കേരളത്തില് നിന്ന് ഐസിസില് ചേരാനായി അഫ്ഗാനിസ്ഥാനിലേക്ക് പോയ നാല് മലയാളികള് കൊല്ലപ്പെട്ടു
കേരളത്തില് നിന്ന് ഐസിസില് ചേരാനായി അഫ്ഗാനിസ്ഥാനിലേക്ക് പോയ നാല് മലയാളികള് കൊല്ലപ്പെട്ടു. കാസര്ഗോഡ് പടന്ന സ്വദേശികളായ ഷിഹാബ്, ഭാര്യ അജ്മല, ഇവരുടെ കുഞ്ഞ്, തൃക്കരിപ്പൂര് സ്വദേശി മുഹമ്മദ് മന്സാദ് എന്നിവരാണ് യു.എസ് ബോംബാക്രമണത്തില് കൊല്ലപ്പെട്ടത്. ഇക്കാര്യം ദേശീയ അന്വേഷണ ഏജന്സി (എന്.ഐ.എ) സ്ഥിരീകരിച്ചിട്ടുണ്ട്. കേന്ദ്ര ഏജന്സികളില് നിന്നും വിവരം ലഭിച്ചതായി സംസ്ഥാന പൊലീസ് മേധാവി ലോക്നാഥ് ബെഹ്റയും അറിയിച്ചു.
അഫ്ഗാനിസ്ഥാനിലെ നംഗര്ഹാറിലുള്ള ഐസിസ് ക്യാമ്പില് അമേരിക്കന് വ്യോമസേന നടത്തിയ ബോംബാക്രമണത്തിലാണ് ഇവര് കൊല്ലപ്പെട്ടത്. കേരളത്തില് നിന്നും കാണാതായവര് ഉള്പ്പെടെ എത്തിപ്പെട്ട സ്ഥലമായി കരുതുന്നിടമാണ് അഫ്ഗാനിലെ നംഗര്ഹാര് പ്രവിശ്യ. 2016 ജൂലായിലാണ് കാസര്ഗോഡ്, പാലക്കാട് എന്നിവിടങ്ങളില് നിന്ന് നിരവധി പേരെ ദുരൂഹ സാഹചര്യത്തില് കാണാതായത്.
കേരളത്തില് നിന്ന് 22 പേരാണ് ഐസിസില് ചേര്ന്നതായി ഔദ്യോഗിക വിവരമുള്ളത്. എന്നാല്, സിറിയയിലും നംഗര്ഹാര് തുടങ്ങിയ മേഖലകളിലുമായി സ്ത്രീകളും കുട്ടികളുമുള്പ്പെടെ എണ്പതോളം മലയാളികള് ഇപ്പോഴുണ്ടെന്നാണ് നിഗമനം. ഇവരില് ചിലര് മസ്ക്കറ്റ്, ദുബായ് എന്നിവിടങ്ങളിലൂടെയാണ് ഇവിടേക്ക് എത്തിയതെന്നാണ് വിവരം.
അതേസമയം, കേരളത്തിലെ ഐസിസിന്റെ പ്രവര്ത്തനങ്ങള്ക്ക് നേതൃത്വം നല്കി വന്ന ഷജീര് മംഗലശേരി അടക്കം 14 മലയാളികള് സിറിയയില് സൈന്യവുമായുണ്ടായ ഏറ്റുമുട്ടലില് കൊല്ലപ്പെട്ടെന്ന് കഴിഞ്ഞ വര്ഷം കേരള പൊലീസിന്റെ രഹസ്യാന്വേഷണ വിഭാഗം സ്ഥിരീകരിച്ചിരുന്നു.
മലയാളികളെ സംഘടനയിലേക്ക് റിക്രൂട്ട് ചെയ്യാനും ആകര്ഷിക്കാനുമായി മലയാളത്തില് അന്ഫാറുല് ഖലീഫ, അല് മുജാഹിദുല് എന്നീ രണ്ട് വെബ്സൈറ്റുകള് ഷജീര് നടത്തിയിരുന്നതായും പൊലീസ് കണ്ടെത്തിയിരുന്നു.
https://www.facebook.com/Malayalivartha
