കണ്ണിറുക്കി സോഷ്യല്‍ മീഡിയയില്‍ തരംഗമായ പ്രിയാ വാര്യര്‍ക്ക് പിന്നാലെ കെഎസ്ആര്ടിസി ബസിനോട് കളങ്കമില്ലാത്ത സ്‌നേഹം പ്രകടിപ്പിച്ച് സമൂഹമാധ്യമങ്ങളില്‍ താരമായ കോട്ടയം സ്വദേശിനി റോസ്മിയ്ക്ക് സിനിമയില്‍ നിന്നും ഓഫറുകള്‍ ലഭിച്ചതായി റിപ്പോര്‍ട്ട്. ചില നവാഗതരായ സംവിധായകരും റോസ്മിയുടെ ബസിനെ പ്രണയിച്ച കഥയ്ക്കായി റോസ്മിയെസമീപിച്ചതായും സൂചന ലഭിക്കുന്നുണ്ട്. എന്നാല്‍ ഈ വാര്‍ത്തകളെ സബന്ധിച്ച് പ്രതികരിക്കാന്‍ റോസ്മി തയ്യാറായിട്ടില്ല. ഞങ്ങളുടെ റൂട്ടിലോടുന്ന പ്രിയ കെഎസ്ആര്ടിസി ബസിനെ ഞങ്ങള്‍ക്ക് തിരിച്ചു വേണമെന്നാവശ്യവുമായി കെഎസ്ആര്‍ടിസി എംഡി ടോമിന് തച്ചങ്കരിയെ ഫോണില് വിളിച്ചതാണ് റോസ്മിയെ ഏവരുടെയും പ്രിയങ്കരിയാക്കിയത്. കോട്ടയത്ത് സ്പീഡ് വിംഗ്‌സില്‍ അയാട്ട വിത്ത് ഏവിയേഷന്‍ കോഴ്‌സ് പഠിക്കുകയാണ് റോസ്മി.

'അത് ഞങ്ങളുടെ ചങ്ക് വണ്ടിയായിരുന്നു സാര്... എന്തിനാണ് ആ ബസ് ആലുവയിലേക്ക് കൊണ്ടുപോയത്. ആലുവ ഡിപ്പോയില്‍ ഇത്ര ദാരിദ്ര്യമാണോ' എന്നു റോസ്മി ഫോണില്‍ നടത്തിയ അഭ്യര്‍ത്ഥനയിലാണ് ബസ് ഈരാറ്റുപേട്ട ഗാരേജില്‍ നിലനിറുത്താനും ചങ്ക് എന്ന് ബസില്‍ എഴുതാനും കാരണമായത്. ഇതോടെ തെളിഞ്ഞത് കെഎസ്ആര്ടിസി ബസ് എന്ന വാഹനത്തോടുള്ള ആ പെണ്‍കുട്ടിയുടെ കളങ്കമില്ലാത്ത സ്‌നേഹമാണ്.

കഴിഞ്ഞ ദിവസം റോസ്മി കെഎസ്ആര്ടിസി എംഡി ടോമിന്‍ ജെ. തച്ചങ്കരിയെ സന്ദര്‍ശിച്ചിരുന്നു. ഇതിനു പിന്നാലെയാണ് സിനിമയില്‍ അവസരം ലഭിച്ചെന്ന വാര്‍ത്തകള്‍ പുറത്ത് വന്നിരിക്കുന്നത്. കോളജിലേക്കുള്ള യാത്രയിലാണ് റോസ്മി ഈരാറ്റുപേട്ട ഡിപ്പോയുടെ ആര്‍എസ് സി 140 കോട്ടയം-കട്ടപ്പന ലിമിറ്റഡ് സ്റ്റോപ്പ് വേണാട് ബസില്‍ യാത്ര ചെയ്തിരുന്നത്. രാവിലെ 8.50നു കൊട്ടാരമറ്റത്തുനിന്നോ പാലാ റിവര്വ്യു സ്റ്റോപ്പില്‍ നിന്നോ റോസ്മി ഇതേ ബസില്‍ മുടങ്ങാതെ കയറും.

കണ്ടക്ടറായിരുന്ന ഈരാറ്റുപേട്ട സ്വദേശി സമീറിന്റെ ഫേസ് ബുക്ക് പോസ്റ്റിലൂടെയാണ് ഈ ബസ് ആലുവയിലേക്ക് മാറ്റുകയാണെന്നു റോസ്മി അറിഞ്ഞത്. തുടര്‍ച്ചയായി ബസ് കാണാതായതോടെ റോസ്മി ആലുവ ഡിപ്പോയിലേക്കു നടത്തിയ ഫോണ് സംഭാഷണത്തിന്റെ അടിസ്ഥാനത്തിലാണ് 'ചങ്ക്' ബസ് വീണ്ടും ഈരാട്ടു പേട്ടയിലേയ്ക്ക് എത്തിയത്. ചങ്ക് കൂട്ടുകാരി തന്നെ കെഎസ്ആര്‍ടിസി പരസ്യങ്ങളില്‍ മോഡലാകുമെന്നും വാര്‍ത്തയും വരുന്നുണ്ട്.