രാഷ്ട്രിയപാര്‍ട്ടിക്കാരുടെ ജാഥ സ്ഥിരം സംഭവമാണ്. എന്നാല്‍ ഇത് മൂലം കുടുങ്ങുന്നത് ജനങ്ങളാണ്. ജാഥകാരണം ഉണ്ടാകുന്ന ഗതാഗതകുരുക്കില്‍പെട്ട് ജോലിപോകുന്നവര്‍ക്ക് കൃത്യസമയത്ത് എത്താന്‍ സാധിക്കുന്നില്ല. അതുപോലെ തന്നെ ആരെയെങ്കിലും ആശുപത്രിയെലെത്തിക്കണമെങ്കില്‍ അതിനും സാധിക്കുന്നില്ല.

അങ്ങനെയൊരു സംഭവമാണ് കോട്ടയത്ത് നടന്നത്. ചൊവ്വാഴ്ചയാണ് ചിങ്ങവനം കുഴിമറ്റം നടുവിലേപറമ്ബില്‍ റിക്കിറിന്റു ദമ്ബതികളുടെ ഏക മകള്‍ ഐലിന്‍ ഗുളിക തൊണ്ടിയില്‍ കുടുങ്ങി മരിച്ചത്. അന്നേദിവസം വൈകിട്ടായിരുന്നു എസ്ഡിപിഐ ജാഥ. ചിങ്ങവനത്തു നിന്ന് കാറില്‍ കുട്ടിയുമായി ആശുപത്രിയിലേക്ക് വരവെ ഇതുമൂലം കോട്ടയത്ത് ഗതാഗതക്കുരുക്കുണ്ടായി. സ്വതവേ തിരക്കേറിയ പുളിമൂട് ജങ്ഷന്‍ ഭാഗം മുതല്‍ കോടിമത വരെയുള്ള പ്രദേശം ജാഥകൂടി എത്തിയതോടെ വീര്‍പ്പുമുട്ടി.

ഗുളികകഴിച്ച അസ്വസ്ഥത പ്രകടിപ്പിച്ച കുട്ടിയെ അമ്മയാണ് വഴിയിലിറങ്ങി കൈനീട്ടിയപ്പോള്‍ നിര്‍ത്തിയ കാറില്‍ കയറ്റി ആശുപത്രിയിലേക്ക് കൊണ്ടുവന്നത്. ഒപ്പം സഹോദരി മാത്രമാണുണ്ടായിരുന്നത്. കോടിമത പള്ളിപ്പുറത്തുകാവ് ഭാഗത്തെത്തിയപ്പോള്‍ വണ്ടി ഗതാഗതക്കുരുക്കില്‍പ്പെടുകയായിരുന്നെന്ന് ഐലിന്റെ കുടുംബവുമായി അടുത്ത ബന്ധമുള്ളവര്‍ പറയുന്നു.

വാഹനമോടിച്ചയാള്‍ വഴിയിലിറങ്ങി പലരോടും പറഞ്ഞുനോക്കിയെങ്കിലും പ്രയോജനമുണ്ടായില്ല. ഏറെ സമയം ഇങ്ങനെ നഷ്ടമായി. ഒടുവില്‍ തിരക്കൊഴിഞ്ഞ് വാഹനം പുളിമൂട് ജങ്ഷനിലെത്തിയപ്പോള്‍ കുട്ടി മരിച്ചു. സംഭവത്തിനെതിരെ സോഷ്യല്‍ മീഡിയയിലും മറ്റും പ്രതിഷേധം വ്യാപകമാണ്
ചിങ്ങവനത്ത് നല്ലൊരു ആശുപത്രിയില്ലാത്തതും കുട്ടിയുടെ ജീവന്‍ നഷ്ടമാകാന്‍ കാരണമായതായി നാട്ടുകാര്‍ പറയുന്നു.

നിലവാരമുള്ള സര്‍ക്കാര്‍ ആശുപത്രിയോ, എല്ലാ സൌകര്യങ്ങളുമുള്ള സ്വകാര്യ ആശുപത്രിയോ ഇവിടില്ല. കോട്ടയത്തിന്റെ തീരാശാപമായ ഗതാഗതക്കുരുക്കിന്റെ കൂടി ഇരയായിരുന്നു അഞ്ചുവയസുകാരി. ബേക്കര്‍ ജങ്ഷനും പുളിമൂട് ജങ്ഷനും നാഗമ്ബടവുമെല്ലാം ഞായറാഴ്ചയൊഴികെ എല്ലാ ദിവസവും തിരക്കില്‍ കുടുങ്ങുക പതിവാണ്.

അഞ്ചുവസുകാരി ഐലിന്‍ ഗുളിക തൊണ്ടയില്‍കുടുങ്ങി ആശുപത്രിയിലേക്ക് പോകുന്നവഴി മരിച്ച സംഭവത്തില്‍ മനുഷ്യാവകാശ കമീഷന്‍ സ്വമേധയാ കേസെടുത്തു. രാഷ്ട്രീയപാര്‍ട്ടി നടത്തിയ ജാഥമൂലം ഗതാഗതക്കുരുക്കുണ്ടായി ആശുപത്രിയിലെത്താന്‍ വൈകിയത് മരണകാരണമായെന്ന വാര്‍ത്തകളുടെ അടിസ്ഥാനത്തിലാണ് കമീഷന്‍ കേസെടുത്തത്. മൂന്നാഴ്ചക്കം അന്വേഷിച്ച് റിപ്പോര്‍ട്ട് നല്‍കാന്‍ ജില്ലാ പൊലീസ് മേധാവിക്ക് കമീഷന്‍ അംഗം കെ മോഹന്‍കുമാര്‍ നിര്‍ദേശം നല്‍കി.