അമേരിക്കയിലെ ബ്രൂക്​ലിനിൽ കറുത്ത വർഗ്ഗക്കാർ തിങ്ങിപ്പാർക്കുന്ന ക്രൗൺ ഹൈറ്റ്​സിൽ മാനസിക രോഗിയായ യുവാവിനെ ന്യൂയോർക്ക്​ പൊലീസ്​ വെടിവെച്ച്​ കൊന്നു. യുവാവ്​ നീട്ടിയ പൈപ്പ്​ തോക്കാണെന്ന്​​ തെറ്റിദ്ധരിച്ചായിരുന്നു പോലീസിന്റെ അതിക്രമം.

വ്യാഴാഴ്​ച പുലർച്ചെ ഇന്ത്യൻ സമയം 2:30 നായിരുന്നു ഇത്തരത്തിലൊരു സംഭവം അരങ്ങേറിയത്. അതേസമയം മാനസിക രോഗിയായിരുന്നുവെങ്കിലും അയാൾ ആക്രമകാരിയായിരുന്നില്ലെന്നാണ്​ യുവാവി​ന്റെ അയൽവാസികൾ പറഞ്ഞതായി അന്തർദേശീയ ​മാധ്യമങ്ങൾ റിപ്പോർട്ട്​ ചെയ്യുന്നത്.

നാല്​ പൊലീസുകാർ തന്നെ ലക്ഷ്യമാക്കി വരുന്നത്​ കണ്ടതോടെ കയ്യിലുണ്ടായിരുന്ന പൈപ്പ്​ ഉയർത്തി ചൂണ്ടുകയും ഇത്​ കണ്ട്​ തെറ്റിദ്ധരിച്ച പൊലീസുകാർ വെടിയുതിർക്കുകയുമായിരുന്നു.

ഗുരുതരാവസ്ഥയിലായ യുവാവിനെ ആശുപത്രിയിൽ എത്തിച്ചെങ്കിലും മരണത്തിന്​ കീഴടങ്ങി. സമീപ കാലത്ത് കറുത്ത വര്‍ഗക്കാര്‍ക്ക് നേരെ അമേരിക്കന്‍ പൊലീസിന്റെ ഭാഗത്ത് നിന്നും ഉണ്ടാവുന്ന ആക്രമങ്ങള്‍ രാജ്യവ്യാപകമായി പ്രതിഷേധത്തിന് വഴിവെച്ചിരിക്കുകയാണ്.