ഫോണ്‍ കെണി കേസില്‍ പെട്ട മുന്‍മന്ത്രി എ.കെ ശശീന്ദ്രനെ ജൂഡീഷ്യല്‍ കമ്മിഷന്‍ കുറ്റവിമുക്തനാക്കിയെങ്കിലും മന്ത്രിസ്ഥാനത്തേക്കുള്ള അദ്ദേഹത്തിന്റെ മടങ്ങിവരവ് വൈകും. കേസിലെ പെണ്‍കുട്ടി ശശീന്ദ്രനെതിരെ നല്‍കിയ കേസ് ഒത്തുതീര്‍പ്പാക്കാന്‍ സമ്മതിച്ചെങ്കിലും കേസ് പരിഗണിക്കുന്നത് അടുത്തമാസം 12 ലേക്ക് ഹൈക്കോടതി മാറ്റി. ജുഡീഷ്യല്‍ കമ്മീഷന്റെ ടോംസ് ഓഫ് റഫറന്‍സ് എന്തൊക്കെയാണെന്നും അതിന്റെ പകര്‍പ്പ് ഹാജരാക്കാനും കോടതി സര്‍ക്കാരിന് നിര്‍ദേശം നല്‍കി. ജുഡീഷ്യല്‍ കമ്മീഷന്റെ റിപ്പോര്‍ട്ട് ആവശ്യമില്ലെന്നും കോടതി പറഞ്ഞു. കേസ് ഒത്തുതീര്‍പ്പാക്കുന്നതിനെതിരെ മറ്റൊരു ഹര്‍ജി കൂടി ഹൈക്കോടതിയിലെത്തി. തൃശ്ശൂര്‍ സ്വദേശി തോമസ് ജോര്‍ജാണ് ഹര്‍ജിക്കാരന്‍ . നേരത്തെ മഹിളാമോര്‍ച്ചയും കക്ഷി ചേരാന്‍ ഹര്‍ജി നല്‍കിയിരുന്നു.

ശശീന്ദ്രനെ മന്ത്രിയാക്കണമെന്ന തീരുമാനത്തില്‍ പാര്‍ട്ടി ഉറച്ച് നില്‍ക്കുകയാണെന്ന് എന്‍.സി.പി സംസ്ഥാന പ്രസിഡന്റ് ടി.പി പീതാംബരന്‍ മാസ്റ്റര്‍ പറഞ്ഞു. മറ്റാരെയും മന്ത്രി സ്ഥാനത്തേക്ക് പരിഗണിക്കുന്നില്ലെന്നും അദ്ദേഹം വ്യക്തമാക്കി. പാര്‍ട്ടി പറയുന്നതിനപ്പുറം ഒന്നും പറയാനില്ലെന്ന് എ.കെ ശശീന്ദ്രനും പറഞ്ഞു. മന്ത്രിസ്ഥാനത്തേക്ക് താന്‍ വരുന്നതില്‍ ധാര്‍മിക പ്രശ്‌നമുണ്ടെന്ന് പറയുന്ന പ്രതിപക്ഷനേതാക്കള്‍ അവരുടെ ധാര്‍മികയെ കുറിച്ച് ചിന്തിക്കട്ടെയെന്നും തിരിച്ചുവരുന്നതിന് തനിക്ക് യാതൊരു അയോഗ്യതയും ഇല്ലെന്നും ശശീന്ദ്രന്‍ കൊച്ചിയില്‍ പറഞ്ഞു. മന്ത്രിസഭാ പ്രവേശനം ചര്‍ച്ച ചെയ്യാന്‍ കൊച്ചിയില്‍ എന്‍.സി.പി നേതൃയോഗം ചേരുകയാണ്. മാണി സി. കാപ്പന്‍ അടക്കമുള്ള നേതാക്കള്‍ പങ്കെടുക്കുന്നുണ്ട്. 

ശശീന്ദ്രന്‍ മന്ത്രിസ്ഥാനത്തേക്ക് വരുന്നതിന് തടയിടാന്‍ മുന്‍മന്ത്രി തോമസ് ചാണ്ടിയും അദ്ദേഹത്തെ അനുകൂലിക്കുന്ന എന്‍.സി.പി നേതാക്കളും ശ്രമിക്കുന്നുണ്ടെന്ന് ആക്ഷേപമുണ്ട്. അതിന്റെ ഭാഗമായാണ് ഇന്ന് പുതിയ ഹര്‍ജി ഹൈക്കോടതിയില്‍ എത്തിയതെന്ന് അറിയുന്നു. ഹൈക്കോടതിയിലെ കേസ് തീര്‍പ്പാക്കിയശേഷം മന്ത്രിസഭാ പ്രവേശനം മതിയെന്നാണ് സി.പി.എം തീരുമാനമെന്ന് അറിയുന്നു. കാരണം വീണ്ടും വിവാദങ്ങളുണ്ടായി , ഒരു രാജി കൂടി ഒഴിവാക്കാനാണിത്. മുന്നണി കണ്‍വീനര്‍ വൈക്കം വിശ്വനെ കോട്ടയത്തെ വസതിയിലെത്തി എന്‍.സി.പി നേതാക്കള്‍ കഴിഞ്ഞയാഴ്ച കണ്ടിരുന്നു. മറ്റ് ഘടകകക്ഷികളുമായി ആലോചിച്ച ശേഷം കാര്യം തീരുമാനിക്കാമെന്നും ആരും ശശീന്ദ്രന് എതിരല്ലെന്നും അന്ന് വൈക്കം വിശ്വന്‍ വ്യക്തമാക്കിയിരുന്നു.