ചെങ്ങന്നൂര് ഉപതെരഞ്ഞെടുപ്പില് നിലപാട് തീരുമാനിക്കാന് ബി.ഡി.ജെ.എസ് നിര്ണായക സംസ്ഥാന കൗണ്സില് യോഗം ഇന്ന്; ബോര്ഡ് കോര്പറേഷന് സ്ഥാനങ്ങളില് ബി.ജെ.പി. കേന്ദ്രനേതൃത്വം വാക്കു പാലിക്കാത്തതില് പ്രതിഷേധിച്ച് ചെങ്ങന്നൂരില് മനഃസാക്ഷി വോട്ടിന് ആഹ്വാനം ചെയ്തേക്കും
ചെങ്ങന്നൂര് ഉപതെരഞ്ഞെടുപ്പില് നിലപാട് തീരുമാനിക്കാന് ബി.ഡി.ജെ.എസ് നിര്ണായക സംസ്ഥാന കൗണ്സില് യോഗം ഇന്ന്. ബോര്ഡ് കോര്പറേഷന് സ്ഥാനങ്ങളില് ബി.ജെ.പി. കേന്ദ്രനേതൃത്വം വാക്കു പാലിക്കാത്തതില് പ്രതിഷേധിച്ച് ചെങ്ങന്നൂരില് മനഃസാക്ഷി വോട്ടിന് ആഹ്വാനം ചെയ്തേക്കും.
കഴിഞ്ഞ നിയമസഭാ തെരഞ്ഞെടുപ്പില് ചെങ്ങന്നൂരിലെ എന്.ഡി.എ. സ്ഥാനാര്ഥി പി.എസ്. ശ്രീധരന്പിള്ളയുടെ മികച്ച പ്രകടനത്തിനു കാരണം തങ്ങളുടെ പിന്തുണയാണെന്നാണു ബി.ഡി.ജെ.എസിന്റെ അവകാശവാദം. എന്നാല്, ബോര്ഡ്-കോര്പറേഷന് സ്ഥാനങ്ങളുടെ കാര്യത്തില് ബി.ജെ.പി. കേന്ദ്രനേതൃത്വം വഞ്ചിച്ചെന്നാരോപിച്ച് ഇക്കുറി ശ്രീധരന്പിള്ളയ്ക്കു വേണ്ടി പ്രവര്ത്തിക്കേണ്ടെന്നാണു ബി.ഡി.ജെ.എസില് ഒരുവിഭാഗത്തിന്റെ നിലപാട്. മനഃസാക്ഷി വോട്ടിനും ആഹ്വാനമുണ്ടായേക്കും. ഇക്കാര്യങ്ങള് തീരുമാനിക്കുന്നതിനായി ഇന്ന് ഉച്ചകഴിഞ്ഞാണു ചെങ്ങന്നൂരില് ബി.ഡി.ജെ.എസിന്റെ നിര്ണായക സംസ്ഥാന കൗണ്സില് യോഗം.
പരസ്യപ്രചാരണത്തിന് ഇറങ്ങാതെ രാഷ്ട്രീയ വിലപേശല് നടത്തുന്നതിലൂടെ, ബി.ജെ.പി. ദേശീയ നേതൃത്വത്തിന്റെ അടിയന്തര ഇടപെടലുണ്ടാകുമെന്നും ബി.ഡി.ജെ.എസില് ഒരു വിഭാഗം പ്രതീക്ഷിക്കുന്നു. മറിച്ചാണു സംഭവിക്കുന്നതെങ്കില് ചെങ്ങന്നൂരിലെ നിഷ്പക്ഷ നിലപാട് ഭാവിയില് മറ്റു മുന്നണികളുമായി നീക്കുപോക്കിനു സഹായകമാകും. എന്.ഡി.എ. വിട്ടിട്ടില്ലെങ്കിലും ബി.ഡി.ജെ.എസ്. ഇതുവരെ ചെങ്ങന്നൂരില് ശ്രീധരന്പിള്ളക്കായി പ്രചാരണത്തിന് ഇറങ്ങിയിട്ടില്ല. ജില്ലാതല മുന്നണി നേതൃയോഗത്തില് പാര്ട്ടി പ്രതിനിധികള് പേരിനു പങ്കെടുത്തെന്നു മാത്രം. ബി.ഡി.ജെ.എസുമായുള്ള പ്രശ്നങ്ങള് പരിഹാരിക്കാത്ത സാഹചര്യത്തില് എന്.ഡി.എ. തെരഞ്ഞെടുപ്പ് കണ്വന്ഷനും നടത്തിയിട്ടില്ല.
എല്.ഡിഎഫും യു.ഡി.എഫും വളരെ മുമ്പേ കണ്വന്ഷനുകള് നടത്തി. പ്രശ്നപരിഹാരത്തിനായി ബി.ജെ.പി. നേതാക്കള് ആശയവിനിമയം തുടരുന്നുണ്ടെങ്കിലും സ്ഥാനമാനങ്ങള് ഉടന് കിട്ടാതെ സമവായത്തിനില്ലെന്നാണു ബി.ഡി.ജെ.എസ്. നിലപാട്. എസ്.എന്.ഡി.പി. യോഗം ജനറല് സെക്രട്ടറി വെള്ളാപ്പള്ളി നടേശന് പരസ്യമായിത്തന്നെ ഇക്കാര്യം ബി.ഡി.ജെ.എസ്. നേതൃത്വത്തോട് ആവശ്യപ്പെട്ടു കഴിഞ്ഞു. നാമനിര്ദേശ പത്രികാ സമര്പ്പണത്തിനു ശേഷം എസ്.എന്.ഡി.പി. നിലപാട് വ്യക്തമാക്കുമെന്നും വെള്ളാപ്പള്ളി പ്രഖ്യാപിച്ചു.
ത്രികോണമത്സരമാണെങ്കിലും ഭരണകക്ഷി എന്ന നിലയില് എല്.ഡി.എഫിനു മുന്തൂക്കമുണ്ടെന്ന വെള്ളാപ്പള്ളിയുടെ അഭിപ്രായം എസ്.എന്.ഡി.പി. നിലപാടിന്റെ സൂചനയായും കണക്കാക്കാം. വെള്ളാപ്പള്ളിയുമായി ഇടതു സ്ഥാനാര്ഥി സജി ചെറിയാനു വ്യക്തിബന്ധവുമുണ്ട്. എന്നാല് എല്.ഡി.എഫിനെ പിന്തുണയ്ക്കാന് കേരളാ കോണ്ഗ്രസ് (എം) നടത്തുന്ന നീക്കങ്ങളില് വെള്ളാപ്പള്ളിയും ബി.ഡി.ജെ.എസും അതൃപ്തരാണ്. മാണിയുടെ നിലപാടിനു പ്രസക്തിയില്ലെന്നും ചെങ്ങന്നൂരില് കേരളാ കോണ്ഗ്രസിനു സ്വാധീനമില്ലെന്നും വെള്ളാപ്പള്ളി തുറന്നടിക്കുകയും ചെയ്തു.
https://www.facebook.com/Malayalivartha
