സനല്‍കുമാര്‍ ശശിധരന്റെ എസ്. ദുര്‍ഗ ഗോവ രാജ്യാന്തര ചലച്ചിത്രമേളയില്‍ പ്രദര്‍ശിപ്പിക്കണമെന്ന ഹൈക്കോടതി സിംഗിള്‍ ബെഞ്ചിന്റെ വിധി സ്‌റ്റേ ചെയ്യണമെന്ന കേന്ദ്രസര്‍ക്കാരിന്റെ അപേക്ഷ ഡിവിഷന്‍ ബെഞ്ച് തള്ളി. ഇതോടെ മോദി സര്‍ക്കാരിന് ഇരട്ടിപ്രഹരമായി. ആദ്യം സിനിമയുടെ പേര് മാറ്റണമെന്ന് പറഞ്ഞാണ് സംഘപരിവാര്‍ ശക്തികള്‍ വിവാദമുണ്ടാക്കിയത്. ഇതോടെ സെക്‌സി ദുര്‍ഗ എന്ന പേര് മാറ്റി എസ്. ദുര്‍ഗ എന്നാക്കി സെന്‍സര്‍ ചെയ്തു. സെന്‍സര്‍ കോപ്പി നല്‍കിയില്ലെന്ന് പറഞ്ഞാണ് സിനിമ ഒഴിവാക്കിയതെന്നായിരുന്നു കേന്ദ്രസര്‍ക്കാരിന്റെ വാദം. കേന്ദ്രവാര്‍ത്താ വിതരണമന്ത്രാലയത്തിലെ ഉന്നതര്‍ ഇടപെട്ടാണ് എസ്.ദുര്‍ഗയും ന്യൂഡും ഒഴിവാക്കിയത്. 

ഇതേ തുടര്‍ന്ന് ജൂറി ചെയര്‍മാന്‍ സുജോയ് രാജിവെച്ചിരുന്നു. പിന്നാലെ രണ്ട് ജൂറി അംഗങ്ങളും രാജിവെച്ചു. മേള തുടങ്ങുന്നതിന് രണ്ട് ദിവസം മുമ്പാണ് പുതിയ ചെയര്‍മാനെ വച്ചത്. നിരവധി രാജ്യാന്തര ചലച്ചിത്രമേളകളില്‍ പ്രദര്‍ശിപ്പിക്കുകയും പുരസ്‌ക്കാരങ്ങള്‍ നേടുകയും ചെയ്ത ചിത്രമാണ് എസ്. ദുര്‍ഗ. റോയിട്ടര്‍ഡാം ഫെസ്റ്റിവലില്‍ പുരസ്‌ക്കാരവും നേടി. ചിത്രത്തിന്റെ പേര് മതവികാരത്തെ വൃണപ്പെടുത്തുന്നതാണെന്ന് കേന്ദ്രസര്‍ക്കാര്‍ കോടതിയില്‍ വാദിച്ചിരുന്നെങ്കിലും കോടതി അത് അംഗീകരിച്ചില്ല. ഗുജറാത്ത് തിരഞ്ഞെടുപ്പ് അടുത്തിരിക്കുന്ന സമയം മതവികാരം ഇളക്കിവിട്ട് വോട്ട് ബാങ്കാക്കാനാണ് കേന്ദ്രസര്‍ക്കാരും ബി.ജെ.പിയും ശ്രമിക്കുന്നത്.

പത്മാവതി എന്ന ബോളിവുഡ് ചിത്രം സെന്‍സര്‍ ചെയ്യുന്നതിന് മുമ്പ് തടയാന്‍ ബി.ജെ.പി ഭരിക്കുന്ന നാല് സംസ്ഥാനങ്ങള്‍ തീരുമാനിച്ചിരിക്കുകയാണ്. രജപുത്ര റാണിയായ പത്മാവതിയുടെ കഥ പറയുന്ന ചിത്രത്തില്‍ അലാവുദ്ദീന്‍ ഖില്‍ജിയോട് പത്മാവതിക്ക് പ്രണയം തോന്നുണ്ടെന്നതാണ് വിവാദമായത്. ചിത്രീകരണം ആരംഭിച്ചത് മുതല്‍ രജപുത്ര സംഘടനയായ കര്‍ണി സേന രംഗത്തെത്തിയിരുന്നു. നായിക ദീപിക പാദുക്കോണിന്റെ മൂക്ക് ചെത്തുമെന്ന് വെല്ലുവിളിച്ചിരിക്കുകയാണ് തീവ്രഹിന്ദു സംഘടനകള്‍. ഇതേ തുടര്‍ന്ന് ദിപികയ്ക്കും കുടുംബത്തിനും സുരക്ഷ ഒരുക്കിയിരിക്കുകയാണ്.