മുഖ്യമന്ത്രി പിണറായിയിലെ വീട്ടില്‍ വിഷു ആഘോഷിക്കാനെത്തിയപ്പോഴാണ് നാട്ടുകാര്‍ പടന്നക്കരയിലെ വണ്ണത്താന്‍ വീട്ടിലെ ദുരൂഹമരണങ്ങളെ കുറിച്ച് പറഞ്ഞത്. ഉടന്‍ തന്നെ അദ്ദേഹം അവിടെയെത്തി കാര്യങ്ങള്‍ തിരക്കിയ ശേഷം തലശേരി എ.എസ്.പി ചൈത്ര തെരേസ ജോണിനെ വിളിച്ച് വരുത്തി അന്വേഷണം കാര്യക്ഷമമായി നടത്തണമെന്ന് ആവശ്യപ്പെട്ടു. തലശേരി ടൗണ്‍ സി.ഐ പ്രേമചന്ദ്രനാണ് കേസ് അന്വേഷിച്ചത്. മേല്‍നോട്ടും എ.എസ്.പിക്കും. തന്റെ ചുരുങ്ങിയ സര്‍വ്വീസിനിടെ ഇത്തരത്തില്‍ ദുരൂഹമായൊരു കേസ് ആദ്യമാണെന്ന് എ.എസ്.പി പറഞ്ഞു. ക്രൈംബ്രാഞ്ച് കേസ് ഏറ്റെടുക്കുമെന്ന സമ്മര്‍ദ്ദവും പ്രതി സൗമ്യയുടെ നിസഹകരണവും സാക്ഷികളില്ലാത്തതും അന്വേഷണ സംഘത്തെ വലച്ചു. ഓരോ ദിവസവും കേസിന്റെ പുരോഗതിയെ കുറിച്ച് മുഖ്യമന്ത്രിയുടെ ഓഫീസില്‍ നിന്ന് വിളിച്ച് അന്വേഷിക്കുമായിരുന്നു.

സൗമ്യയോട് കാര്യങ്ങള്‍ തിരക്കിയ മുഖ്യമന്ത്രി വിവിധ വകുപ്പുകളുടെ അന്വേഷണത്തിനും ഉത്തരവിട്ടിരുന്നു. അതിനാല്‍ ആരോഗ്യ, ജലവിഭവ വകുപ്പുകളിലെ ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. 10 ദിവസമാണ് പൊലീസ് അന്വേഷത്തിനായി എടുത്തത്. ശാസ്ത്രീയമായ തെളിവുകള്‍ മാത്രമായിരുന്നു ആശ്രയം. തലശേരി സഹകരണ ആശുപത്രിയില്‍ ചികില്‍സയിലായിരുന്ന സൗമ്യ ഡിസ്ചാര്‍ജ്ജ് ചെയ്ത ശേഷം രഹസ്യമായി കസ്റ്റഡിയിലെടുത്തു. ഗവണ്‍മെന്റ് ഗസ്റ്റ്ഹൗസിലെത്തി ചോദ്യം ചെയ്‌തെങ്കിലും കാര്യമായ വിവരങ്ങള്‍ ലഭിച്ചില്ല. അതോടൊപ്പം സൗമ്യയുമായി ബന്ധമുള്ള 30തോളം പേരെ കസ്റ്റഡിയിലെടുത്ത് ചോദ്യം ചെയ്തു. സൗമ്യയുടെ ഫോണ്‍ രേഖകളും പരിശോധിച്ചു.

സൗമ്യയുടെ മകള്‍ ഐശ്വര്യയുടെ മൃതദേഹം പുറത്തെടുത്ത് വീണ്ടും പോസ്റ്റ്‌മോര്‍ട്ടം ചെയ്യാന്‍ സമയമെടുത്തു. സബ്ഡിവിഷന്‍ മജിസ്‌ട്രേട്ടിന്റെ ഉത്തരവിനായുള്ള കാത്തിരിപ്പ് മാത്രമായിരുന്നു പ്രശ്‌നം. അത് കിട്ടിയതോടെ അന്വേഷണ സംഘത്തിന് ആശ്വാസമായി. പോസ്റ്റ്‌മോര്‍ട്ടത്തിന് ശേഷം പരിശോധനാഫലം പെട്ടെന്ന് കിട്ടി. തെളുവുകള്‍ ശേഖരിച്ച ശേഷം സൗമ്യയെ പത്ത് മണിക്കൂറിലധികമാണ് ചോദ്യം ചെയ്തത്. എന്നിട്ടും കുറ്റസമ്മത മൊഴിയെടുക്കാന്‍ ഏറെ പ്രയാസപ്പെട്ടു. കുറ്റകൃത്യങ്ങളുടെ ഗൗരവം അറിയാത്ത സൗമ്യയ്ക്ക് യാതൊരു കൂസലും ഇല്ലായിരുന്നെന്ന് എ.എസ്.പി പറഞ്ഞു. അതിനിടെ കേസ് ക്രൈംബ്രാഞ്ചിന് വിടാനുള്ള നീക്കങ്ങളും തുടങ്ങി. ക്രൈംബ്രാഞ്ച് ഡിവൈ.എസ്.പി രഘുരാമന്റെ നേതൃത്വത്തിലുള്ള സംഘം തലശേരിയിലെത്തി.

അന്വേഷണത്തിന്റെ അവസാനഘട്ടത്തില്‍ ക്രൈംബ്രാഞ്ച് കേസ് ഏറ്റെടുത്താല്‍ ഇതുവരെ ചെയ്തതെല്ലാം വെള്ളത്തിലാകും. അങ്ങനെ സമ്യയ്ക്ക് സഹായം ചെയ്ത ചിലരെ വിളിച്ചുവരുത്തി അവര്‍ക്കൊപ്പം ചോദ്യം ചെയ്തതോടെ കാര്യങ്ങള്‍ എളുപ്പമായി. മനസ് തുറക്കാത്ത സൗമ്യ കാര്യങ്ങള്‍ തത്തപറയും പോലെ പറഞ്ഞു. അതോടെയാണ് അന്വേഷണ സംഘത്തിന് ആശ്വാസമായത്.