ലക്ഷങ്ങള്‍ വിലമതിക്കുന്ന വെള്ള ആമകളുമായി രണ്ടു പേര്‍ പിടിയില്‍
അന്താരാഷ്‌ട്ര മാര്‍ക്കറ്റില്‍ ലക്ഷങ്ങള്‍ വിലമതിക്കുന്ന വെള്ള ആമകളെ വില്‍ക്കാന്‍ ശ്രമിക്കുന്നതിനിടെ രണ്ടു പേരെ വനം വകുപ്പ് ഉദ്യോഗസ്ഥര്‍ അറസ്‌റ്റു ചെയ്‌തു. മയ്യില്‍ ഇരുവാപ്പുഴ നമ്പ്രം സ്വദേശികളായ കുന്നുമ്പ്രത്ത്‌ പുതിയപുരയില്‍ അനസ്‌ (26), വള്ളിയില്‍വീട്ടില്‍ രാഹുല്‍(19) എന്നിവരാണു പിടിയിലായത്‌. കേന്ദ്ര വനം-പരിസ്ഥിതി മന്ത്രാലയത്തിനു കീഴിലുള്ള വൈല്‍ഡ്‌ലൈഫ്‌ ക്രൈം കണ്‍ട്രോള്‍ ബ്യൂറോയ്‌ക്കു വെള്ള ആമയെ വില്‍ക്കുന്നുവെന്ന രഹസ്യ വിവരം ലഭിച്ചതിനെ തുടര്‍ന്നാണ്‌ തളിപ്പറമ്പ്‌ ഫോറസ്റ്റ്‌ റേഞ്ച്‌ ഓഫീസര്‍ എം.പി. പ്രഭാകരന്റെ നേതൃത്വത്തിലുള്ള വനംവകുപ്പ്‌ സംഘം ഇവരെ അറസ്റ്റ്‌ ചെയ്‌തു. ഇവരില്‍നിന്നു രണ്ട് ആമകളെ പിടിച്ചെടുത്തു. പരിസ്ഥിതി സന്തുലിതാവസ്ഥ നിലനിര്‍ത്തുന്നതില്‍ സുപ്രധാന പങ്കുവഹിക്കുന്ന വെള്ള ആമകളെ വിദേശത്തേക്കു കയറ്റുമതി ചെയ്യുന്ന സംഘത്തെ ഇന്ത്യയില്‍ത്തന്നെ ആദ്യമായാണു പിടികൂടുന്നത്‌.
ഇന്ത്യന്‍ മാര്‍ക്കറ്റില്‍ അഞ്ചുലക്ഷം രൂപവരെ വിലമതിക്കുന്ന വെള്ള ആമയ്‌ക്ക്‌ അന്താരാഷ്‌ട്ര മാര്‍ക്കറ്റില്‍ മോഹവിലയാണു ലഭിക്കുന്നതെന്നു റേഞ്ച്‌ ഓഫീസര്‍ പറഞ്ഞു.
ഫോറസ്റ്റ്‌ ഇന്റലിജന്‍സ്‌ ബ്യൂറോയ്‌ക്കു വിവരം ലഭിച്ചതിനെ തുടര്‍ന്ന്‌ ആവശ്യക്കാരെന്ന വ്യാജേന രണ്ട് ആമകള്‍ക്കു മൂന്നുലക്ഷം രൂപ വില ഉറപ്പിച്ചശേഷമാണു വേഷം മാറി വനംവകുപ്പ്‌ ഉദ്യോഗസ്ഥര്‍ ആമകടത്ത്‌ സംഘത്തെ പിടികൂടിയത്‌. ഇവരെ ചോദ്യംചെയ്‌തതില്‍നിന്നു വന്‍സംഘം തന്നെ ആമ കടത്തില്‍ ഏര്‍പ്പെട്ടിരിക്കുന്നതായി വിവരം ലഭിച്ചിട്ടുണ്ട്‌.
വെള്ളക്കെട്ടുകളിലും തണ്ണീര്‍ത്തടങ്ങളിലും അപൂര്‍വമായി കാണപ്പെടുന്ന വെള്ള ആമകള്‍ ഇന്ത്യന്‍ വന്യജീവി സംരക്ഷണപ്പട്ടികയില്‍ ഒന്നാംസ്ഥാനത്തു നില്‍ക്കുന്നതാണ്‌. ഇവയെ പിടിക്കുന്നതും കൊല്ലുന്നതും ഏഴു വര്‍ഷം വരെ ശിക്ഷയും ഒരുലക്ഷം രൂപ പിഴയും ലഭിക്കുന്ന കുറ്റമാണെന്നു വനംവകുപ്പ്‌ ഉദ്യോഗസ്ഥര്‍ പറഞ്ഞു. പിടിയിലായവരെ ജുഡീഷല്‍ ഒന്നാംക്ലാസ്‌ മജിസ്‌ട്രേറ്റ്‌ കോടതി റിമാന്‍ഡ്‌ ചെയ്‌തു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
