ചെന്നിത്തലയുടെ പ്രസ്താവനയ്ക്കെതിരെ ഇ.ടി മുഹമ്മദ് ബഷീര് ഇടഞ്ഞു; ഒരു തരത്തിലുള്ള ഒത്തുതീര്പ്പിനും ലീഗില്ല
സാമ്പത്തിക സംവരണത്തെ ചൊല്ലി യു.ഡി.എഫില് തമ്മിലടി. ദേവസ്വം ബോര്ഡിലെ സാമ്പത്തിക സംവരണം യു.ഡി.എഫിന്റെ ആശയമാണെന്നും കെ.പി.സി.സി അതിനെ എതിര്ക്കുകയോ, തള്ളുകയോ ചെയ്തിട്ടില്ലെന്ന് പ്രതിപക്ഷനേതാവ് രമേശ് ചെന്നിത്തല വ്യക്തമാക്കി. സമവായമില്ലാതെയാണ് എല്.ഡി.എഫ് സംവരണം നടപ്പാക്കിയത്. സമവായത്തിലൂടെ സംവരണം നടപ്പാക്കണമെന്നാണ് തങ്ങള് ആവശ്യപ്പെട്ടതെന്നും ചെന്നിത്തല പറഞ്ഞു. സംവരണ വിഷയത്തില് യു.ഡി.എഫ് നിലപാട് വ്യക്തമാക്കണമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് ഇന്നലെ ആവശ്യപ്പെട്ടിരുന്നു. ചെന്നിത്തലയുടെ നിലപാടിനെതിരെ കടുത്ത എതിര്പ്പുമായി മുസ്ലിംലീഗ് നേതാവ് ഇ.ടി മുഹമ്മദ് ബഷീര് രംഗത്തെത്തി. സാമ്പത്തിക സംവരണവുമായി ആര് എത്തിയാലും എതിര്ക്കുമെന്ന് അദ്ദേഹം വ്യക്തമാക്കി. സര്ക്കാര് നിലപാടിനെതിരെ കോടതിയില് പോകുമെന്ന് എസ്.എന്.ഡി.പിയും വ്യക്തമാക്കിയിട്ടുണ്ട്.
സംവരണത്തെ അനുകൂലിച്ച് മന്ത്രി കെ.ടി ജലീലും രംഗത്തെത്തി. ലീഗ് എല്ലാത്തിലും വര്ഗീയത കാണുകയാണെന്നും അദ്ദേഹം പറഞ്ഞു. എല്.ഡി.എഫില് ഇത് സംബന്ധിച്ച് അഭിപ്രായ ഐക്യമാണുള്ളത്. യു.ഡി.എഫിലെ സ്ഥിതി അങ്ങനെയല്ല. സോളാര് പ്രശ്നത്തെ തുടര്ന്ന് ഉണ്ടായ ഐക്യം തകര്ക്കുന്നതാണ് ചെന്നിത്തലയുടെ പ്രസ്താവന. ചെന്നിത്തലയ്ക്ക് സംഘപരിവാറുമായി ബന്ധമുണ്ടെന്ന് യു.ഡി.എഫില് ചിലര്ക്ക് ആക്ഷേപമുണ്ട്. അത് ശരിവയ്ക്കുന്ന രീതിയിലാണ് സംവരണ വിഷയത്തിലെ പ്രതികരണം. ഇത് അദ്ദേഹത്തിന് ദോഷം ചെയ്യുമെന്ന് ഉറപ്പാണ്. അടുത്ത യു.ഡി.എഫ് യോഗത്തില് ഇക്കാര്യം ചര്ച്ചയാകുമെന്ന് ഉറപ്പാണ്.
കെ.പി.സി.സി അധ്യക്ഷന് എം.എം ഹസനും മുന് അധ്യക്ഷന് വി.എം സുധീരനും അടക്കം ദേവസ്വം ബോര്ഡിലെ സംവരണത്തെ എതിര്ക്കുന്നുണ്ട്. ഇതോടെ കോണ്ഗ്രസിനുള്ളിലും മുന്നണിക്കുള്ളിലും പ്രശ്നം രൂക്ഷമാകുമെന്ന് ഉറപ്പാണ്. യു.ഡി.എഫിലെ രണ്ടാമത്തെ കക്ഷിയാണ് ലീഗ്. 20 മുതല് 24 സീറ്റ് വരെയാണ് അധാകാരം കിട്ടുമ്പോള് അവര് നേടാറുള്ളത്. അതിനാല് അവരെ പിണക്കി കോണ്ഗ്രസിന് തീരുമാനം എടുക്കാനാവില്ല. വരുംദിവസങ്ങളില് ഇത് സംബന്ധിച്ച് കൂടുതല് ചര്ച്ചകളുണ്ടാകും.
https://www.facebook.com/Malayalivartha
