സംസ്ഥാനത്ത്് സര്‍ക്കാര്‍, എയ്ഡഡ് മേഖലയില്‍ പ്രവര്‍ത്തിക്കുന്ന 24 എന്‍ജിനിയറിംഗ് കോളജുകള്‍ക്ക് സ്വയംഭരണ പദവിക്കായി അപേക്ഷിക്കാന്‍ സര്‍ക്കാര്‍ അനുമതി. ഇതില്‍ 21 എണ്ണവും സര്‍ക്കാര്‍ കോളജുകളാണ്.
ടെക്‌നിക്കല്‍ എഡ്യുക്കേഷന്‍ ക്വാളിറ്റി ഇംപ്രൂവ്‌മെന്റ് പ്രോഗ്രാം (ടിടിഐക്യു ഐ പി) മുഖേന സാങ്കേതിക വിദ്യാഭ്യാസ സ്ഥാപനങ്ങള്‍ക്കു മൂന്നാംഘട്ടത്തില്‍ കേന്ദ്രഫണ്ട് ലഭിക്കണമെങ്കില്‍ കോളജുകള്‍ക്കു സ്വയംഭരണ പദവി നിര്‍ബന്ധമാണ്. ഇതുസംബന്ധിച്ച് മാനവ വിഭവശേഷി വികസന വകുപ്പ് ഉത്തരവ് ഇറക്കിയിരുന്നു.
കേന്ദ്ര ഫണ്ട് ലഭ്യമായില്ലെങ്കില്‍ സര്‍ക്കാര്‍ എന്‍ജിനിയറിംഗ് കോളജുകളുടെ പ്രവര്‍ത്തനം കടുത്ത പ്രതിസന്ധിയിലാകുമെന്ന് ഉറപ്പായതോടെയാണ് സര്‍ക്കാരിന്റെ നിലപാടു മാറ്റം. ഈ സാഹചര്യത്തിലാണ് ടിഐക്യു ഐ പി ഒന്നും രണ്ടും ഘട്ടങ്ങള്‍ നടപ്പാക്കിയ സംസ്ഥാനത്തെ 24 എന്‍ജിനിയറിംഗ് കോളജുകള്‍ അക്കഡേമിക് ഓട്ടോണമിക്കായി യുജിസിയെ സമീപിക്കുന്നതിനു സര്‍ക്കാരിനു സമ്മതമാണെന്നു കാട്ടി ഉന്നത വിദ്യാഭ്യാസ വകുപ്പ് കഴിഞ്ഞ ആഴ്ച ഉത്തരവിറക്കിയത്. ജി.ഒ 573/2018 ആയി പ്രിന്‍സിപ്പല്‍ സെക്രട്ടറി ഉഷാ ടൈറ്റസ് ആണ് ഉത്തരവ് ഇറക്കിയത്.