തൃശൂര് തളിക്കുളത്ത് എ.ഐ.വൈ.എഫ് യൂണിറ്റ് രൂപീകരിച്ച് സ്ഥാപിച്ച കൊടി ഡി.വൈ.എഫ്.ഐ പ്രവര്ത്തകര് കത്തിച്ചു; ഇരു യുവജനസംഘടനകളും തമ്മിലുള്ള പോര് പ്രാദേശികതലത്തിലും ശക്തം
സി.പി.എം- സി.പി.ഐ പോരിന് പിന്നാലെ ഇരുപാര്ട്ടികളുടെയും യുവജനസംഘടനകളും തമ്മിലുള്ള അഭിപ്രായഭിന്നതയും സംഘര്ഷങ്ങളും രൂക്ഷമാകുന്നു. തൃശൂര് തളിക്കുളം തമ്പാന് കടവില് എ.ഐ.വൈ.എഫ് യൂണിറ്റ് രൂപീകരിച്ചിരുന്നു. ഇതിന്റെ ഭാഗമായി സ്ഥാപിച്ച പതാക ഡി.വൈ.എഫ്.ഐ പ്രവര്ത്തകര് കത്തിച്ചു. വീഡിയോ സമൂഹമാധ്യമങ്ങളിലൂടെ പ്രചരിപ്പിക്കുകയും ചെയ്തു. ഇതിനെതിരെ വ്യാപകപ്രതിഷേധം ഉയര്ന്നിട്ടുണ്ട്. സംസ്ഥാനത്തുടനീളം ഇരുയുവജന സംഘടനകള് തമ്മില് തര്ക്കം നിലവിലുണ്ട്. അടുത്തിടെ പുനലൂരില് എ.ഐ.വൈ.എഫ് പ്രവര്ത്തകര് കൊടിനാട്ടിയതിനെ തുടര്ന്ന് വര്ക്ക്ഷോപ്പ് ഉടമ മരിച്ച സംഭവത്തില് ഡി.വൈ.എഫ്.ഐ പ്രവര്ത്തകര് പ്രതിഷേധവുമായി രംഗത്തെത്തിയിരുന്നു. പുനലൂരില് വര്ക്ക്ഷോപ്പ് ഉടമ ആത്മഹത്യ ചെയ്ത സംഭവത്തില് എ.ഐ.വൈ.എഫ്.ഐ പ്രവര്ത്തകരെ അറസ്റ്റ് ചെയ്തിരുന്നു.
കണ്ണൂര് കീഴാറ്റൂരില് വയല് നികത്തി ബൈപ്പാസ് പണിയുന്നതിനെതിരെ വയല്ക്കിളികള് നടത്തുന്ന സമരത്തിന് ഐക്യദാര്ഢ്യം പ്രഖ്യാപിച്ച് എ.ഐ.വൈ.എഫ് നേതാക്കള് എത്തിയിരുന്നു. സമരത്തിനെതിരെ സി.പി.എം നാട്കാവല് എന്ന പേരില് ബദല് സമരം തുടങ്ങുന്നതിന് മുന്നോടിയായി ആയിരുന്നു സന്ദര്ശനം. വയനാട്ടില് മിച്ചഭൂമി വില്ക്കാന് സി.പി.ഐ ജില്ലാ സെക്രട്ടറി വിജയന് ചെറുകര സഹായിച്ചെന്ന വാര്ത്ത കഴിഞ്ഞ ദിവസം പുറത്ത് വന്നതിന് പിന്നാലെ ഡി.വൈ.എഫ്.ഐക്കാര് വയനാട് കളക്ടറേറ്റിലേക്ക് മാര്ച്ച് നടത്തിയിരുന്നു.
തിരുനന്തപുരം ആറ്റുകാലില് ഉള്പ്പെടെ സ്വകാര്യവ്യക്തിയുടെ ഭൂമിയില് എ.ഐ.വൈ.എഫ് കൊടികുത്തിയതിനെതിരെ സി.പി.എം രംഗത്ത് വന്നിരുന്നു. പ്രതിഷേധത്തെ തുടര്ന്ന് ഡി.വൈ.എഫ്.ഐയുടെ കൊടി മാറ്റിയിട്ടും എ.ഐ.വൈ.എഫ്.ഐ പിന്മാറിയിരുന്നില്ല. കൊടികുത്തിയുള്ള സമരങ്ങള് അനാവശ്യമാണെന്നും ഇത് നിയന്ത്രിക്കേണ്ട കാലം അതിക്രമിച്ചെന്നും മുഖ്യമന്ത്രി പിണറായി വിജയന് നിയമസഭയില് പ്രസ്താവിച്ചിരുന്നു. അതിനെതിരെ കാനം രാജേന്ദ്രന് രംഗത്തെത്തിയിരുന്നു.
https://www.facebook.com/Malayalivartha
