എന്‍.സി.പിയില്‍ മന്ത്രിക്കസേരയ്ക്കായി കളി തുടങ്ങി. ശശീന്ദ്രനെ മന്ത്രിയാക്കാന്‍ പാര്‍ട്ടി മുന്നണി നേതൃത്വത്തെ സമീപിച്ചതിന് പിന്നാലെ തോമസ് ചാണ്ടി ക്ലീന്‍ ചിറ്റിനായി സുപ്രിംകോടതിയിലേക്ക്. തനിക്കെതിരെ ഹൈക്കോടതി ഡിവിഷന്‍ ബെഞ്ച് നടത്തിയ പരാമര്‍ശങ്ങള്‍ പിന്‍വലിക്കുന്നതിനാണ് സുപ്രിംകോടതിയിലെത്തിയത്. കുറ്റവിമുക്തനായി ആദ്യം വരുന്നയാള്‍ക്കാണ് മന്ത്രിസ്ഥാനമെന്ന് പാര്‍ട്ടി പറഞ്ഞിരുന്നു. അതിനിടെയാണ് ഫോണ്‍ കെണി അന്വേഷിച്ച ജസ്റ്റിസ് പി.എസ് ആന്റണി കമ്മിഷന്‍ ശശീന്ദ്രന് ക്ലീന്‍ ചിറ്റ് നല്‍കിയത്. തുടര്‍ന്ന് ശശീന്ദ്രന് മന്ത്രിസ്ഥാനത്തേക്ക് മടങ്ങിവരുന്നതിന് തടസമില്ലെന്നും പക്ഷെ, ഞാന്‍ മാത്രമല്ല ഇക്കാര്യം തീരുമാനിക്കേണ്ടതെന്നും മുഖ്യമന്ത്രി പറഞ്ഞതോടെ എന്‍.സി.പിക്കും ശശീന്ദ്രനും ആത്മവിശ്വാസം കൂടി. 

ഡല്‍ഹിയില്‍ കേന്ദ്രനേതൃത്വവുമായി ചര്‍ച്ച നടത്തിയ ശേഷം ശശീന്ദ്രന് തിരികെയെത്താമെന്ന് എന്‍.സി.പി സംസ്ഥാന പ്രസിഡന്റ് ടി.പി പീതാംബരന്‍ മാസ്റ്റര്‍ അഭിപ്രായം പ്രകടിപ്പിച്ചു. അടുത്ത ദിവസം അദ്ദേഹം കോട്ടയത്തെത്തി എല്‍.ഡി.എഫ് കണ്‍വീനര്‍ വൈക്കം വിശ്വനുമായി കൂടിക്കാഴ്ച നടത്തി. ഘടകക്ഷികളുമായി ആലോചിച്ച ശേഷം മറ്റ് കാര്യങ്ങള്‍ തീരുമാനിക്കാമെന്നും ശശീന്ദ്രന്റെ രണ്ടാം വരവിന് തടസമില്ലെന്നും അദ്ദേഹം അറിയിച്ചു. കമ്മിഷന്‍ ക്ലീറ്റ് ചിറ്റ് നല്‍കിയെന്നും ഹൈക്കോടതിയിലുള്ള കേസ് മന്ത്രിസഭാ പ്രവേശനത്തിന് തടസമില്ലെന്നും പീതാംബരന്‍ മാസ്റ്റര്‍ അഭിപ്രായപ്പെട്ടു. സി.പി.ഐയും അനുകൂല നിലപാടാണ് സ്വീകരിച്ചത്. മന്ത്രിസ്ഥാനം സംബന്ധിച്ച് എന്‍.സി.പി തീരുമാനം എടുക്കട്ടെയെന്നും ശശീന്ദ്രന് മടങ്ങിവരാമെന്നും കാനം അഭിപ്രായം പറഞ്ഞു.

