ഉമ്മന്‍ചാണ്ടിയും പക്കമേളക്കാരും സദാശിവത്തെ എതിര്‍ക്കുന്നതെന്തിന്‌?
ജസ്റ്റിസ് പി. സദാശിവം കേരള ഗവര്‍ണറാകുന്നതു ഉമ്മന്‍ചാണ്ടി സര്‍ക്കാരിനെ ആശങ്കാകുലരാക്കുന്നു. സദാശിവത്തിന്റെ നിയമനം തങ്ങള്‍ക്ക്‌ തിരിച്ചടിയാകുമെന്നാണ്‌ കേരള സര്‍ക്കാരിന്റെ കണക്കുകൂട്ടല്‍. ഷീലാ ദീക്ഷിത്തിന്റെ കൈയില്‍ ഭദ്രമായിരുന്ന രാജ്‌ഭവന്‍ സദാശിവത്തിന്റെ വരവോടെ ഉമ്മന്‍ചാണ്ടി സര്‍ക്കാരിന്‌ എതിരാകുമെന്നാണ്‌ സര്‍ക്കാരിന്റെ ഭയം.
ഗവര്‍ണറും സര്‍ക്കാരും ഒത്തു പോയില്ലെങ്കില്‍ അത്‌ നിയമപരമായ നിരവധി പ്രശ്‌നങ്ങള്‍ക്കു കാരണമാകും. യുപിഎ സര്‍ക്കാരിന്റെ കാലത്ത്‌ ഗവര്‍ണര്‍മാര്‍ മുഖ്യമന്ത്രിയുടെ ഇച്ഛാനുസരണമാണ്‌ പെരുമാറിയിരുന്നത്‌. ഉമ്മന്‍ചാണ്ടി സര്‍ക്കാരിന്‌ താത്‌പര്യമുള്ള പല കേസുകളും തീര്‍പ്പാക്കിയശേമാണ്‌ ഷീലാദിക്ഷീത്‌ മടങ്ങാന്‍ ഒരുങ്ങുന്നത്‌. എം.ജി സര്‍വകലാശാല വൈസ്‌ ചാന്‍സലറായിരുന്ന എ.പി.ജോര്‍ജിന്റെ നിയമനം റദ്ദാക്കിയതും ഉമ്മന്‍ചാണ്ടിയുടെ താത്‌പര്യപ്രകാരമായിരുന്നു.
ഗവര്‍ണര്‍മാര്‍ക്ക്‌ സാധാരണ രാഷ്‌ട്രീയപരിചയം മാത്രമാണ്‌ ഉണ്ടാകാറുള്ളത്‌. കേരളത്തില്‍ നിയമിതനായ പല ഗവര്‍ണര്‍മാര്‍ക്കും രാഷ്‌ട്രീയപരിചയം മാത്രമാണുണ്ടായിരുന്നത്‌. അതേസമയം ജഡ്‌ജിയായിരുന്ന ഒരാള്‍ ഇത്തരമൊരു തസ്‌തികയിലെത്തുമ്പോള്‍ അദ്ദേഹം കണ്ണുമടച്ച്‌ ഒന്നും ഒപ്പിടുകയില്ല. നിയമനിര്‍മ്മാണങ്ങളില്‍ ഉള്‍പ്പെടെ ഗവര്‍ണറുടെ തുല്യം ചാര്‍ത്ത്‌ ആവശ്യമാണ്‌. സര്‍ക്കാരിന്റെ നയപരമായ പല തീരുമാനങ്ങളിലും അവസാനം ഒപ്പിടേണ്ടത്‌ ഗവര്‍ണറാണ്‌. പി.സദാശിവം ഗവര്‍ണറായാല്‍ ഉമ്മന്‍ചാണ്ടി അയച്ചു കൊടുക്കുന്ന ഫയലുകളെല്ലാം കണ്ണടച്ച്‌ ഒപ്പിടാന്‍ ഒരു സാധ്യതയുമില്ല. ചുരുക്കത്തില്‍ ഉമ്മന്‍ചാണ്ടിയും സദാശിവവും തമ്മില്‍ സംഘര്‍ഷ സാധ്യത ഉടലെടുക്കുമെന്ന കാര്യം ഉറപ്പായി.
ബിജെപി നോമിനിയായ ഗവര്‍ണര്‍ ഒരിക്കലും കോണ്‍ഗ്രസ്‌ മുഖ്യമന്ത്രിയോട്‌ അനുഭാവപൂര്‍വ്വം പെരുമാറുകയില്ല. മാത്രവുമല്ല പി.സദാശിവത്തിന്‌ പ്രതിപക്ഷനേതാവ്‌ വി.എസ്‌ അച്യുതാനന്ദനുമായി അടുത്ത ബന്ധവുമുണ്ട്‌. അച്യുതാനന്ദന് നല്‍കിയ പല പ്രമാദമായ കേസുകളും പി.സദാശിവത്തിന്റെ ബഞ്ചാണ്‌ പരിഗണിച്ചിട്ടുള്ളത്‌. സദാശിവം കേരളത്തില്‍ വന്നാല്‍ അച്യുതാനന്ദന് അനുകൂലമായ നിലപാടെടുക്കുമോ എന്നും ഉമ്മന്‍ചാണ്ടിക്ക്‌ സംശയമുണ്ട്‌.
സുപ്രീംകോടതി ചീഫ്‌ ജസ്റ്റിസിനെ ഗവര്‍ണറായി നിയമിക്കുന്നിലുള്ള ഭരണഘടനാപ്രശ്‌നങ്ങള്‍ ചൂണ്ടി കാണിച്ചാണ്‌ സുധീരനും ഉമ്മന്‍ചാണ്ടിയും ജസ്റ്റിസ് സദാശിവത്തെ എതിര്‍ക്കുന്നത്‌.
മുല്ലപെരിയാര്‍ വിഷയത്തില്‍ സദാശിവം കേരളത്തിനെതിരാണെന്നും കോണ്‍ഗ്രസ്‌ നേതാക്കള്‍ ആരോപിക്കുന്നു. ഒരു ജഡ്‌ജിക്ക്‌ തന്റെ മുമ്പില്‍ വരുന്ന തെളിവുകളുടെ അടിസ്ഥാനത്തില്‍ മാത്രം വിധി പറയാനാകില്ല. മുല്ലപെരിയാര്‍ വിഷയത്തില്‍ ഇത്രയും നാളും തമിഴ്‌നാട്‌ സര്‍ക്കാര്‍ വിവേകപൂര്‍വ്വമാണ്‌ പെരുമാറിയിട്ടുളളത്‌. കേരളസര്‍ക്കാരകട്ടെ ഒരു തവണപോലും വ്യക്തമായി കേസ്‌ വാദിച്ചിട്ടില്ല. എന്നിട്ടും കേരളത്തിന്‌ സദാചാരത്തെ കുറ്റം പറയാനാണ്‌ താത്‌പര്യം.
വരും ദിവസങ്ങളില്‍ സദാശിവസത്തിന്റെ നിയമനം ചൂടുപിടിക്കാം. കേന്ദ്ര സര്‍ക്കാരാകട്ടെ സദാശിവത്തെ തന്നെ നിയമിക്കുമെന്ന കാര്യത്തില്‍ ഉറച്ച നിലപാടാണുളളത്‌. രാജ്‌ഭവനും ക്ലിഫ്‌ഹൗസും തമ്മിലുളള യുദ്ധത്തിനായി കാത്തിരിക്കുക.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
