കതിരൂര് മനോജ് വധം: യു.എ.പി.എയ്ക്കെതിരെ പി.ജയരാജന് വീണ്ടും ഹൈക്കോടതിയില്
കതിരൂര് മനോജ് വധക്കേസില് യു.എ.പി.എ ചുമത്തിയ ഹൈക്കോടതി സിംഗിള് ബെഞ്ച് ഉത്തരവിനെതിരെ സി.പി.എം കണ്ണൂര് ജില്ലാ സെക്രട്ടറി പി.ജയരാജന് ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ചിനെ സമീപിച്ചു. കതിരൂര് മനോജ് വധക്കേസിലെ 25ാം പ്രതിയായ പി. ജയരാജന് ഉള്പ്പെടെ ആറ് പേരാണ് യു.എ.പി.എ പിന്വലിക്കണമെന്ന് ആവശ്യപ്പെട്ട് ഹര്ജി നല്കിയത്. എന്നാല് ഹൈക്കോടതി സിംഗിള് ബെഞ്ച് തളളിയിരുന്നു. ഇതോടെയാണ് ഡിവിഷന് ബെഞ്ചിനെ സമീപിച്ചത്.
ജയരാജന് സിംഗിള് ബെഞ്ചിനെ സമീപിച്ചപ്പോള് സംസ്ഥാന സര്ക്കാര് അദ്ദേഹത്തിന് അനുകൂലമായ തീരുമാനം എടുത്തിരുന്നു. ഇതിനെ കോടതി അന്ന് രൂക്ഷമായി വിമര്ശിച്ചിരുന്നു. സര്ക്കാര് പ്രതികളെ സഹായിക്കുകയാണോ എന്നായിരുന്നു കോടതി ചോദിച്ചത്. കേസില് യു.എ.പി.എ പ്രകാരം പ്രോസിക്യൂഷന് കേന്ദ്രസര്ക്കാര് നല്കിയ അനുമതി ചോദ്യം ചെയ്ത് പി.ജയരാജന് നല്കിയ ഹര്ജിയില് പ്രതികള്ക്ക് അനുകൂലമായി നിലപാട് എടുക്കുകയായിരുന്നു സര്ക്കാര്.
സര്ക്കാര് സമര്പ്പിച്ച സത്യവാങ്മൂലത്തില് നിരവധി പൊരുത്തക്കേടുകളുണ്ടായിരുന്നു. യു.എ.പി.എ ചുമത്തിയതിനെതിരായ സത്യവാങ്മൂലം എങ്ങനെ നിലനില്ക്കും. പ്രതികളെ രക്ഷിക്കാനാണോ സര്ക്കാര് ശ്രമിക്കുന്നതെന്നും കോടതി ചോദിച്ചിരുന്നു. ആദിവാസികളെ പിടികൂടിയാല് യു.എ.പി.എ ചുമത്താന് സര്ക്കാരിന് വലിയ ഉത്സാഹമാണ്, എന്നാല് ബോംബ് എറിയുന്നവര് സ്വതന്ത്രരായി നടക്കുകയാണെന്നും കോടതി വിമര്ശിച്ചിരുന്നു.
https://www.facebook.com/Malayalivartha
