കെ.പി.സി.സി നേതൃനിരയിലേക്ക് യുവനേതാക്കള് വരുന്നു; മുതിര്ന്ന നേതാക്കള്ക്ക് മറ്റ് സംസ്ഥാനങ്ങളുടെ ചുമതല നല്കും
രാഹുല്ഗാന്ധി കോണ്ഗ്രസ് അധ്യക്ഷസ്ഥാനം ഏറ്റെടുത്തതോടെ കേരളത്തിലെ കോണ്ഗ്രസില് അടിമുടിമാറ്റം വരുന്നു. നേതൃനിരയിലേക്ക് യുവാക്കളെ പ്രതിഷ്ഠിക്കുകയാണ് രാഹുലിന്റെ ആദ്യനടപടി. ഇതിന് മുന്നോടിയായി കെ.പി.സി.സി പ്രസിഡന്റ് എം.എം ഹസനെ മാറ്റും. പകരം മുപ്പത്തഞ്ച് - നാല്പ്പത് വയസുള്ളയാളെ കെ.പി.സി.സി അധ്യക്ഷനാക്കാനാണ് രാഹുല് തീരുമാനിച്ചത്. ഇതിനെതിരെ കേരളത്തിലെ വന്ധ്യവയോധികരെല്ലാം കൈകോര്ത്തു. അങ്ങനെ നാല്പ്പതെന്നുള്ളത് രാഹുല് അന്പത്തഞ്ചാക്കി ഉയര്ത്തി. വി.ഡി സതീശനെയും പി.സി വിഷ്ണുനാഥിനെയും പോലുള്ള നേതാക്കളെയെങ്കിലും തലപ്പത്ത് കൊണ്ടുവരാമെന്നുള്ള ആശ്വാസത്തിലാണ് ഗ്രൂപ്പ് ചാമ്പ്യന്മാര്. ഉമ്മന്ചാണ്ടിയേയും രമേശ് ചെന്നിത്തലയേയും മുല്ലപ്പള്ളി രാമചന്ദ്രനേയും കോണ്ഗ്രസ് പ്രവര്ത്തക സമിതിയിലേക്ക് എടുത്തേക്കും. രാഹുല്ഗാന്ധി ഇത് സംബന്ധിച്ച് വ്യക്തമായ സൂചന നല്കിയിട്ടുണ്ട്.
ഗ്രൂപ്പ് രാഷ്ട്രീയത്തിന് അതീതമായി കേരളത്തില് പാര്ട്ടിയെ ശക്തിപ്പെടുത്താന് കഴിവുള്ളത് യുവനേതൃത്വത്തിനാണെന്ന് കോണ്ഗ്രസ് അധ്യക്ഷന് വിശ്വസിക്കുന്നു. അദ്ദേഹത്തിന് നന്നായി ആശയവിനിമയം നടത്താനാകുന്നതും യുവനേതാക്കളുമായാണ്. മാത്രമല്ല, അഴിമതിയിലും സ്വജനപക്ഷപാതത്തിലും യുവനിരയ്ക്ക് വലിയ താല്പര്യവുമില്ല. കേരളത്തില് മാത്രമല്ല മറ്റ് സംസ്ഥാനങ്ങളിലും ഈ രീതിയിലുള്ള മാറ്റമാണ് വരാന് പോകുന്നത്. വര്ഷങ്ങളായി പാര്ട്ടിയിലും പാര്ലമെന്ററി തലത്തിലും ഒരേ പദവികള് വഹിക്കുന്നവരെ ഉറപ്പായും മാറ്റും. ഇതില് ഏറ്റവും വലിയ തിരിച്ചടി കിട്ടാന് പോകുന്നത് രാജ്യസഭാ ഉപാധ്യക്ഷന് രാഹുല്ഗാന്ധിക്കും കെ.വി തോമസ് എം.പിക്കുമാണ്. സോണിയാഗാന്ധിയുടെ വിശ്വസ്ഥാരായിരുന്നു ഇരുവരും. പി.ജെ കുര്യന്റെ കാലാവധി താമസിക്കാതെ അവസാനിക്കും. സോണിയയുടെ വിശ്വസ്ഥരായവരെയൊന്നും രാഹുല് അടുപ്പിക്കുന്നില്ല. എ.കെ ആന്റണിയുടെ കാര്യത്തില് മാത്രമാണ് അതില് അയവ് വരുത്തിയിരിക്കുന്നത്.
