നാടിനെ നടുക്കിയ കൊച്ചിയിലെ വന് കവര്ച്ചകള്ക്കു പിന്നില് മഹാരാഷ്ട്രയിലെ കുപ്രസിദ്ധമായ പിംബ്ലെ കവര്ച്ചാ സംഘത്തില്പെട്ടവര്
കൊച്ചിയിലെ വന്കവര്ച്ചകള്ക്കു പിന്നില് പോലീസ് സംശയിക്കുന്ന വികാസ് ഗോഡാജി ചൗഹാനും കൂട്ടരും മഹാരാഷ്ട്രയിലെ കുപ്രസിദ്ധമായ പിംബ്ലെ കവര്ച്ചാസംഘത്തില്പെട്ടവര്. രാജ്യം സ്വാതന്ത്ര്യം നേടുന്നതിനു മുമ്പ് തീവണ്ടിക്കൊള്ളയായിരുന്നു ഇവരുടെ പ്രധാനതൊഴില്.
കൊള്ളയുടെ ഭാഗമായി ബലാത്സംഗവും കൊലപാതകവും പതിവാക്കിയിരുന്നെങ്കിലും ഒരിക്കല് നാട്ടുകാര് കൈകാര്യം ചെയ്തശേഷം രണ്ടും നിര്ത്തി. വികാസ് ചൗഹാന്റെ ഉറ്റഅനുയായി ശൈല (രാജു) കൊടും ക്രിമിനലാണ്. ഏഴുവര്ഷമായി ജയിലില് കഴിയുന്ന വികാസ് അടുത്തിടെ മോചിതനായോ എന്നു വ്യക്തമായിട്ടില്ല. കേരളത്തിലെ എല്ലാ ജില്ലകളെക്കുറിച്ചും വ്യക്തമായ ധാരണ ഇവര്ക്കുണ്ട്.
സംഘത്തെ മുമ്പു പിടികൂടിയതു കണ്ട്രോള് റൂം എ.സി: സുരേഷ്കുമാറും കണ്ണൂര് ഡിവൈ.എസ്.പി: സദാനന്ദനുമാണ്. വീടിന്റെ മുന്വശത്തെ ജനലിന്റെ ഗ്രില് ഇളക്കിമാറ്റി അകത്തുകടക്കുകയാണു സംഘത്തിന്റെ രീതി. വീട്ടുകാരെ ഉപദ്രവിക്കാന് മടിയില്ല. ഇരകളെ ബന്ധിച്ച് വായില് സെലോടേപ്പ് ഒട്ടിക്കുകയോ തുണി തിരുകുകയോ ചെയ്യും.
കൊച്ചിയില് മോഷണം നടത്തിയ വീട്ടില് ഇവര് രണ്ടുമണിക്കൂര് ചെലവഴിച്ചതായി പോലീസിനു വിവരം ലഭിച്ചു. റെയില്വേ ട്രാക്കിന്റെ പരിസരത്തു കഴിയുന്നവരാണു കവര്ച്ചയ്ക്കിരയായത്. സംഘം ഹിന്ദിയാണു സംസാരിച്ചതെന്നു വീട്ടുകാര് മൊഴി നല്കിയിട്ടുണ്ട്.
തിരുവനന്തപുരം നഗരത്തിലെ കണ്ണമ്മൂലയിലും വര്ഷങ്ങള്ക്കു മുമ്പ് കണ്ണൂര്, വടകര എന്നിവിടങ്ങളിലും സംഘം എത്തിയിരുന്നു. 2009-ലാണ് തലസ്ഥാനനഗരിയിലെ സോഫ്റ്റ്വേര് എന്ജിനീയറുടെ വസതിയില് ഇവര് കവര്ച്ച നടത്തിയത്. തീവണ്ടികളില് സഞ്ചരിച്ച് വീടുകള് കണ്ടെത്തി മോഷണം നടത്തുകയാണു പതിവ്. തീവണ്ടിപ്പാതയ്ക്കു സമീപമുള്ള വീടുകളാണു പ്രധാന ഉന്നം.
https://www.facebook.com/Malayalivartha