മന്ത്രിക്കസേര തെറിച്ചതോടെ കുവൈറ്റിലേക്ക് മടങ്ങിയ തോമസ് ചാണ്ടി അപകടം മണത്ത് പെട്ടെന്ന് സുപ്രിംകോടതിയില്‍ പോകാന്‍ തീരുമാനിക്കുകയായിരുന്നു. ഹൈക്കോടതി പരാമര്‍ശം വന്നതിന് പിന്നാലെ തൊട്ടടുത്ത ദിവസം സുപ്രിംകോടതിയില്‍ പോകാനാണ് തീരുമാനിച്ചിരുന്നത്. മുഖ്യമന്ത്രി തലസ്ഥാനത്തേക്ക് വിളിപ്പിച്ച് രാജി ആവശ്യപ്പെട്ടതോടെ അത് പൊളിഞ്ഞു. അടുത്ത ദിവസം പോകുമെന്ന് പറഞ്ഞെങ്കിലും ശശീന്ദ്രന്റെ മടങ്ങിവരവ് ഉടന്‍ നടക്കില്ലെന്ന് കരുതി ചാണ്ടി കുവൈറ്റിലേക്ക് പറന്നു. അതിനിടെയാണ് സംസ്ഥാനത്ത് കാര്യങ്ങള്‍ കീഴ്‌മേല്‍മറിഞ്ഞത്. ചാണ്ടിയുടെ പണത്തോട് മാത്രമേ പലര്‍ക്കും താല്‍പര്യമുള്ളൂ. ശശീന്ദ്രന്‍ മന്ത്രിയാകുന്നതാണ് എല്ലാവര്‍ക്കും ഇഷ്ടം. ചാണ്ടി പലവിധത്തിലുള്ള അഴിമതികള്‍ നടത്തിയെന്ന് വ്യാപകമായ ആക്ഷേപമുണ്ട്. ശശീന്ദ്രന്‍ ജനസമ്മതനും മുന്നണിയിലെ പൊതുസമ്മതനുമാണ്.

 രണ്ട് എം.എല്‍.എമാരാണ് എന്‍.സി.പിക്ക് ഉണ്ടായിരുന്നത്. മുതിര്‍ന്ന നേതാവും പാര്‍ലമെന്ററി രംഗത്ത് അനുഭവപരിചയവുമുള്ള എ.കെ ശശീന്ദ്രനെ ആദ്യം മന്ത്രിയാക്കി. ഗതാഗത വകുപ്പുമായി അദ്ദേഹം മുന്നോട്ട് പോകുന്നതിനിടെയാണ് ഫോണ്‍ കെണിയൊരുക്കി മംഗളം ചാനല്‍ അദ്ദേഹത്തെ കുരുക്കിയത്. അതോടെ വിവാദങ്ങളുണ്ടാക്കാതെ അദ്ദേഹം രാജിവെച്ചു. പിന്നാലെയാണ് തോമസ് ചാണ്ടി ഗതാഗതവകുപ്പിന്റെ വളയം പിടിച്ചത്. നാല് മാസം തികയും മുമ്പ് മാര്‍ത്താണ്ഡം കായല്‍ കയ്യേറിയെന്ന ആരോപണം ഉയര്‍ന്നു. അത് മാന്യമായി നേരിടാതെ തോമസ് ചാണ്ടി പ്രശ്‌നം വഷളാക്കി. ആലപ്പുഴ കളക്ടറോട് സര്‍ക്കാര്‍ റിപ്പോര്‍ട്ട് ആവശ്യപ്പെട്ടു. കയ്യേറ്റം നടന്നെന്ന് കണ്ടെത്തിയെന്നായിരുന്നു റിപ്പോര്‍ട്ട്. ഇതിനെതിരെ ഹൈക്കോടതിയ സമീപിച്ച തോമസ് ചാണ്ടി രൂക്ഷവിമര്‍ശനം ഏറ്റുവാങ്ങി. അങ്ങനെ രാജിക്ക് വഴിതെളിയുകയായിരുന്നു.