ക്രിക്കറ്റ് മത്സരത്തിനിടെ കുഴഞ്ഞുവീണ് മരിച്ച പത്മനാഭന്റെ അന്ത്യവിശ്രമം അയല്‍വാസി ലത്തീഫിന്റെ മണ്ണില്‍. വര്‍ഗീയതയുടെ പേരില്‍ മനുഷ്യര്‍ തമ്മിലടിക്കുമ്പോഴാണ് കാസര്‍കോട്ട് നിന്നൊരു മതസൗഹാര്‍ദ്ദ മാതൃക. മഞ്ചേശ്വരത്ത് അണ്ടര്‍ ആം ക്രിക്കറ്റ് ടൂര്‍ണമെന്റിനിടെ ശനിയാഴ്ചയാണ് 20 കാരനായ പത്മനാഭന്‍ ഹൃദയാഘാതത്തെ തുടര്‍ന്ന് മരിക്കുന്നത്.

യുവാവിന്റെ മൃതദേഹം സംസ്‌കരിക്കാന്‍ സ്ഥലമില്ലാത്തതിനെ തുടര്‍ന്ന് അയല്‍വാസിയും പൊതു പ്രവര്‍ത്തകനുമായ ലത്തീഫ്, തന്റെ പറമ്പില്‍ സംസ്‌കാരത്തിന്‌സൗകര്യമൊരുക്കുകയായിരുന്നു. അന്യമത വിദ്വേഷം പടരുന്ന കാലത്ത് മതസൗഹാര്‍ദ്ദത്തിന്റെ ഉദാത്ത മാതൃക കാട്ടുകയായിരുന്നു ലത്തീഫ്.

ഉപ്പള സ്വദേശി നാരായണചന്ദ്രാവതി ദമ്പതികളുടെ മകനാണ് ഈ 20 കാരന്‍. നിര്‍ധന കുടുംബമാണ് ഇവരുടേത്. ആകെ 4 സെന്റ് ഭൂമിയാണ് ഈ കുടുംബത്തിനുള്ളത്. വീടും ശുചിമുറിയും ഉള്‍പ്പെടെയാണിത്. സംസ്‌കാരത്തിന് സ്ഥലപരിമിതിയുടെ വിഷമത നേരിടുമ്പോഴാണ് ലത്തീഫ് സഹായ ഹസ്തവുമായി രംഗത്തെത്തിയത്.

മൃതദേഹം തന്റെ പറമ്പില്‍ സംസ്‌കരിക്കാമെന്ന് ഇയാള്‍ വ്യക്തമാക്കി. ഇതാദ്യമായല്ല ലത്തീഫ് ഈ കുടുംബത്തിന് നേര്‍ക്ക് കരുണയുടെ കരങ്ങള്‍ നീട്ടുന്നത്. പത്മനാഭയുടെ അമ്മ ചന്ദ്രാവതി മരിച്ചപ്പോഴും സംസ്‌കരിച്ചത് ലത്തീഫിന്റെ ഭൂമിയിലാണ്.

മൊബൈല്‍ ടെക്‌നീഷ്യനായ പത്മനാഭന് ക്രിക്കറ്റ് എന്നും ഹരമായിരുന്നു. ചെറുപ്പം തൊട്ടേ ഹൃദ്രോഗം പത്‌നാഭനെ അലട്ടിയിരുന്നു. മിയാപദവ് സ്‌കൂള്‍ ഗ്രൗണ്ടിലെ മത്സരത്തിനിടെയാണ് ശാരീരികാസ്വാസ്ഥ്യമുണ്ടായത്.ദേരംബാല ടീമിനുവേണ്ടിയാണ് പത്മനാഭന്‍ കളിക്കിറങ്ങിയത്.

ഓവറിലെ അവസാന പന്ത് എറിയാന്‍ തുടങ്ങവെ ഇയാള്‍ തളര്‍ന്നുവീഴുകയായിരുന്നു. ഉടന്‍ അധികൃതര്‍ യുവാവിനെ ആശുപത്രിയിലേക്ക് കൊണ്ടുപോയെങ്കിലും മരണം സംഭവിച്ചിരുന്നു. ഭാര്യയും മകനും പോയതോടെ അനാഥനാക്കപ്പെട്ട 55 കാരനായ നാരായണ ഒരു നാടിന്റെ നൊമ്പരമായി മാറിയിരിക്കുകയാണ്.