കേരളത്തിലേക്ക് ആഞ്ഞ് വീശിയ ഓഖി ചുഴലിക്കാറ്റില്‍ കാണാതായ ഒരു മത്സ്യത്തൊഴിലാളിയുടെ മൃതദേഹം കൂടി കോഴിക്കോട് തീരത്തു നിന്ന് കണ്ടെത്തി. ഇതോടെ ഓഖി ദുരന്തത്തില്‍ പെട്ടു മരണമടഞ്ഞവരുടെ എണ്ണം 71 ആയി. കോഴിക്കോട് വടകര ചോമ്പാല ഉള്‍ക്കടലില്‍ നിന്നും മത്സ്യത്തൊഴിലാളികളാണ് മൃതദേഹം കണ്ടെത്തിയത്. ഓഖി ദുരന്തം സംഭവിച്ച് 18 ദിവസങ്ങള്‍ പിന്നിട്ടപ്പോള്‍ തിരച്ചില്‍ ഗോവന്‍ തീരത്തേക്ക് കൂടി വ്യാപിപിക്കുകയാണ്.

അതേസമയം, തീരപ്രദേശത്ത് ആഞ്ഞടിച്ച ഓഖി ദുരന്തത്തില്‍ കാണാതായവരുടെ പുതിയ പട്ടികയുമായി സര്‍ക്കാര്‍ രംഗത്തെത്തി. കാണാതായത് 300 പേരെന്നും മരണണമടഞ്ഞത് 60 ഇനിയും തിരച്ചറിയുവാനുള്ളത് 40 പേരുമാണുള്ളത്. 

തിരുവനന്തപുരം ജില്ലയില്‍ നിന്നും 255 പേരെയും കൊല്ലം എറണാകുളം ജില്ലകളില്‍ നിന്നും 45 കാണാതായിരിക്കുന്നത്. പോലീസും ഫിഷറീസും ദുരന്തനിവാരണ വകുപ്പുമാണ് പുതിയ കണക്ക് പുറത്ത് വിട്ടിട്ടുള്ളത്. 

പുതിയ കണക്ക് പ്രകാരം 60 പേര്‍ ആണ് മരിച്ചിട്ടുള്ളത്. ഇതില്‍ 40 മൃതദേഹങ്ങള്‍ തിരിച്ചറിയേണ്ടതുണ്ടെന്നും പറയുന്നു. മരണം 70 കവിഞ്ഞുവെന്നാണ് അനൗദ്യോഗിക കണക്ക്. തമിഴ്‌നാട്ടില്‍ നിന്നും 14 പേരാണ് മരിച്ചിരിക്കുന്നത്. ഇതില്‍ രണ്ടുപേര്‍ ഇലക്ട്രിക് ഷോക്കേറ്റും മൂന്നുപേര്‍ മരം വീണും ഒരാള്‍ ഹൃദയാഘാതം മൂലവുമാണ് മരണപ്പെട്ടത്. ഓഖി ആഞ്ഞടിച്ച നവംബര്‍ 30 മുതല്‍ ഇന്നലെ വരെ പോലീസ്, റവന്യൂ, ദുരന്തനിവാരണ അതോറിട്ടി എന്നിവ വഴി ശേഖരിച്ച വിവരങ്ങളുടെ അടിസ്ഥാനത്തിലാണ് റിപ്പോര്‍ട്ട്. അതേസമയം, രണ്ടാഴ്ച കഴിഞ്ഞിട്ടും ദുരിതബാധിതരുടെ എണ്ണത്തില്‍ കൃത്യമായ വിവരങ്ങള്‍ സര്‍ക്കാരിന്റെ ഭാഗത്തില്ലെന്ന് ആക്ഷേപവുമുണ്ട്.

കോഴിക്കോടു നിന്നും രണ്ട് മത്സ്യത്തൊഴിലാളികളുടെ മുതദേഹങ്ങള്‍ കൂടി കണ്ടെത്തി. ബേപ്പൂര്‍ ഭാഗത്ത് പുറംകടലില്‍ 40 നോട്ടിക്കല്‍ അകലെനിന്നാണു മൃതദേഹങ്ങള്‍ കിട്ടിയത്. ഇതോടെ കോഴിക്കോട് ഭാഗത്തുനിന്ന് ലഭിച്ച മൃതദേഹങ്ങളൂടെ എണ്ണം 21 ആയി. കഴിഞ്ഞ ദിവസങ്ങളില്‍ ലഭിച്ച 19 മൃതദേഹങ്ങളും മെഡിക്കല്‍ കോളജ് ആശുപത്രിയിലെ മോര്‍ച്ചറിയില്‍ സൂക്ഷിച്ചിരിക്കുകയാണ്. 

കടലില്‍നിന്ന് ലഭിച്ച മൃതദേഹങ്ങളുടെ സാമ്പിളുകള്‍ ഡി.എന്‍.എ. പരിശോധനയ്ക്കയച്ചു. പൊന്നാനിയിലെ ആഴക്കടലില്‍നിന്ന് ലഭിച്ച മൂന്നു മൃതദേഹങ്ങളുടെ സാമ്പിളുകളാണ് ഡി.എന്‍.എ. ടെസ്റ്റിനായി ആര്‍.ഡി.ഒ. മുഖാന്തിരം തിരുവനന്തപുരത്തേക്കയച്ചത്.