കാറിന് സൈഡ് നല്കിയില്ലെന്നാരോപിച്ച് അരയ്ക്ക് താഴെ തളർന്നയാളെ അയൽവാസി മർദ്ദിക്കുകയും അസഭ്യം പറയുകയുംചെയ്തു. സംഭവത്തിൽ തൊടുപുഴ കാളിയാർ വട്ടക്കുന്നേൽ മഞ്ജുഷിനാണ് മർദനമേറ്റത്. വെള്ളിയാഴ്ച വൈകുന്നേരം വണ്ടമറ്റത്ത് റോഡിൽ കൂട്ടുകാരെ കണ്ട് കാർ നിർത്തി സംസാരിച്ചു കൊണ്ടിരിക്കുകയായിരുന്ന മഞ്ജുഷിനെ പിറകെ കാറിൽ വന്ന അയൽവാസി ഷൈജോ സൈഡ് നൽകിയില്ലെന്നാരോപിച്ച് അടിക്കുകയായിരുന്നു.

മർദനത്തെത്തുടർന്ന് അവശനായ മഞ്ജുഷിനെ നാട്ടുകാരാണ് ആശുപത്രിയിലെത്തിച്ചത്. അഞ്ച് വർഷം മുൻപുണ്ടായ അപകടത്തിൽ അരയ്ക്ക് താഴെ തളർന്നതിനാൽ കൈകൾ കൊണ്ട് പ്രവർത്തിപ്പിക്കാവുന്ന കാറാണ് മഞ്ജുഷ് ഉപയോഗിച്ചിരുന്നത്. മഞ്ജുഷിന്റെ പരാതിയെത്തുടർന്ന് കാളിയാർ പോലീസ് കേസെടുത്തു.