ചെങ്ങന്നൂര്‍ ഉപതെരഞ്ഞെടുപ്പ് ചൂട് പിടിക്കവെ അവടെ നിന്നും തികച്ചും കൗതുകകരമായ വാര്‍ത്ത പുറത്തു വന്നു. സ്വന്തം മകളുടെ കല്ല്യാണമായിട്ടു പോലും തിരഞ്ഞെടുപ്പിന് പ്രാധാന്യം കൊടുത്ത് ശ്രദ്ധയനായിരിക്കുകയാണ് ഒരു അച്ഛന്‍. മകളുടെ കല്ല്യാണവും തിരഞ്ഞെടുപ്പും ഒരേ ദിവസം വന്നപ്പോള്‍ മകളുടെ കല്ല്യാണം മാറ്റി വെയ്ക്കുകയാണ് ചെങ്ങന്നൂര്‍ മണ്ഡലത്തിലെ ചെറിയനാട് കൊച്ചുപ്ലാവില്‍ കുര്യനും ഭാര്യ അന്നമ്മയും ചെയ്തത്. മകള്‍ ജിന്‍സിയുടെ വിവാഹം മെയ് 28ന് നടത്താന്‍ നേരത്തേ തന്നെ തീരുമാനിച്ചുറപ്പിച്ചിരുന്നു. എന്നാല്‍ ഉപതിരഞ്ഞെടുപ്പായതിനാല്‍ മാറ്റിവെച്ചു.

എറണാകുളം ഐരാണികുളത്ത് വെച്ചാണ് വിവാഹം നടക്കാനിരുന്നത്. എന്നാലിത് മെയ് 31ലേയ്ക്ക് മാറ്റി. ഇടതുപക്ഷ ആഭിമുഖ്യമുള്ള കുടുംബമാണ് കുര്യന്റേത്. വിവാഹം ആ ദിവസം നടന്നാല്‍ പങ്കെടുക്കാനെത്തുന്ന കുടുംബാംഗങ്ങളുടെയും ബന്ധുക്കളുടെയും സുഹൃത്തുക്കളുടെയും വോട്ടുകള്‍ എല്‍ഡിഎഫ് സ്ഥാനാര്‍ത്ഥിക്ക് നഷ്ടപ്പെടും. ഇത് സംഭവിക്കാതിരിക്കാനാണ് കുര്യന്റെ ബുദ്ധിപരമായ നീക്കം.

എറണാകുളം സ്വദേശി അലോഷ്യസാണ് വരന്‍. ഇവരുടെ കുടുംബവും തീയതി മാറ്റാന്‍ സമ്മതം നല്‍കിയതോടെയാണ് മെയ് 31 ആക്കിയത്. സജി ചെറിയാന്‍ വിജയിക്കണമെന്ന ആഗ്രഹം കൊണ്ടാണ് മകളുടെ വിവാഹം മാറ്റി വെച്ചതെന്ന് അന്നമ്മയും കുര്യനും തുറന്നു പറയുന്നു. തിരഞ്ഞെടുപ്പ് ദിവസത്തെ കല്ല്യാണം മാറ്റിവെച്ചതറിഞ്ഞ എല്‍ഡിഎഫ് സ്ഥാനാര്‍ത്ഥി സജി ചെറിയാന്‍ നേരിട്ടെത്തി കുടുംബത്തെ നന്ദി അറിയിച്ചു.