ആറ്റുനോറ്റുണ്ടാക്കിയ 40 പവനും 7000രൂപയും കള്ളന്‍ കൊണ്ടുപോയപ്പോള്‍ വീട്ടുകാര്‍ അറിയാതെ തലയില്‍ കൈവച്ചുപോയി. വീടിന്റെ വാതില്‍ തകര്‍ത്താണ് പവന്‍ സ്വര്‍ണവും പണവും കവര്‍ന്നത്. ചങ്ങനാശേരി വടക്കേക്കരയില്‍ പ്രവാസി കൈനിക്കര അഷ്‌റഫിന്റെയും വാഴപ്പള്ളി പഞ്ചായത്ത് അസി. വില്ലേജ് ഓഫീസര്‍ ഖദീജാ ബീവിയുടെയും വീട്ടിലാണു ശനിയാഴ്ച രാത്രിയില്‍ മോഷണം നടന്നത്. ഖദീജാ ബീവിയും മകളും ഇവരുടെ വീട്ടില്‍ നിന്നും 200 മീറ്റര്‍ അകലെയുള്ള കുടുംബവീട്ടിലായിരുന്നപ്പോഴാണു മോഷണം നടന്നത്. 

മാതാവിനു സുഖമില്ലാത്തതു കാരണം ഒന്നരമാസത്തോളമായി രാത്രിയില്‍ ഖദീജയും മകളും കുടുംബവീട്ടിലാണു താമസിച്ചിരുന്നത്. പതിവുപോലെ വാതിലും ഗ്രില്ലുമെല്ലാം പൂട്ടിയാണ് ഇവര്‍ പോയത്. സമീപത്തു വീടുകളുണ്ടെങ്കിലും ശനിയാഴ്ച രാത്രിയില്‍ മഴ ആയിരുന്നതിനാല്‍ ആരും ശ്രദ്ധിച്ചില്ല. ഗ്രില്ലും വാതിലും തകര്‍ത്ത് അകത്തു കടന്ന മോഷ്ടാവ് മുറിയിലുണ്ടായിരുന്ന താക്കോല്‍ ഉപയോഗിച്ച് അലമാരി തുറന്നാണു മോഷണം നടത്തിയത്. 

ചെറിയ ടര്‍ക്കിയില്‍ പൊതിഞ്ഞ സ്വര്‍ണാഭരണങ്ങള്‍ തുണിയുടെ അടിയിലായിട്ടാണു സൂക്ഷിച്ചിരുന്നത്. തുണി മുഴുവന്‍ പുറത്തേക്കു വലിച്ചിട്ട നിലയിലാണ്. ഇന്നലെ രാവിലെ 7.30 യോടെ ഖദീജാ ബീവിയും മകളും വീട്ടിലെത്തിയപ്പോഴാണു മോഷണ വിവരം അറിഞ്ഞത്. ഉടന്‍ ചങ്ങനാശേരി പോലീസില്‍ വിവരം അറിയിച്ചു

ചങ്ങനാശേരി ഡിവൈ.എസ്.പി ആര്‍.ശ്രീകുമാര്‍, സി.ഐ. കെ.പി വിനോദ്, എസ്.ഐ എം.കെ. ഷമീര്‍, ചങ്ങനാശേരി ആന്റി ഗുണ്ടാ സ്‌ക്വാഡ് എന്നിവരുടെ നേതൃത്വത്തില്‍ പോലീസ് സംഘം സ്ഥലത്തെത്തി. വിരലടയാള വിദഗ്ധരും ഡോഗ് സ്വാകഡും സ്ഥലത്തെത്തി പരിശോധന നടത്തി. സംഭവ സ്ഥലത്തു നിന്നു മോഷ്ടാവിന്റെ വിരലടയാളം ലഭിച്ചെന്നും ഇതു പരിശോധിച്ചു വരുകയാണെന്നും പോലീസ് വ്യക്തമാക്കി. സമീപത്തുള്ള സി.സിടി.വി ക്യാമറകളില്‍ പരിശോധന നടത്തി വരികയാണെന്നും പോലീസ് പറഞ്ഞു.