കഴിഞ്ഞ യു.ഡി.എഫ് സര്ക്കാരിന്റെ കാലത്തെ അഴിമതിയും ഗ്രൂപ്പ് പോരും സോളാര് കേസും അടക്കം പാര്ട്ടിയെ ജനങ്ങളില് നിന്നകറ്റി. അതിനാല് ജനങ്ങളിലേക്ക് ഇറങ്ങിച്ചെന്ന് പ്രവര്ത്തിക്കുന്ന നേതാക്കളെയാണ് രാഹുല് നോട്ടമിട്ടിട്ടുള്ളത്. വി.ടി ബല്റാം, ഷാഫി പറമ്പില് തുടങ്ങിയ നേതാക്കളുടെ പ്രവര്ത്തനങ്ങളില് രാഹുല് ഗാന്ധിക്ക് വലിയ മതിപ്പാണുള്ളത്. ഒരു ഗ്രൂപ്പിലും സജ്ജീവമാകാതെ പ്രവര്ത്തിക്കുന്ന നല്ല നേതാക്കളെയും പരിഗണിക്കും. യൂത്ത്കോണ്ഗ്രസ് നേതാക്കളായ സി.ആര് മഹേഷ്, ഡീന്കുര്യാക്കോസ്, ചില വനിതാ നേതാക്കള് എന്നിവര് രാഹുലിന്റെ ഗുഡ് ലിസ്റ്റില് ഇടം നേടിയിട്ടുണ്ട്.
മുതിര്ന്ന നേതാക്കളില് പലര്ക്കും മറ്റ് സംസ്ഥാനങ്ങളുടെയും അവിടുത്തെ പ്രവര്ത്തനങ്ങളുടെ ചുമതലയും നല്കും. കാരണം അടുത്തിടെ നിയമസഭാ തെരഞ്ഞെടുപ്പ് നടന്ന സംസ്ഥാനങ്ങളില് കേരളത്തിലെ നേതാക്കള്ക്ക് ചുമതല നല്കിയിടത്ത് മാത്രമാണ് കോണ്ഗ്രസിന് ഭേദപ്പെട്ട പ്രകടനം നടത്താനായത്. വടക്ക് കിഴക്കന് സംസ്ഥാനങ്ങളില് കോണ്ഗ്രസിനെ ജനങ്ങള് തൂത്തെറിഞ്ഞപ്പോള് മേഘാലയയില് പിടിച്ചു നില്ക്കാനായി. അവിടെ ഉമ്മന്ചാണ്ടിയും ആന്റോ ആന്റണിയും ആയിരുന്നു തെരഞ്ഞെടുപ്പ് പ്രവര്ത്തനങ്ങള്ക്ക് ചുക്കാന് പിടിച്ചത്. ഉമ്മന്ചാണ്ടിയും രമേശ് ചെന്നിത്തലയുമാണ് ഗോവന് നിയമസഭാ തെരഞ്ഞെടുപ്പ് പ്രചാരണത്തിന് നേതൃത്വം നല്കിയത്. തെരഞ്ഞെടുപ്പ് നടക്കാനിരിക്കുന്ന കര്ണാടക നിയമസഭാ തെരഞ്ഞെടുപ്പ് പ്രചരണങ്ങള് നിയന്ത്രിക്കുന്നത് കെ.സി വേണുഗോപാലും പി.സി വിഷ്ണുനാഥുമാണ്.
https://www.facebook.com/Malayalivartha
