ശബരിമലയില്‍ ആറാട്ടിന് കൊണ്ടുവന്ന ആന ഇടഞ്ഞത് പരിഭ്രാന്തി പരത്തി. വെള്ളിയാഴ്ച രാവിലെ പന്പയിലേക്ക് തിടന്പുമായി ഘോഷയാത്ര നടക്കുന്നതിനിടെ മരക്കൂട്ടത്ത് വച്ചാണ് ആന ഇടഞ്ഞത്. ആനയെ തളയ്ക്കാന്‍ ശ്രമിക്കുന്നതിനിടെ പാപ്പാന്‍ കൃഷണകുമാറിന് പരിക്കേറ്റു. ഇയാളുടെ കാലിന് ഒടിവ് സംഭവിച്ചിട്ടുണ്ട്. തിടന്പുമായി ആനപ്പുറത്തിരുന്ന തൃശൂര്‍ സ്വദേശി ദിനേശിനും പരിക്കേറ്റിട്ടുണ്ട്. ഇയാളെ കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി.

ആനയിടഞ്ഞത് കണ്ട് പരിഭ്രാന്തരായ ഭക്തജനങ്ങള്‍ ചിതറിയോടി. ഇതിനിടെ നിലത്ത് വീണ് പത്തോളം പേര്‍ക്ക് പരിക്കേറ്റിട്ടുണ്ട്. ഇവരും ആശുപത്രികളില്‍ ചികിത്സ തേടി. ഇടഞ്ഞ ആന വനത്തിനുള്ളിലേക്കാണ് ഓടിയത്. ആനയെ പിന്നീട് തളച്ചു.