സി.പി.എം- സി.പി.ഐ തര്‍ക്കങ്ങള്‍ അയയുന്നതിനിടെ സി.പി.എം ജനപ്രതിനിധികള്‍ റവന്യൂമന്ത്രി ഇ. ചന്ദ്രശേഖരന്റെ പരിപാടികള്‍ ബഹിഷ്‌ക്കരിക്കുന്നു. തിങ്കളാഴ്ച കാസര്‍കോഡ് റവന്യൂമന്ത്രി പങ്കെടുത്ത പരിപാടികളില്‍ നിന്ന് സി.പി.എം എം.എല്‍.എമാരായ കെ. കുഞ്ഞിരാമന്‍, രാജഗോപാലന്‍, എം.പി പി.കരുണാകരന്‍ എന്നിവര്‍ വിട്ടു നിന്നു. ഭിന്നശേഷിയുള്ള കുട്ടികള്‍ക്ക് ഉപകരണങ്ങള്‍ വിതരണം ചെയ്യുന്ന ചടങ്ങായിരുന്നു ഇത്. ഇതിന് മുമ്പ് മഞ്ചേരിയില്‍ മന്ത്രിയുടെ പരിപാടിക്കും സി.പി.എം ജനപ്രതിനിധികള്‍ എത്തിയിരുന്നില്ല. ജില്ലാ പഞ്ചായത്ത് അംഗമായ എ.പി ഉഷ പകുതിയോടെയാണ് യോഗത്തിനെത്തിയത്. സംഭവത്തെ കുറിച്ച് വ്യത്യസ്ത അഭിപ്രായങ്ങളാണ് സി.പി.എം കേന്ദ്രങ്ങള്‍ നല്‍കുന്നത്. ഇത് സംശയത്തിനിട നല്‍കുന്നു.

സി.പി.എം സമ്മേളനങ്ങള്‍ നടക്കുന്നതിനാലാണ് ജനപ്രതിനിധികള്‍ ഉള്‍പെടെയുള്ള നേതാക്കള്‍ റവന്യൂമന്ത്രിയുടെ പരിപാടിയില്‍ പങ്കെടുക്കാത്തതെന്ന് ഒരു വിഭാഗം തേതാക്കള്‍ ചൂണ്ടിക്കാട്ടി. എന്നാല്‍ നേരത്തെ നിശ്ചയിച്ച പരിപാടിയുടെ ഡേറ്റ് മാറ്റിയതിനെ തുടര്‍ന്നുണ്ടായ ആശയക്കുഴപ്പമാണ് ഇത്തരമൊരു സ്ഥിതിവിശേഷം സൃഷ്ടിച്ചതെന്ന് മറ്റുചിലര്‍ പറയുന്നു. കഴിഞ്ഞയാഴ്ച ഇടുക്കിയിലെ നെടുങ്കണ്ടത്ത് റവന്യൂ മന്ത്രി വില്ലേജ് ഓഫീസ് ഉദ്ഘാടനം ചെയ്യാന്‍ എത്തിയപ്പോള്‍ സി.പി.എം നേതാക്കളും മറ്റും ഉണ്ടായിരുന്നില്ല. ഇടത് സ്വതന്ത്രനായ ജോയിസ് ജോര്‍ജ് എം.പിമാത്രമാണ് ഉണ്ടായിരുന്നത്. യോഗത്തില്‍ വെച്ച് എം.പി ഭൂമി കയ്യേറിയിട്ടില്ലെന്ന് മന്ത്രി വ്യക്തമാക്കുകയും ചെയ്തിരുന്നു.

റവന്യൂമന്ത്രിയുടെ കടുംപിടുത്തങ്ങളാണ് മുഖ്യമന്ത്രിയേയും സി.പി.എമ്മിനെയും വെട്ടിലാക്കിയതെന്ന് ആക്ഷേപമുണ്ട്. ഇതിന്റെ പ്രതിഫലനമാണ് മന്ത്രിയുടെ യോഗങ്ങളിലും കാണുന്നതെന്ന് രാഷ്ട്രീയനിരീക്ഷകര്‍ വിലയിരുത്തുന്നു. മുഖ്യമന്ത്രി എടുക്കുന്ന പല തീരുമാനങ്ങള്‍ക്കും എതിരായ നിലപാടാണ് റവന്യൂമന്ത്രി സ്വീകരിക്കുന്നത്. പലപ്പോഴും അദ്ദേഹം മാധ്യമങ്ങളിലൂടെയും മറ്റും തുറന്ന് പറയുകയും ചെയ്തിട്ടുണ്ട്. കായല്‍ കയ്യേറിയ തോമസ് ചാണ്ടിക്കെതിരെ ക്രിമിനല്‍ കേസെടുക്കണമെന്നാണ് റവന്യൂമന്ത്രി മുഖ്യമന്ത്രിയോട് ആവശ്യപ്പെട്ടത്. അതുപോലെ തിരുവനന്തപുരം ലോ അക്കാദമിയിലെ ഭൂമി പ്രശ്‌നം ഉയര്‍ന്ന് വന്നപ്പോള്‍, കരാര്‍ലംഘനം നടത്തിയതിനാല്‍ അക്കാദമി ഭൂമി തിരിച്ചുപിടിക്കണമെന്നാണ് റവന്യൂമന്ത്രി ആവശ്യപ്പെട്ടത്.