നിരക്ഷരരില്ലാത്ത ജയില്‍ എന്ന ലക്ഷ്യത്തോടെ സംസ്ഥാന സാക്ഷരത മിഷന്‍ നടപ്പാക്കുന്ന 'ജയില്‍ ജ്യോതി'പദ്ധതിയുടെ ഭാഗമായി സംസ്ഥാനത്തെ വിവിധ ജയിലുകളില്‍ 297പേര്‍ പരീക്ഷയെഴുതി. തിരുവനന്തപുരം ജില്ലയിലാണ് ഏറ്റവും കൂടുതല്‍ പേര്‍ പരീക്ഷയെഴുതിയത്121. ഇതില്‍ ഏഴുപേര്‍ സ്ത്രീകളാണ്. തിരുവനന്തപുരം പൂജപ്പുര സെന്‍ട്രല്‍ ജയിലില്‍ 59, വനിതാജയിലില്‍ ഏഴ്, സ്‌പെഷല്‍ ജയിലില്‍ 30, ജില്ല ജയിലില്‍ 25 എന്നിങ്ങനെയാണ് പരീക്ഷയെഴുതിയവരുടെ എണ്ണം. തിരുവനന്തപുരം കൂടാതെ സ്ത്രീ തടവുകാര്‍ പരീക്ഷയെഴുതിയത് എറണാകുളം ജില്ലയിലാണ്. ഇവിടെ മൊത്തം പരീക്ഷയെഴുതിയ ഒമ്പതുപേരില്‍ രണ്ടുപേര്‍ സ്ത്രീകളാണ്. പൂജപ്പുര സെന്‍ട്രല്‍ ജയിലില്‍ പരീക്ഷയെഴുതിയ തടവുകാരില്‍ രണ്ടുപേര്‍ ബിഹാര്‍ സ്വദേശികളാണ്.

സംസ്ഥാനത്ത് മറ്റ് ജില്ലകളിലെ ജയിലുകളില്‍ പരീക്ഷയെഴുതിയവരുടെ എണ്ണം ബ്രാക്കറ്റില്‍: കോട്ടയം (13), തൃശൂര്‍ (25), പാലക്കാട് (29), മലപ്പുറം (30), കണ്ണൂര്‍ (15), കാസര്‍കോട് (33), വയനാട് (22). വായന, എഴുത്ത്, കണക്ക് എന്നിങ്ങനെ മൂന്ന് വിഭാഗങ്ങളെ ആസ്പദമാക്കി മൊത്തം 100 മാര്‍ക്കിനായിരുന്നു പരീക്ഷ. 30 മാര്‍ക്കാണ് വിജയിക്കാന്‍ വേണ്ടത്. വായനക്ക് 30 മാര്‍ക്കില്‍ ഒമ്പത്, എഴുത്തിന് 40 മാര്‍ക്കില്‍ 12, കണക്കിന് 30 മാര്‍ക്കില്‍ ഒമ്പത് എന്നിങ്ങനെയാണ് പാസ്മാര്‍ക്ക്.

പൂജപ്പുര സെന്‍ട്രല്‍ ജയിലില്‍ നടന്ന പരീക്ഷയില്‍ ദക്ഷിണമേഖല ജയില്‍ ഡി.ഐ.ജി ബി. പ്രദീപ് ഏറ്റവും പ്രായം കൂടിയ പഠിതാവ് ചന്ദ്രന് (75) ചോദ്യപേപ്പര്‍ നല്‍കി ഉദ്ഘാടനം ചെയ്തു. സാക്ഷരത മിഷന്‍ അസി. ഡയറക്ടര്‍ ഡോ.ജെ. വിജയമ്മ അധ്യക്ഷത വഹിച്ചു. സംസ്ഥാന സാക്ഷരത മിഷനും ജയില്‍ വകുപ്പും സംയുക്തമായാണ് പദ്ധതി നടപ്പാക്കുന്നത്. ജയില്‍ ജ്യോതിയുടെ ഭാഗമായി വിവിധ ജയിലുകളില്‍ നേരത്തേ 60പേര്‍ നാലാംതരം തുല്യത എഴുതിയിരുന്നു.