അനൂപ് വധക്കേസ്; ഒന്നാം പ്രതി അനൂപ്ഖാന് 25 വര്ഷം കഠിനതടവ്
നെട്ടയം അനൂപ് വധക്കേസില് ഒന്നാം പ്രതി അനൂപ്ഖാന് 25 വര്ഷം കഠിനതടവ്. രണ്ടാം പ്രതി ബിനുവിന് 20 വര്ഷം കഠിന തടവും മൂന്നാം പ്രതി അജയന് ജീവപര്യന്തം കഠിന തടവും ശിക്ഷ. കൊല്ലം പ്രിന്സിപ്പല് സെഷന്സ് കോടതി ജഡ്ജി ഇ.എം മുഹമ്മദ് ഇബ്രാഹിം ആണ് ശിക്ഷ വിധിച്ചത്. ഇന്ത്യന് ശിക്ഷാ നിയമം 304,34 (പൊതുവായ ഉദ്ദേശ്യത്തോടെയുള്ള കുറ്റകൃത്യം) എന്നീ വകുപ്പുകള് പ്രകാരമാണ് ശിക്ഷ വിധിച്ചത്. കൊലപാതകത്തെ അപൂര്വങ്ങളില് അപൂര്വമായി പരിഗണിച്ച് ഒന്നാം പ്രതി അനൂപ് ഖാന് വധശിക്ഷ നല്കണമെന്ന് പ്രോസിക്യൂഷന് വാദിച്ചിരുന്നു.
അനുപ്ഖാന് തുടര്ച്ചയായ 25 വര്ഷത്തെ ജയില് ശിക്ഷയും 50,000രൂപ പിഴയും രണ്ടാം പ്രതി ബിനുവിന് തുടര്ച്ചയായ 20 വര്ഷത്തെ ജയില് ശിക്ഷയും 25,000 രൂപ പിഴയും മൂന്നാം പ്രതി അജയന് ജീവപര്യന്തം കഠിന തടവുമാണ് കോടതി ശിക്ഷ വിധിച്ചത്. മിനിലോറി ഉടമയായ പള്ളിക്കല് നെട്ടയം മുതിയക്കോണം മേലേവിള വീട്ടില് അനൂപിനെ(30)യാണ് പ്രതികള് കൊലപ്പെടുത്തിയത്.
2010 ജൂലൈ എട്ടിനാണ് കേസിനാസ്പദമായ സംഭവം. അനൂപിന്റെ സുഹൃത്തായ കമറുദ്ദീനും പ്രതി ബിനുവുമായുണ്ടായ വഴക്കിനെ തുടര്ന്നുള്ള വൈരാഗ്യമാണ് കൊലപാതകത്തില് കലാശിച്ചത്. പ്രതികള് എരപ്പന്ചിറ എന്ന സ്ഥലത്തുള്ള കുളത്തില് നിന്ന് മത്സ്യം പിടിച്ച് കപ്പയും വാങ്ങി പാചകം ചെയ്ത് മദ്യപാനം നടത്തിയത് സമീപവാസിയായ കമറുദ്ദീന് ചോദ്യം ചെയ്തതാണ് സംഭവത്തിന് തുടക്കം. സംഘര്ഷത്തിന്റെ തുടര്ച്ചയായി പ്രതികള് ആയുധവുമായി ജംഗ്ഷനില് കാത്തുനില്ക്കുമ്പോള് ഇതറിയാതെ അനൂപ് ജംഗ്ഷനില് മിനിലോറിയില് വന്നിറങ്ങുകയായിരുന്നു.
മൂര്ച്ചയുള്ള വാളും ചെയിനും ഉപയോഗിച്ച് അനൂപിനെ വെട്ടിയും കുത്തിയും കൊലപ്പെടുത്തുകയായിരുന്നു. ഒന്നാംപ്രതിയായ അനൂപ്ഖാന് കൊട്ടാരക്കരയില് ബാര് ജീവനക്കാരന് ഗോപകുമാറിനെ കൊലപ്പെടുത്തിയ കേസില് ജീവപര്യന്തം ശിക്ഷ അനുഭവിച്ചുവരികയാണ്. കുളത്തൂപ്പുഴയില് ഗ്രാമപഞ്ചായത്ത് ജീവനക്കാരന് സജാദിനെ ബൈക്ക് തടഞ്ഞുനിര്ത്തി കുത്തികൊലപ്പെടുത്തിയ കേസിലും ഇയാള് പ്രതിയാണെങ്കിലും സംശയത്തിന്റെ ആനുകൂല്യം നല്കി കോടതി വിട്ടയച്ചിരുന്നു. ഈ കേസില് പൊലീസ് ഹൈക്കോടതിയില് അപ്പീല് നല്കിയിട്ടുണ്ട്.
2010 നവംബര്, ഡിസംബര് മാസങ്ങളിലായിരുന്നു ഈ കൊലപാതകങ്ങള്.ചാത്തന്നൂര് ഡിവൈഎസ്പിയായിരുന്ന ബി.കൃഷ്ണകുമാറാണ് കേസ് അന്വേഷിച്ചത്. പ്രോസിക്യൂഷനുവേണ്ടി ജില്ലാ ഗവ. പ്ലീഡറും പബ്ലിക് പ്രോസിക്യൂട്ടറുമായ അഡ്വ. ആര് സേതുനാഥ് കോടതിയില് ഹാജരായി. കൊല്ലപ്പെട്ട അനൂപിന്റെ മാതാവ് ശ്യാമളഅമ്മ, ഭാര്യ ശാരിക എന്നിവര് വിധി കേള്ക്കാന് കോടതിയിലെത്തിയിരുന്നു. പ്രതികള്ക്ക് ലഭിച്ച ശിക്ഷയില് സന്തോഷമുണ്ടെന്ന് അമ്മ ശ്യാമള പറഞ്ഞു. വധശിക്ഷ ലഭിക്കണമെന്നായിരുന്നു ആഗ്രഹമെന്നും എന്നാല് കോടതി വിധിയില് സംതൃപ്തിയുണ്ടെന്നും അനൂപിന്റെ ഭാര്യ ശാരികയും പ്രതികരിച്ചു.
പഴുത് കിട്ടിയാല് ഒന്നാം പ്രതി അനൂപ് ഖാന് രക്ഷപ്പെടുമെന്ന ഇന്റലിജന്സ് റിപ്പോര്ട്ടിന്റെ അടിസ്ഥാനത്തില് കനത്ത സുരക്ഷയിലാണ് മൂന്ന് പ്രതികളെയും കോടതിയില് ഹാജരാക്കിയതും തിരികെ ജയിലിലേക്ക് കൊണ്ട് പോയതും. വിധി കേള്ക്കാന് വന് ജനകൂട്ടമാണ് കോടതി വരാന്തയില് എത്തിയത്.
https://www.facebook.com/Malayalivartha
