തന്നെ നഴ്‌സുമാര്‍ വിമതരുടെ കസ്റ്റഡിയിലാണെന്ന്‌ അറിഞ്ഞ ഉടനെ അവരുടെ കുടുംബം ആദ്യം ബന്ധപ്പെട്ടത്‌ കോട്ടയം എം.പി.യും നാട്ടുകാരനുമായ ജോസ്‌ കെ. മാണിയെയാണ്‌. ഉടന്‍ തന്നെ ജോസ്‌ കെ മാണി ഈ പ്രശ്‌നത്തില്‍ സജീവമായി ഇടപെട്ടു. അടിയന്തിരമായി കേന്ദ്ര വിദേശകാര്യ മന്ത്രാലയവുമായി ബന്ധപ്പെടുകയും ഡല്‍ഹിയിലേക്ക്‌ തിരിക്കുകയും ചെയ്‌തു. കേരള മുഖ്യമന്ത്രിയും സംഘവും ഡല്‍ഹിയിലെത്തുന്നതിന്‌ ദിവസങ്ങള്‍ക്കുമുമ്പ്‌ തന്നെ ജോസ്‌ കെ മാണി ഡല്‍ഹിയിലെത്തി. മുഖ്യമന്ത്രി ഉമ്മന്‍ ചാണ്ടിയോടും പ്രശ്‌നത്തിന്റെ ഗൗവരം ചര്‍ച്ച ചെയ്‌തു.
കേന്ദ്ര വിദേശ കാര്യ മന്ത്രി സുഷമാ സ്വരാജുമായി നേരിട്ടും ഫോണിലും നിരവധി തവണ ജോസ്‌ കെ മാണി ചര്‍ച്ചകള്‍ നടത്തി. യഥാര്‍ത്ഥത്തില്‍ ജോസ്‌ കെ മാണിയുടെ നിരന്തരമായ ശ്രമങ്ങളാണ്‌ ആദ്യഘട്ടത്തില്‍ ഉറങ്ങി കിടന്ന കേന്ദ്ര സര്‍ക്കാരിനെ ഉണര്‍ത്തിയത്‌. നഴ്‌സുമാര്‍ മോചിതരായ ഉടനെ രണ്ട്‌ മക്കള്‍ ഇറാഖിലുള്ള, ഏറ്റുമാനൂരിലുള്ള കെ.സി. എബ്രഹാമിന്റെ വീട്ടില്‍ ജോസ്‌ കെ മാണി എത്തി സന്തോഷം പങ്കിട്ടു. നഴ്‌സുമാരെ മോചിപ്പിക്കാന്‍ ശ്രമം നടത്തിയ മുഖ്യമന്ത്രി ഉമ്മന്‍ചാണ്ടിയെ ഫോണില്‍ വിളിച്ച്‌ ജോസ്‌ കെ മാണി സംസാരിച്ചു.
മന്ത്രിമാരായ കെ.എം.മാണി, രമേശ്‌ ചെന്നിത്തല, മഞ്ഞളാംകുഴി അലി എന്നിവരും ഡല്‍ഹിയില്‍ രക്ഷാപ്രവര്‍ത്തനങ്ങള്‍ക്കുവേണ്ടി ശ്രദ്ധ കേന്ദ്രീകരിച്ചിരുന്നു. കഴിഞ്ഞമാസമാണ്‌ ഇറാഖിലെ നഴ്‌സുമാരെ മൊസൂളില്‍ കൊണ്ടുപോയതായി കേന്ദ്ര വിദേശകാര്യ മന്ത്രാലയം സ്ഥിരീകരിച്ചത്‌. നമ്മള്‍ പ്രതീക്ഷിക്കുന്നതു പോലെ 24 മണിക്കൂര്‍ കൊണ്ടുണ്ടായ മോചന പ്രക്രിയയല്ല ഇത്‌.
അപകടം കൂടാതെ നഴ്‌സുമാര്‍ എത്തുമ്പോള്‍ അഭിമാനിക്കാവുന്നത്‌ കേന്ദ്ര സര്‍ക്കാരിനും ജോസ്‌ കെ മാണിക്കും കേരള സര്‍ക്കാരിനുമാണ്‌.
മുബൈയിലും ഡല്‍ഹിയിലും ദുബായിലുമുള്ള എയര്‍ഇന്ത്യാ വിമാനങ്ങള്‍ ഇര്‍ബിന്‍ വിമാന താവളത്തിലെത്തിക്കുന്നതില്‍ ജോസ്‌ ചരടു വിലച്ചിരുന്നു. നഴ്‌സുമാര്‍ പുറപ്പെട്ട വിവരം തങ്ങളുടെ കോട്ടയത്തുള്ള ബന്ധുക്കളെ വിളിക്കുമ്പോള്‍ ജോസ്‌ കെ മാണി അവരുടെ വീട്ടില്‍ സന്നിഹിതനായിരുന്നു. ആശങ്കയുടെ 24 മണിക്കൂര്‍ അവസാനിക്കുമ്പോള്‍ തനിക്ക്‌ കഴിഞ്ഞ ഒരാഴ്‌ച ആശങ്കയുടേയായിരുന്നെന്ന്‌ ജോസ്‌ കെ മാണി പറഞ്ഞു. 46 മലയാളി നഴ്‌സുമാര്‍ ത്രിക്രിത്തില്‍ കുടുങ്ങിയതു മുതല്‍ താന്‍ വേദന അനുഭവിക്കുകയായിരുന്നുവെന്നും ജോസ്‌ പറഞ്ഞു.
ഇറാഖിലെ ഇന്ത്യന്‍ അംബാസിഡര്‍മാര്‍ക്കും കേന്ദ്രസര്‍ക്കാരിനും ജോസ്‌ കെ മാണി നന്ദി അറിയിച്ചു. സുഷമാസ്വരാജ്‌ മോചനത്തിന്‌ നിര്‍ണായക പങ്ക്‌ വഹിച്ചതായി അദ്ദേഹം പറഞ്ഞു. മുഖ്യമന്ത്രി ഉമ്മന്‍ചാണ്ടിയുടെ നേതൃത്വത്തിലുള്ള ടീമിന്റെ ഡല്‍ഹിയിലെ പ്രവര്‍ത്തനം കാര്യങ്ങളെ തീരത്തടിപ്പിക്കാന്‍ ഏറെ സഹായിച്ചെന്നും ജോസ്‌ കെ മാണി മലയാളിവാര്‍ത്തയോട്‌ പറഞ്ഞു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
