മല പോലെ വന്ന പടയൊരുക്കം എലി പോലെ പോയതിന് പിന്നില്‍ സര്‍ക്കാരിന്റെ നിര്‍ണായക ഇടപെടല്‍. രാഹുല്‍ ഗാന്ധിയോട് കേരളത്തിലേക്കുള്ള യാത്ര റദ്ദാക്കണമെന്ന് ആവശ്യപ്പെട്ടത് സംസ്ഥാന സര്‍ക്കാര്‍. ശംഖുമുഖത്താണ് യാത്രയുടെ സമാപനം തീരുമാനിച്ചിരുന്നത്. എന്നാല്‍ ശംഖുമുഖം തീരെ സുരക്ഷിതമല്ലെന്നും രാഹുല്‍ പ്രസംഗിക്കാനെത്തരുതെന്നും സര്‍ക്കാര്‍ അറിയിച്ചു. തുടര്‍ന്നാണ് യാത്ര റദ്ദാക്കിയത്.

ആദ്യം കെ.എം.മാണിയുടെയും പിന്നീട് ഉമ്മന്‍ ചാണ്ടിയുടെയും വയറ്റത്തടിച്ചതിന്റെ ഫലമാണ് രമേശ് ഇപ്പോള്‍ അനുഭവിക്കുന്നതെന്ന് കോണ്‍ഗ്രസുകാരായ എ ഗ്രൂപ്പുകാര്‍ അടക്കം പറഞ്ഞു തുടങ്ങി. കോണ്‍ഗ്രസിന്റെ പല നേതാക്കളും ചെന്നിത്തലയുടെ തന്‍ പ്രമാണിത്തത്തില്‍ അസഹ്യരാണ്. ഉമ്മന്‍ ചാണ്ടിയെ സോളാര്‍ കേസില്‍ ഉള്‍പ്പെടുത്തിയതിന്റെ ഉത്തരവാദിത്വത്തില്‍ നിന്നും ചെന്നിത്തലയെ ഒഴിവാക്കാന്‍ കോണ്‍ഗ്രസിലെ എ ഗ്രൂപ്പൂ കാര്‍ തയ്യാറല്ല. സോളാര്‍ കേസില്‍ ശ്രീധരന്‍ നായര്‍ ഉമ്മന്‍ ചാണ്ടിക്കെതിരെ രംഗത്തെത്തിയത് ചെന്നിത്തലയുടെ ഇടപെടല്‍ വഴിയാണെന്ന് എ ഗ്രൂപ്പുകാര്‍ ഇന്നും കരുതുന്നു.

കഴിഞ്ഞ യുഡിഎഫ് സര്‍ക്കാരിന്റെ കാലത്ത് മുഖ്യമന്ത്രി സ്ഥാനത്തിനു വേണ്ടിയുള്ള കാലുവാരലാണ് വിവാദങ്ങള്‍ക്ക് കാരണമായത്. പകുതി രണ്ടര വര്‍ഷം തനിക്ക് മുഖ്യമന്ത്രിപദവി നല്‍കണമെന്നായിരുന്നു ചെന്നിത്തലയുടെ ആവശ്യം. എന്നാല്‍ ഉമ്മന്‍ ചാണ്ടി അത് തള്ളി. പിന്നീട് എന്‍എസ്എസ് ഉള്‍പ്പെടെ ഇട പെട്ടാണ് ആഭ്യന്തര മന്ത്രി സ്ഥാനം ലഭിച്ചത്. അവിടെയിരുന്നു കൊണ്ടാണ് മാണിക്കിട്ട് അടിച്ചത്. കെ.എം മാണി ഉമ്മന്‍ ചാണ്ടി യുടെ വിശ്വസ്തനായിരുന്നു. അവസാനം അദ്ദേഹത്തിന് രാജിവയ്‌ക്കേണ്ടി വന്നു.

പടയൊരുക്കത്തിന്റെ സമാപന സമ്മേളനം റദ്ദാക്കിയത് നിര്‍ഭാഗ്യകരമാണെന്നാണ് ചെന്നിത്തല പ്രതികരിച്ചത്. കോടിക്കണക്കിന് രൂപ ചെലവഴിച്ചാണ് സമാപന സമ്മേളനം ആസൂത്രണം ചെയ്തത്. ഭരണത്തിലില്ലാത്ത ഒരു പാര്‍ട്ടിയെ സംബന്ധിച്ചടത്തോളം ഒരു മഹാസമ്മേളനം സംഘടിപ്പിക്കുന്നത് അത്ര എളുപ്പമുള്ള കാര്യമല്ല. കോടികളാണ് പടയൊരുക്കത്തിനു വേണ്ടി പിരിച്ചത്. എന്നാല്‍ അതെല്ലാം നഷ്ടമായി.

ശംഖുമുഖത്തെ ഒരുക്കങ്ങള്‍ പ്രകൃതിക്ഷോഭത്തില്‍ ഇല്ലാതായി. സംസ്ഥാനത്ത് ഉടനീളം സ്ഥാപിച്ചിരുന്ന കൊടികളും ഫ്‌ലക്‌സുകളും നശിച്ചു. ഇനിയും സമാപന സമ്മേളനത്തിന് വേണ്ടിയുള്ള ഒരുക്കങ്ങള്‍ തുടങ്ങണമെങ്കില്‍ ആദ്യം മുതല്‍ ആരംഭിക്കണം. രാഹുല്‍ ഗാന്ധി വരാതായതോടെ ബേബി ജോണ്‍ അനുസ്മരണവും മാറ്റിവച്ചു. രണ്ടാം തവണയാണ് ഇത് മാറ്റി വയ്ക്കുന്നത്. ആദ്യം രാഹുലിന്റെ അസൗകര്യം കാരണമാണ് മാറ്റി വച്ചത്.

അതിനിടെ വീരന്റെ ഇടതു നോട്ടവും ചെന്നിത്തലക്ക് അടിയായി. വീരനുമായി സംസാരിക്കാന്‍ പോലും ചെന്നിത്തല തയ്യാറല്ല. രാഹുല്‍ ഗാന്ധി സംസ്ഥാനത്ത് വരുമ്പോള്‍ ഒരു ഇടപെടല്‍ പ്രതീക്ഷിച്ചവര്‍ നിരാശരായി.