സ്ത്രീകളെ കുറിച്ച് മസാല കഥകള് കേട്ടല്ല മനസിലാക്കേണ്ടത്...സ്ത്രീകളുടെ ആര്ത്തവത്തെക്കുറിച്ച് ഒരു യുവാവിന്റെ പ്രസംഗം; വീഡിയോ വൈറലാകുന്നു
എറണാകുളം സെന്റ് തെരെസാസ് കോളജിലെ നൂറു കണക്കിന് പെണ്കുട്ടികളുടെ ഇടയില് ആര്ത്തവത്തെ കുറിച്ച് ജോസഫ് അന്നംകുട്ടി ജോസ് എന്ന ചെറുപ്പക്കാരന് നടത്തിയ പ്രസംഗമാണ് ഇപ്പോള് സമൂഹ മാധ്യമങ്ങള് ആഘോഷിച്ചുകൊണ്ടിരിക്കുന്നത്. എറണാകുളം സെന്റ് തെരേസാസ് കോളെജിലെ സ്റ്റെയ്ന് ദി സിഗ്മ എന്ന പരിപാടി ഉദ്ഘാടനം ചെയ്തുകൊണ്ടാണ് റേഡിയോ ജോക്കിയും മോട്ടിവേഷണല് സ്പീക്കറുമായ ജോസഫ് അന്നംകുട്ടി ജോസ് ആര്ത്തവത്തെക്കുറിച്ച് പറഞ്ഞത്.
അമ്മ പറഞ്ഞുകൊടുത്ത കാര്യങ്ങളാണ് ജോസഫ് കുട്ടികളുടെ മുന്പില് പ്രസംഗമായി അവതരിപ്പിച്ചത്. സ്ത്രീകളെ കുറിച്ച് മസാല കഥകള് കേട്ടല്ല മനസിലാക്കേണ്ടതെന്നു അമ്മ പറയാറുണ്ടെന്ന് ജോസഫ് പറഞ്ഞു. കൗമാര പ്രായം മുതല് സ്ത്രീകളുടെ പൊക്കിള് കൊടി സെക്സ് സിമ്പലായി കാണുന്നവര് ഓരോ മക്കള്ക്കും അമ്മയുമായുള്ള പൊക്കിള് കൊടി ബന്ധം മറന്നു പോകരുതെന്നും ഓര്മ്മിപ്പിച്ചു.
അമ്മയാകാന് പെണ്കുട്ടികളെ പ്രകൃതി തന്നെ ഒരുക്കുന്നതിന്റെ ഭാഗമാണ് ആര്ത്തവം. മറ്റുളളവരില് നിന്നും ആര്ത്തവത്തെ സൗകര്യപൂര്വ്വം മറച്ചു പിടിക്കുന്നവരാണ് പല സ്ത്രീകളും. ആര്ത്തവത്തെ മറച്ചു പിടിക്കുകയല്ല വേണ്ടതെന്നും ഇത് തുറന്നു സംസാരിക്കാന് സ്ത്രീകള് തയ്യാറാകണമെന്നും ജോസഫ് പറയുന്നു.
സ്ത്രീകളെ ബഹുമാനിക്കേണ്ട ആവശ്യകതയെ കുറിച്ച് ജോസഫ് പോസ്റ്റ് ചെയ്ത വീഡിയോകള്ക്കെല്ലാം സമൂഹമാധ്യമങ്ങളില് വന് പ്രചാരമാണ് ലഭിച്ചത്. കുഞ്ഞിലേ തൊട്ട് നമ്മുടെ ആണ്കുട്ടികള് സ്ത്രീകളെ ബഹുമാനിക്കേണ്ടതിന്റെയും സഹജീവിയെന്ന നിലയ്ക്ക് അവളെ സ്നേഹിക്കേണ്ടതിന്റെയും ബാലപാഠങ്ങള് പകര്ന്നു കൊടുത്താല് ഒരുപരിധി വരെ ഇത്തരം ആക്രമണങ്ങള് ചെറുക്കാനായേക്കാമെന്ന് ജോസഫ് പറയുന്നു. സ്ത്രീകള്ക്കെതിരെയുള്ള ആക്രമണങ്ങളെ തടയാന് ആദ്യം സമൂഹം മാറട്ടെ എന്നു കാത്തിരിക്കുകയല്ല വേണ്ടത്, അവനവനില് തുടങ്ങേണ്ടതാണ് മാറ്റമെന്നും ജോസഫ് പറയുന്നു.
തന്റെ ഇരുപത്തിയേഴാമത്തെ വയസില് ആത്മകഥ എഴുതിയാണ് ജോസഫ് അന്നം കുട്ടി ജോസ് എന്ന ചെറുപ്പക്കാരന് വാര്ത്തകളില് ഇടം നേടിയത്. സ്ത്രീപക്ഷത്ത് നിന്നു കൊണ്ട് ജോസഫ് സമൂഹമാധ്യമങ്ങളില് പോസ്റ്റ് ചെയ്ത വീഡിയോകള് യു ട്യൂബില് ആളെ കൂട്ടി. ലൈംഗികതയെ കുറിച്ചും ലിംഗ സമത്വത്തെ കുറിച്ചും ജോസഫ് കുറിച്ചിട്ട വരികളും വീഡിയോയും സമൂഹ മാധ്യമങ്ങള് നിറഞ്ഞ കയ്യോടിയോടു കൂടെയാണ് ഏറ്റെടുത്തത്.
https://www.facebook.com/Malayalivartha
