ഉദ്യോഗസ്ഥനാണോ അവസാന വാക്കെന്ന്‌ മുഖ്യമന്ത്രി; കേരളത്തെ അഴിമതിക്കാര്‍ക്ക്‌ വിറ്റുവെന്ന്‌ വി.എസ്‌, ഉടുമ്പിനെപ്പോലെ അധികാരത്തില്‍ പിടിച്ചു കിടക്കുന്നു
തുടര്‍ച്ചയായുള്ള കോടതി പരാമര്‍ശത്തെച്ചൊല്ലി മുഖ്യമന്ത്രി ഉമ്മന്‍ ചാണ്ടിയും പ്രതിപക്ഷ നേതാവ്‌ വിഎസ്‌ അച്യുതാനന്ദനും തമ്മില്‍ വാക്‌ പോര്‌.
ഉദ്യോഗസ്ഥനാണോ ജനാധിപത്യത്തില്‍ അവസാന വാക്കെന്ന്‌ ഉമ്മന്‍ ചാണ്ടി ചോദിച്ചു. പ്ലസ്‌ ടു കേസില്‍ ഹയര്‍ സെക്കന്‍ഡറി ഡയറക്‌ടറുടെ ശുപാര്‍ശ മറികടന്ന്‌ അനുവദിച്ച പ്ലസ്‌ ടു സ്‌കൂളുകളും ബാച്ചുകളും സ്റ്റേ ചെയ്‌ത ഹൈക്കോടതി വിധിയെക്കുറിച്ച്‌ സംസാരിക്കുകയായിരുന്നു മുഖ്യമന്ത്രി.
അതേ സമയം മുഖ്യമന്ത്രിയും മന്ത്രിമാരും ചേര്ന്ന് കേരളത്തെ അഴിമതിക്കാര്‍ക്ക്‌ വിറ്റുവെന്ന്‌ വി.എസ്‌. അച്യുതാനന്ദന്‍ പറഞ്ഞു.തുടര്‍ച്ചയായി കോടതി വിധികള്‍ ഉണ്ടായിട്ടും മുഖ്യമന്ത്രി ഉടുമ്പിനെപ്പോലെ അധികാരത്തില്‍ പിടിച്ചു കിടക്കുകയാണെന്നും വിഎസ്‌ പറഞ്ഞു.
പ്ലസ്‌ ടു കേസില്‍ കോടതി പറയുന്നതു പോലെ അനുസരിക്കുമെന്ന്‌ ഉമ്മന്‍ ചാണ്ടി പറഞ്ഞു. ഉദ്യോഗസ്ഥന്‍ പറയുന്നത്‌ അനുസരിക്കണമെന്ന രീതി ശരിയാണോയെന്ന്‌ പരിശോധിക്കണമെന്നും മുഖ്യമന്ത്രി പറഞ്ഞു.
പാമോയില്‍ കേസില്‍ സര്‍ക്കാരിന്‌ ഒരു നഷ്‌ടവും സംഭവിച്ചിട്ടില്ല. കേസിനെക്കുറിച്ച്‌ അദ്യം അന്വേഷിച്ചത്‌ ഇ.കെ.നായനാര്‍ സര്‍ക്കാരാണ്‌. അഞ്ച്‌ വര്‍ഷം അന്വേഷിച്ചിട്ട്‌ തന്നെ ഇരുപത്തിമൂന്നാം സാക്ഷിയാക്കി. പിന്നീട്‌ അഞ്ച്‌ വര്‍ഷം കൂടി ഇടതു മുന്നണി ഭരിച്ചിട്ടും തന്നെ പ്രതിയാക്കാന്‍ കഴിഞ്ഞില്ല. വിചാരണക്കോടതിയും ഹൈക്കോടതിയും തന്നെ പ്രതിയാക്കാന്‍ കഴിയില്ലെന്ന്‌ ഉത്തരവിട്ട ശേഷമാണ്‌ കേസ്‌ പിന്‍വലിച്ചത്‌. തന്റെ മനസാക്ഷിക്ക്‌ അനുസരിച്ചാണ്‌ ഇക്കാര്യത്തില്‍ പ്രവര്‍ത്തിച്ചതെന്നും മുഖ്യമന്ത്രി പറഞ്ഞു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
