തൃപ്പുണിത്തുറ കുമ്പളം കായലിനോട് ചേര്‍ന്ന് കഴിഞ്ഞ ജനുവരി 7ന് പ്ലാസ്റ്റിക്ക് വീപ്പയില്‍ കൊല ചെയ്യപ്പെട്ട് കോണ്‍ക്രിറ്റ് ചെയ്ത നിലയില്‍ കണ്ടത് തൃപ്പുണിത്തുറ സ്വദേശിനി ശകുന്തളയുടേത് തന്നെയെന്ന് സ്ഥിരീകരിച്ചു.

തലകീഴായി കാലുകള്‍ പുറകിലേക്ക് കെട്ടി, കൈകള്‍ മടക്കി വീപ്പയില്‍ കയറ്റിയ ശേഷം കോണ്‍ക്രീറ്റ് ഇട്ട് ഉറപ്പിച്ച നിലയിലായിരുന്നു മൃതദേഹം. ഒരു വര്‍ഷത്തിലേറെ പഴക്കമുണ്ടായിരുന്ന അസ്ഥികൂടത്തെ കുറിച്ചുള്ള അന്വേഷണമാണ് ഉദയംപേരൂര്‍ മാങ്കായി കവല തേരേയ്ക്കല്‍ കടവില്‍ തേരേയ്ക്കല്‍ വീട്ടില്‍ ദാമോദരന്റെ ഭാര്യ കെ.എസ് ശകുന്തള (54) ആണെന്ന് ഉറപ്പായത്. മകള്‍ അശ്വതിയുടെ ഡി.എന്‍.എ ഫലം കിട്ടിയതോടെയാണ് ഔദ്യോഗിക സ്ഥിരീകരണം ഉണ്ടായത്.

ഉദയംപേരൂര്‍ വലിയകുളത്തിന് സമീപം പരേതയായ സരസയുടെ വളര്‍ത്ത് മകളായിരുന്നു ശകുന്തള. ദാമോദരനെ പ്രണയിച്ചാണ് വിവാഹം കഴിച്ചത്. ഈ ബന്ധം അധികം നീണ്ടുനിന്നില്ല. തുടര്‍ന്ന് മകനും മകളുമൊത്ത് വാടക വീടുകളില്‍ മാറി മാറി താമസിച്ചു വന്നിരുന്നു. മകന്‍ പ്രമോദ് ബൈക്ക് അപകടത്തില്‍പ്പെട്ട് കിടപ്പിലായതിനു ശേഷം ആത്മഹത്യ ചെയ്തു. ഇതിനിടെ മകളുമായി പിണങ്ങി ഒറ്റയ്ക്കായിരുന്നു ശകുന്തളയുടെ താമസം. മകന്റെയും ശകുന്തളയുടെയും അപകടത്തെ തുടര്‍ന്ന് ലക്ഷക്കണക്കിന് ഇന്‍ഷുറന്‍സ് തുക ശകുന്തളയ്ക്ക് ലഭിച്ചിരുന്നു. കൂടാതെ, പെരുമ്ബാവൂരിലെ 3 സെന്റ് സ്ഥലം 2013ല്‍ വിറ്റ പണവും ഇവരുടെ പക്കല്‍ ഉണ്ടായിരുന്നു. പണത്തെ ചൊല്ലിയുണ്ടായ കൊലപാതകമാകാം ഇതെന്നാണ് പൊലീസിന്റെ അനുമാനം. വീപ്പ കണ്ടെത്തിയതിന് പിറ്റേന്ന് ശകുന്തളയുടെയും മകള്‍ അശ്വതിയുടെയും സുഹൃത്തായിരുന്ന എരൂര്‍ സ്വദേശിയുടെ മരണവുമായി ഈ സംഭവത്തിന് ബന്ധമുണ്ടെന്ന സംശയവും ബലപ്പെടുന്നു. ഒന്നര വര്‍ഷം മുന്‍പ് കെ.എസ് ശകുന്തള ഇയാളുടെ കാറില്‍ കയറി പോയിട്ടുണ്ടെന്ന് മകള്‍ പൊലീസിന് മൊഴി നല്‍കിയതായി അറിയുന്നു. ശകുന്തളയുടെ കൊലപാതകികളെ കുറിച്ച്‌ വ്യക്തമായ സൂചന ലഭിച്ചതായാണ് അന്വേഷണ സംഘം നല്‍കുന്ന വിവരം.

ജനുവരി ഏഴിന് കുമ്പളം കായലിനോട് ചേര്‍ന്ന ഒഴിഞ്ഞ പറമ്ബില്‍ വീപ്പയില്‍ കോണ്‍ക്രീറ്റിട്ട് ഉറപ്പിച്ച നിലയില്‍ കണ്ടെത്തിയ മൃതദേഹത്തിന് ഒരു വര്‍ഷത്തിലേറെ പഴക്കമുണ്ടായിരുന്നു മൃതദേഹത്തിന്റെ തലയോട്ടിയും അസ്ഥികളും മാത്രമേ അവശേഷിച്ചിരുന്നുള്ളു. കണങ്കാലിലെ അസ്ഥിയില്‍ ശസ്ത്രക്രിയ ചെയ്ത് ഘടിപ്പിച്ച പിരിയാണിയുടെ ബാച്ച്‌ നമ്ബര്‍ കേന്ദ്രീകരിച്ച്‌ നടത്തിയ അന്വേഷണമാണ് കെ.എസ് ശകുന്തളയിലേക്ക് എത്തിച്ചേര്‍ന്നത്. 2 വര്‍ഷം മുന്‍പ് സ്കൂട്ടര്‍ അപകടത്തില്‍ ശകുന്തളയ്ക്ക് കാലിന് പരിക്കേറ്റിരുന്നു. തുടര്‍ന്ന് തൃപ്പൂണിത്തുറ വിജയകുമാരമേനോന്‍ ആശുപത്രിയില്‍ ചികിത്സ തേടിയപ്പോഴാണ് സമാനമായ സ്ക്രൂ ഇവരില്‍ ഘടിപ്പിച്ചത്.