കായംകുളം താപനിലയത്തില്‍ വൈദ്യുതി ഉത്പാദനം നിര്‍ത്തിവച്ചു. അധികവില നല്‍കി വൈദ്യുതി വാങ്ങേണ്ടെന്ന കെഎസ്ഇബി തീരുമാനത്തെ തുടര്‍ന്നാണിത്. വിവിധ ജലവൈദ്യുത പദ്ധതികളില്‍ ഉത്പാദനം ഉയര്‍ന്നതോടെയാണ് താപനിലയം താത്ക്കാലികമായി അടച്ചിട്ടത്. ശനിയാഴ്ച മുതലാണ് ഇവിടെ ഉത്പാദനം നിര്‍ത്തി വച്ചത്. വൈദ്യുതി വാങ്ങിയില്ലെങ്കിലും മുന്‍ ധാരണ പ്രകാരം സംസ്ഥാന സര്‍ക്കാര്‍ പ്രതിമാസം 20 കോടി രൂപ താപനിലയത്തിനു നല്‍കണം. ജലസംഭരണികളില്‍ വെള്ളം കുറഞ്ഞ് വൈദ്യുതി ഉത്പാദനം പ്രതിസന്ധിയിലായ ഘട്ടത്തിലാണ് കൂടിയ വിലയ്ക്കു താപവൈദ്യുതി വാങ്ങാന്‍ കെഎസ്ഇബി താപനിലയവുമായി ധാരണയിലെത്തിയത്. 

യൂനിറ്റിന് 11 രൂപയും പ്രതിമാസ പ്രവര്‍ത്തനത്തിന് 20 കോടിയും സര്‍ക്കാര്‍ നല്‍കിയിരുന്നു. പ്രതിസന്ധി അകന്നതോടെ നാഫ്ത ഉപയോഗിച്ചുള്ള വൈദ്യുതി തത്ക്കാലം വേണ്ടെന്നു കെഎസ്ഇബി താപനിലയം അധികൃതരെ അറിയിച്ചു. ഇതോടെ പ്ലാന്റുകളില്‍ ഉത്പാദനം നിര്‍ത്തി വയ്ക്കാന്‍ എന്‍ടിപിസി തീരുമാനിക്കുകയായിരുന്നു. 

ഇതിനിടെ താപനിലയത്തിന്റെ രണ്ടാംഘട്ട നവീകരണ പ്രവര്‍ത്തനങ്ങള്‍ മന്ദഗതിയിലായത് വൈദ്യുതി ഉത്പാദനത്തിനു തിരിച്ചടിയായി. നാഫ്തയ്ക്കു പകരം എല്‍എന്‍ജി ഇന്ധനമാക്കാന്‍ തയാറാക്കിയ 6000 കോടി പദ്ധതിയാണു അനന്തമായി നീളുന്നത്. നിലവില്‍ 325 മെഗാവാട്ടാണ് നിലയത്തിന്റെ ഉത്പാദന ശേഷി. 

ഇന്ധനമെത്തിക്കാനുള്ള പൈപ്പുകള്‍ പോലും ഇതുവരെ സ്ഥാപിച്ചിട്ടില്ല. പദ്ധതി നീളുന്നതിനിടെ ശുദ്ധീകരിച്ച കല്‍ക്കരി ഉപയോഗിച്ച് ഉത്പാദനം നടത്താന്‍ എന്‍ടിപിസി ശ്രമങ്ങള്‍ ആരംഭിച്ചു. വൈദ്യുതി ക്ഷാമം രൂക്ഷമായ സാഹചര്യത്തില്‍ സോളാര്‍പാടം നിര്‍മ്മിക്കാനുംആലോചനയുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha