ഇന്ത്യ-വെസ്റ്റ്ഇന്ഡീസ് ഏകദിനം തിരുവനന്തപുരത്ത് തന്നെ; കൊച്ചിയിലേക്ക് വേദിമാറ്റനുള്ള കെ.സി.എയുടെ കളി കുളമായി
വിവാദങ്ങള്ക്കൊടുവില് ഇന്ത്യ-വെസ്റ്റിന്ഡീസ് ഏകദിനം തിരുവനന്തപുരം കാര്യവട്ടം ഗ്രീന്ഫില്ഡ് സ്റ്റേഡിയത്തില് നടത്താന് തീരുമാനം. കായികമന്ത്രി എ.സി മൊയ്തീനുമായി കേരള ക്രിക്കറ്റ് അസോസിയേഷന് ഭാരവാഹികള് (കെ.സി.എ) നടത്തിയ ചര്ച്ചയെ തുടര്ന്നാണ് തീരുമാനം. ഔദ്യോഗികപ്രഖ്യാപനം മറ്റന്നാളത്തെ കെ.സി.എ ജനറല് ബോഡിക്ക് ശേഷം ഉണ്ടാകുമെന്ന് ഭാരവാഹികള് തിരുവനന്തപുരത്ത് അറിയിച്ചു. കൊച്ചിയില് ക്രിക്കറ്റ് സ്റ്റേഡിയം നിര്മിക്കാമെന്ന് കായികമന്ത്രി ഉറപ്പ് നല്കിയതായി കെ.സി.എ സെക്രട്ടറി ജയേഷ് ജോര്ജ് അറിയിച്ചു. കൊച്ചിയില് ഇനിയും ഏകദിനം നടത്തും. തിരുവനന്തപുരത്ത് മല്സരം നടത്തുന്നത് ചെലവ് കൂടുതലാണ്. കെ.സി.എയില് അഴിമതി നടന്നിട്ടില്ല. ആര്ക്കും പരിശോധിക്കാവുന്നതാണ്. കായികമന്ത്രിയുടെ തീരുമാനം മാനിക്കുന്നതായും ജയേഷ് ജോര്ജ് മാധ്യമങ്ങളോട് പറഞ്ഞു.
ബി.സി.സി.ഐയും കേരള ബ്ലാസ്റ്റേഴ്സ് ഉടമ സച്ചിന് ടെണ്ടുല്ക്കറും ഏകദിനം കാര്യവട്ടത്ത് നടത്തണമെന്ന് നിര്ദ്ദേശിച്ചിട്ടും കെ.സി.എ ഭാരവാഹികള് അത് അട്ടിമറിക്കാന് നീക്കം നടത്തി. കൊച്ചി കലൂര് സ്റ്റേഡിയത്തില് നിര്മിച്ച അന്താരാഷ്ട്ര നിലവാരമുള്ള ഫുട്ബോള് ടര്ഫ് പൊളിക്കരുതെന്ന് കേരള ബ്ലാസ്റ്റേഴ്സ് ഉടമയായ സച്ചിന് പറഞ്ഞിരുന്നു. എന്നാല് ഏകദിനം കഴിഞ്ഞ് 22 ദിവസത്തിനുള്ളില് ടര്ഫ് നിര്മിക്കാമെന്നും കേരള ബ്ലാസ്റ്റേഴ്സ് അധികൃതര് ഇതിന് സമ്മതിച്ചെന്നും ഇന്നലെ ഗ്രേറ്റര് കൊച്ചിന് ഡെവലപ്പ്മെന്റ് അതോറിട്ടിയും (ജി.സി.ഡി.എ) കെ.സി.എയും കേരള ഫുട്ബോള് അസോയിയേഷനും ഇന്നലെ നടത്തിയ യോഗത്തിന് ശേഷം പറഞ്ഞിരുന്നു. ബ്ലാസ്റ്റേഴ്സ് പ്രതിനിധിയും ഈ യോഗത്തില് പങ്കെടുത്തിരുന്നു.
കലൂര് സ്റ്റേഡിയത്തില് ഏകദിനം നടത്തണമോ വേണ്ടയോ എന്നറിയാന് ജി.സി.ഡി.എ അധികൃതര് വിദഗ്ധസമതിയെ നിയോഗിച്ചിരുന്നു. ക്രിക്കറ്റും ഫുട്ബോളും കൊച്ചിയിലും തിരുവനന്തപുരത്തും വേണമെന്ന നിലപാടിലായിരുന്നു കെ.സി.എയും ജി.സി.ഡി.എയും. കെ.സി.എ സെക്രട്ടറിയായ ജെയേഷ് ജോര്ജ് ഹെഡ്ഓഫീസായ തിരുവനന്തപുരത്ത് വരാറില്ലെന്നും കൊച്ചിയില് താമസിക്കുന്ന അദ്ദേഹം തന്റെ സൗകര്യങ്ങള് കണക്കിലെടുത്താണ് മല്സരം അവിടെ നടത്താന് നീക്കം നടത്തിയെന്നും ആരോപണം ഉയര്ന്നിട്ടുണ്ട്. കായികമന്ത്രി എ.സി മൊയ്തീനും ശശിതരൂര് എം.പിയും അടക്കം ഇടപെട്ടാണ് ഈ നീക്കം പൊളിച്ചത്.
https://www.facebook.com/Malayalivartha
