ഓഖി ചുഴലിക്കാറ്റിന്റെ ആഘാതത്തില്‍ നിന്ന് തീരദേശം മുക്തമാകുന്നതിന് മുമ്പ് മറ്റൊരു ചുഴലിക്കാറ്റ് കൂടി കേരളതീരത്ത് എത്തിയേക്കുമെന്ന് കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കി. ഇതേ തുടര്‍ന്ന് സ്ഥിതിഗതികള്‍ വിലയിരുത്താന്‍ ചീഫ് സെക്രട്ടറി ഉന്നത ഉദ്യോഗസ്ഥരുടെ അടിയന്തരയോഗം വിളിച്ചു. ന്യൂനമര്‍ദ്ദം ശക്തിപ്രാപിക്കുന്നതിനാലാണ് ചുഴലിക്കാറ്റിന് സാധ്യതയുണ്ടെന്ന് കേന്ദ്രകാലാവസ്ഥാ നിരീക്ഷണകേന്ദ്രം അറിയിച്ചത്. കേരളത്തില്‍ നിന്ന് 390 കിലോമീറ്റര്‍ അകലെ തെക്ക് കിഴക്ക് ന്യൂനമര്‍ദ്ദം സ്ഥിരീകരിച്ചിട്ടുണ്ട്. ഇത് അറബിക്കടലിലേക്ക് നീങ്ങുകയാണ്. 36 മണിക്കൂറിനകം ചുഴലിയായി മാറാന്‍ സാധ്യതയുണ്ട്. 48 മണിക്കൂറിനുള്ളില്‍ ശക്തമായ കാറ്റടിക്കും. കാറ്റിന്റെ വേഗത മണിക്കൂറില്‍ 60 കിലോമീറ്ററാകും. 

തിരമാലകള്‍ മൂന്നര മീറ്റര്‍ വരെ ഉയരാം. തീരത്ത് ശക്തമായ മഴയ്ക്കും സാധ്യതയുണ്ട്. മുന്നറിയിപ്പ് നേരത്തെ ലഭിച്ചതിനാല്‍ മല്‍സ്യത്തൊഴിലാളികള്‍ കടലില്‍ പോകുന്നത് വിലക്കിയിട്ടുണ്ട്. കഴിഞ്ഞ ശനിയാഴ്ച ന്യൂനമര്‍ദ്ദം ശ്രീലങ്കന്‍ ഭാഗത്ത് രൂപപ്പെട്ടപ്പോഴേ തീരദേശത്ത് സംസ്ഥാന സര്‍ക്കാര്‍ മുന്നറിയിപ്പ് നല്‍കിയിരുന്നു. ഇത് അവഗണിച്ച് കടലില്‍ പോയവരെ തീരദേശ പൊലീസ് തിരികെ കൊണ്ടുവന്നിരുന്നു. മൂന്നാല് ദിവസമായി തെക്കന്‍കേരളത്തില്‍ ചൂട് കൂടിയിരുന്നു. ഇത് ന്യൂനമര്‍ദ്ദം രൂപപ്പെടാന്‍ സഹായകമായി. കേരളത്തിലും ലക്ഷദ്വീപിനും ഇടയിലുള്ള കടലിലൂടെ ഗോവന്‍തീരത്ത് ചുഴലി എത്താന്‍ സാധ്യതയുണ്ടെന്ന് ഡോ.രാജഗോപാല്‍ കമ്മത്ത് പറഞ്ഞു. 

ഓഖി ദുരന്തത്തില്‍ വലിയ വീഴ്ച കേന്ദ്രകാലാവസ്ഥാ നിരീക്ഷണകേന്ദ്രത്തിനും സംസ്ഥാനകേന്ദ്രത്തിനും സംഭവിച്ചതിനാല്‍ ഇത്തവ സര്‍ക്കാര്‍ മുന്നൊരുക്കങ്ങള്‍ തുടങ്ങിയിരുന്നു. ദുരന്തനിവാരണ അതോറിട്ടി അധികൃതരെയും മറ്റും ചീഫ് സെക്രട്ടറി യോഗത്തിന് ക്ഷണിച്ചിട്ടുണ്ട്. അറബിക്കടിലിലെ താപനില ഗണ്യമായി വര്‍ദ്ധിച്ചിട്ടുണ്ട്. ഇതാണ് ന്യൂനമര്‍ദ്ദം രൂപപ്പെടാന്‍ കാരണം.