കണ്ണൂരിൽ മകൻ അച്ഛനെ തലയ്ക്കടിച്ചു കൊന്നതായി റിപ്പോർട്ടുകൾ. കണ്ണൂരിലെ വെങ്ങാട്ട് ചൊവ്വാഴ്ച്ച രാത്രിയിലാണ് ഇത്തരത്തിലൊരു സംഭവം അരങ്ങേറിയത്. വേങ്ങാട് ചന്ദ്രന്‍ (65) ആണ് മകന്‍ നിജിലിന്റെ അടിയേറ്റ് കൊല്ലപ്പെട്ടത്.

പോലീസ് ചോദ്യം ചെയ്യലിൽ നിജില്‍ കുറ്റം സമ്മതിച്ചു. സംഭവദിവസം അച്ഛനും മകനും തമ്മില്‍ വാക്കു തര്‍ക്കമുണ്ടാവുകയും തര്‍ക്കം മൂര്‍ച്ഛിച്ചു പരസ്പരം അടിപിടിയാവുകയുമായിരുന്നു. പിന്നീട് ദേഷ്യത്താല്‍ നിജില്‍ അച്ഛനെ കല്ല് കൊണ്ട് തലക്ക് അടിക്കുകയായിരുന്നു. അടിയേറ്റ ചന്ദ്രന്‍ തല്‍ക്ഷണം മരിച്ചു വീണു. കൂത്തുപറമ്പ് സി ഐ ജോഷി ജോസിന്റെ നേതൃത്വത്തിലുള്ള പോലീസ് സംഘമാണ് നിജിലിനെ പിടികൂടിയത്.

കൊല്ലപ്പെട്ട ചന്ദ്രന്‍ നാല് വിവാഹം കഴിച്ചിട്ടുളളതായും, ഇതില്‍ രണ്ടാമത്തെ ഭാര്യയിലുള്ള മകനാണ് താന്‍ എന്നും, തനിക്ക് രണ്ടു മാസം പ്രായമുള്ളപ്പോള്‍ അമ്മ ആത്മഹത്യ ചെയുകയായിരുന്നുവെന്നും പിന്നീട് അച്ഛന്‍ വേറെ വിവാഹം കഴിക്കുകയും തന്നെ നിരന്തരം ഉപദ്രവിക്കുകയും ചെയ്തിരുന്നുവെന്നുമാണ് നിജില്‍ പോലീസിന് മൊഴിനല്‍കിയത്.

ഈ കാരണങ്ങളാൽ നിജിലിന് അച്ഛനോട് മുൻപേ ദേഷ്യം ഉണ്ടായിരുന്നു എന്നാല്‍ സംഭവ ദിവസം ചന്ദ്രന്‍ നിജിലിന്റെ മരിച്ചുപോയ അമ്മയെ കുറിച്ച്‌ മോശമായി സംസാരിച്ചതിനാലാണ് ദേഷ്യം ഇരട്ടിച്ച നിജില്‍ കല്ലുകൊണ്ട് ചന്ദ്രന്റെ തലയിലിടിച്ചത്. ഗുരുതരമായി പരിക്കു പറ്റിയ ചന്ദ്രന്‍ തല്‍ക്ഷണം മരണപ്പെടുകയായിരുന്നുവെന്നും പോലീസ് വ്യക്തമാക്കുന്നു.