പാതയോരങ്ങളിലെ മദ്യനിരോധനത്തില്‍ കേരളത്തിലെ പഞ്ചായത്തുകളെകൂടി ഒഴിവാക്കണമെന്നാവശ്യപ്പെട്ട് സംസ്ഥാനസര്‍ക്കാര്‍ സുപ്രീംകോടതിയെ സമീപിച്ചു. ദേശീയസംസ്ഥാന പാതയോരങ്ങളില്‍ നിന്ന് 500 മീറ്റര്‍ ദൂരപരിധിയിലുള്ള മദ്യശാലകള്‍ പൂട്ടണമെന്ന വിധിയില്‍ നിന്ന് നഗരസഭകളെ ഒഴിവാക്കിയതിന് ശേഷമാണ് പഞ്ചായത്തുകളെകൂടി ഒഴിവാക്കണമെന്ന ആവശ്യവുമായി കേരള സര്‍ക്കാര്‍ എത്തിയത്. പാതയോര മദ്യനിരോധനം പൂര്‍ണമായും അട്ടിമറിക്കാനാണ് പുതിയ നീക്കം. ദേശീയ സംസ്ഥാന പാതയോരങ്ങളില്‍ നിന്ന് 500 മീറ്റര്‍ ദൂരപരിധിയിലുള്ള മദ്യശാലകള്‍ പൂട്ടണമെന്ന വിധിയില്‍ നിന്ന് പഞ്ചായത്തുകളെ ഒഴിവാക്കണമെന്നാവശ്യപ്പെട്ട് അസം സര്‍ക്കാര്‍ സമര്‍പ്പിച്ച ഹരജിയില്‍ സമര്‍പ്പിച്ച സത്യവാങ്മൂലത്തിലാണ് കേരളവും ഇതേ ആവശ്യമുന്നയിച്ചത്.

പാതയോര മദ്യനിരോധനഉത്തരവ് കേരളത്തിന്റെ വിനോദ സഞ്ചാരമേഖലയെ തകര്‍ത്തെന്നും വരുമാനത്തില്‍ ഇടിവ് വരുത്തിയെന്നും സത്യവാങ്മൂലത്തില്‍ പറയുന്നു. വിനോദസഞ്ചാരമാണ് കേരളത്തിന് ഏറ്റവുമധികം വരുമാനം നല്‍കുന്നത്. 
കോണ്‍ഫറന്‍സുകള്‍, എക്‌സിബിഷനുകള്‍, യോഗങ്ങള്‍ എന്നിവക്കായി കേരളത്തിലെ ഹോട്ടലുകളിലേക്കും കണ്‍വെന്‍ഷന്‍ സന്റെറുകളിലേക്കും വരുന്ന വിദേശികള്‍ക്ക് മദ്യം ഒഴിച്ചുകൂടാനാവാത്തതാണ്. പാതയോര മദ്യനിരോധനത്തോടെ ഇതിന് ബുദ്ധിമുട്ടായെന്നും വിനോദസഞ്ചാരമേഖല കടുത്ത പ്രതിസന്ധിയിലായെന്നും സത്യവാങ്മൂലത്തിലുണ്ട്. 

കേരളത്തിലെ പ്രധാന വിനോദസഞ്ചാരകേന്ദ്രങ്ങളായ കുമരകം, മൂന്നാര്‍, ബേക്കല്‍, തേക്കടി, കുമളി, ചെറായി എന്നിവയെല്ലാം പഞ്ചായത്തുകളിലാണെന്നും വിനോദസഞ്ചാരവികസനത്തിനായി ഇവിടങ്ങളിലെ റോഡുകള്‍ സംസ്ഥാന, ദേശീയപാതകളായി ഉയര്‍ത്തിയിട്ടുണ്ടെന്നും കേരളം ബോധിപ്പിച്ചു. ബിയര്‍, വൈന്‍, കള്ള് എന്നിവ ദേശീയസംസ്ഥാന പാതയോരങ്ങളില്‍ വില്‍ക്കുന്നതിനും അനുമതി തേടിയിട്ടുണ്ട്.