വയനാട്ടിലെ മിച്ചഭൂമി മറിച്ച് വില്‍ക്കാന്‍ സി.പി.ഐയും അവര്‍ ഭരിക്കുന്ന റവന്യൂവകുപ്പും തട്ടിപ്പുകള്‍ നടത്തുന്നതിന്റെ കൂടുതല്‍ വിവരങ്ങള്‍ ഏഷ്യാനെറ്റ് ന്യൂസ് പുറത്ത് കൊണ്ടുവരുന്നു. ആദര്‍ശ വീരന്‍മാരെന്ന് മേലങ്കിയണിയുന്ന സി.പി.ഐ സംസ്ഥാനനേതൃത്വം ഇതോടെ വെട്ടിലായിരിക്കുകയാണ്. സി.പി.ഐയുടെ ചില പ്രാദേശിക നേതാക്കള്‍ ഏഷ്യാനെറ്റ് റിപ്പോര്‍ട്ടറെ ഫോണിലൂടെ ഭീഷണിപ്പെടുത്തുകയും ചെയ്തു. വ്യാജ വാര്‍ത്തയെന്ന് ആരോപിച്ച് വയനാട്ടില്‍ എ.ഐ.വൈ.എഫ് പ്രകടനവും നടത്തി. വയനാട് മക്കിമലയിലും ഭൂമാഫിയയുടെ പിടിയിലാണെന്ന് ഇന്ന് രാവിലെയാണ് ഏഷ്യാനെറ്റ് വാര്‍ത്ത പുറത്ത് വിട്ടത്. ഇതോടെ സി.പി.ഐയുടെ കയ്യില്‍ നിന്ന് റവന്യൂ വകുപ്പ് തിരിച്ച് പിടിക്കണമെന്ന ആവശ്യം സി.പി.എം പ്രവര്‍ത്തകര്‍ മുഖ്യമന്ത്രിയോട് ആവശ്യപ്പെട്ടു. ചെങ്ങന്നൂര്‍ ഉപതെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ സര്‍ക്കാരിന്റെ മുഖം രക്ഷിക്കാന്‍ ഇതേ മാര്‍ഗമുള്ളൂ എന്നും പ്രവര്‍ത്തകര്‍ പറയുന്നു.

പട്ടാളക്കാര്‍ക്ക് സര്‍ക്കാര്‍ കൊടുത്ത ഭൂമി തട്ടിയെടുത്താണ് തട്ടിപ്പ് നടത്തുന്നത്. ഭൂമിക്ക് രേഖയുണ്ടാക്കാന്‍ മാനന്തവാടിയിലെ പ്രദേശിക സി.പി.ഐ പ്രാദേശിക നേതാവ് സജീവനാണ് സഹായിക്കുന്നത്. വയനാട് തവിഞ്ഞാല്‍ വില്ലേജിലെ മക്കിമലയില്‍ സൈനികര്‍ക്ക് സര്‍ക്കാര്‍ കൊടുത്ത ഭൂമിയാണിത്. വ്യാജ രേഖകളും അധാരവുമുണ്ടാക്കി 1084 ഏക്കറാണ് ഭൂ മാഫിയ തട്ടിയെടുത്തത്. പട്ടയ രേഖകള്‍ നശിപ്പിച്ചും കരം സ്വീകരിച്ചും കയ്യേറ്റക്കാര്‍ക്ക് റവന്യൂ ഉദ്യോഗസ്ഥരും കൂട്ടു നിന്നു. പിതാവിന് സര്‍ക്കാര്‍ കൊടുത്ത ഭൂമി കണ്ടെത്താന്‍ പത്തു വര്‍ഷമായി റവന്യൂ ഓഫിസുകള്‍ കയറി ഇറങ്ങുകയാണ് കമ്പളക്കാട് സ്വദേശി റഹീം.

പിതാവും വിമുക്തഭടനുമായ ഷംസുദീന് 1967 ല്‍ മക്കിമലയില്‍ മൂന്ന് ഏക്കര്‍ ഭൂമി സര്‍ക്കാര്‍ കൊടുത്തിരുന്നു. ഷംസുദീനെപ്പോലെ മക്കിമലയില്‍ 348 പട്ടാളക്കാര്‍ക്ക് സര്‍ക്കാര്‍ കൊടുത്ത ഭൂമി എവിടെപ്പോയി എന്ന അന്വേഷണം എത്തിച്ചത് വ്യാജ ആധാരവും രേഖകളും ഉണ്ടാക്കി ഭൂമി കയ്യേറി മറിച്ചു വില്‍ക്കുന്ന സംഘത്തിലേയ്ക്കാണ് . ഉദ്യോഗസ്ഥരും ഇടനിലക്കാരും രാഷ്ട്രീയക്കാരും അടങ്ങുന്ന ഈ സംഘത്തിലെ ഒരു കണ്ണിയാണ് മക്കിമലക്കാരന്‍ ലക്ഷ്മണന്‍.

സ്ഥലം വാങ്ങാമെന്ന് ഉറപ്പു കൊടുത്തപ്പോള്‍ ലക്ഷമണന്‍ സ്ഥലം കാണിച്ചു തന്നു. ലക്ഷ്മണന്റെ നിര്‍ദേശപ്രകാരം തരുവണ സ്വദേശി ഉസ്മാനെ കണ്ടു. ഭൂമിക്ക് രേഖയുണ്ടാക്കാന്‍ ഉസ്മാന് പിന്നാലെ മാനന്തവാടിയിലെ സി.പി.ഐ പ്രാദേശിക നേതാവ് സജീവനെ കണ്ടു. സജീവന്‍ നിര്‍ദേശിച്ചത് അനുസരിച്ച് വാടാട് വില്ലേജ് ഓഫിസര്‍ രവിയെ വീട്ടിലെത്തി കണ്ടു. ആദ്യ ഗഡു രണ്ടായിരം രൂപ വാങ്ങി. ലക്ഷങ്ങള്‍ വിലയുള്ള സര്‍ക്കാര്‍ ഭൂമി കയ്യേറിയും കള്ള രേഖയുണ്ടാക്കിയും മറിച്ചു വില്‍ക്കുന്നതിന് കൂട്ടു നില്‍ക്കുമ്പോള്‍ റഹീമിനെപ്പോലുള്ളവരുടെ ആവലാതി റവന്യു ഉദ്യോഗസ്ഥര്‍ കേള്‍ക്കുന്നതെങ്ങനെയാണ്.