കൊച്ചിയില്‍നിന്ന് കണ്ടെയ്നറുമായി സിംഗപ്പൂരിലേക്ക് പോകവേ പുറംകടലില്‍വെച്ച്‌ ചരക്കുകപ്പലിന് തീപിടിത്തമുണ്ടായതിനെത്തുടർന്ന് ഒരു ജീവനക്കാരൻ മരിച്ചു. തായ്​ലന്‍ഡ്​​ സ്വദേശി സുഖ്സന്‍ പാനിപോണ്‍ (27) ആണ് മരിച്ചത്. ബുധനാഴ്ച രാത്രി എട്ടോടെ ലക്ഷദ്വീപിന് പടിഞ്ഞാറ് 130 നോട്ടിക്കല്‍ മൈല്‍ അകലെയാണ് തീപിടിത്തമുണ്ടായത്. എ.എല്‍.എസ് ഡെറെസ് എന്ന കപ്പലിനാണ് തീപിടിച്ചത്.

മൊത്തം 23 ജീവനക്കാരാണ് കപ്പലില്‍ ഉണ്ടായിരുന്നത്​. ജീവനക്കാര്‍ വിശ്രമിക്കുന്ന കപ്പലിന്റെ പിറകുവശത്താണ് തീപിടിത്തമുണ്ടായത്. ബാക്കിയുള്ള 19 ജീവനക്കാരെ ലക്ഷദ്വീപ് കോസ്​റ്റ്​ ഗാര്‍ഡ്​ രക്ഷപ്പെടുത്തി. രക്ഷപ്പെട്ട ജീവനക്കാരെയും മൃതദേഹവും കൊണ്ട് കോസ്​റ്റ്​ ഗാര്‍ഡ് കപ്പല്‍ ഇന്നലെ പുലര്‍ച്ചയോടെ കൊച്ചിയിലെത്തി. മറ്റ് മൂന്ന് ജീവനക്കാരെ ഗുരുതര പരിക്കുകളോടെ തിരുവനന്തപുരം മെഡിക്കല്‍ കോളജ്​ ആശുപത്രിയില്‍ പ്രവേശിപ്പിച്ചു. ഇന്ത്യക്കാരനായ ദീപു ജയന്‍, തായ്​ലന്‍ഡ്​​ സ്വദേശി സുകുന്‍, ഫിലിപ്പീന്‍ സ്വദേശി അലന്‍ എന്നിവര്‍ക്ക് ഗുരുതരമായി പരിക്കേറ്റു. തീപിടിത്തത്തി​ന്റെ കാരണം വ്യക്തമല്ല.