വരാപ്പുഴയിൽ കൊല്ലപ്പെട്ട ശ്രീജിത്തിന്റെ ഭാര്യ ഭർത്താവിന്റെ മരണത്തിൽ സിബിഐ അന്വേഷണം ആവശ്യപ്പെട്ട് കോടതിയെ സമീപിച്ചിരിക്കെ സി ബി ഐ അന്വേഷണങ്ങളുടെ അർത്ഥശൂന്യതയെ കുറിച്ചുള്ള ചർച്ചകൾക്ക് വീണ്ടും ചുട് പിടിക്കുന്നു. ഏറ്റവും ഒടുവിൽ സർക്കാർ സിബിഐ അന്വേഷണത്തിന് വിട്ട രണ്ട് കേസുകൾ മതി, സി ബി ഐ അന്വേഷണത്തിന്റെ നിരർത്ഥകത മനസിലാക്കാൻ.

കലാഭവൻ മണിയുടെ മരണവും തിരുവനന്തപുരം പാറശാല പോലീസിന്റെ കസ്റ്റഡിയിൽ മരിച്ച ശ്രീജിവിന്റെ മരണവുമാണ് സർക്കാർ ഒടുവിൽ സിബിഐക്ക് വിട്ടത്. രണ്ടു കേസുകളും ആദ്യത്തെ എതിർപ്പിനു ശേഷം സിബിഐ ഏറ്റെടുത്തു. രണ്ട് കേസുകളുടെയും ഇപ്പോഴത്തെ അവസ്ഥ പരിശോധിച്ചാൽ ഒന്നും സംഭവിച്ചിട്ടില്ലെന്ന് മനസിലാക്കാം.

കലാഭവൻ മണിയുടെ മരണം കൊലപാതകമാണോ എന്ന് അന്വേഷിക്കണമെന്ന് ആവശ്യപ്പെട്ടാണ് ബന്ധുക്കൾ സർക്കാരിനെ സമീപിച്ചത്. സർക്കാർ അന്വേഷണം സിബിഐക്ക് കൈമാറി. സി ബി ഐ, അന്വേഷണം ഏറ്റെടുക്കാൻ ആദ്യം വിസമ്മതിച്ചു. പിന്നീട് സർക്കാരിന്റെ നിരന്തരമായ അഭ്യർത്ഥന മാനിച്ച് സി ബി ഐ ഡമ്മതിച്ചു. ചില അന്വേഷണങ്ങൾ നടത്തിയതല്ലാതെ മറ്റൊന്നും സംഭവിച്ചില്ല. അന്വേഷണം ഏതാണ്ട് അവസാനിച്ച മട്ടാണ് ഉള്ളത്.

സെക്രട്ടേറിയറ്റിന് മുന്നിൽ സമരം തുടരുന്ന ശ്രീജിത്തിന്റെ അനിയൻ ശ്രീജിവിന്റെ മരണം അന്വേഷിക്കണമെന്ന ആവശ്യവും ആദ്യം സിബിഐ അംഗീകരിച്ചില്ല. വിഷയം വിവാദമായതോടെയാണ് അന്വേഷണം ഏറ്റെടുത്തു. ശ്രീജിത്തിനെ വിളിച്ചു വരുത്തി മൊഴിയെടുത്തു. മൊഴി നൽകാൻ പോയപ്പോൾ തന്നെ ഒന്നും സംഭവിക്കാൻ സാധ്യതയില്ലെന്ന് മനസിലായി. അതിനാൽ ശ്രീജിത്ത് സമരം തുടരുന്നു.

സി ബി ഐ അന്വേഷണം ആവശ്യപ്പെടുന്നത് ഇന്നൊരു ഫാഷനാണ്. അന്വേഷണം ആവശ്യപ്പെടുന്നത് പലപ്പോഴും ബഹുജന സംഘടനകളാണ് . ആവശ്യം പത്രങ്ങളിൽ വരുന്നതോടെ അവരുടെ ജോലി തീരും. അതോടെ ആക്ഷൻ കൗൺസിൽ പിരിച്ചുവിട്ട് സംഘാംഗങ്ങൾ മടങ്ങും. സർക്കാർ ജനങ്ങളുടെ കണ്ണിൽ മണ്ണിടാൻ അന്വേഷണം പ്രഖ്യാപിക്കും. യഥാർത്ഥത്തിൽ സിബിഐ അന്വേഷണം പ്രഖ്യാപിക്കുന്നതോടെ കേസ് അട്ടിമറിക്കപ്പെടും. എന്നാൽ പാവപ്പെട്ട ഇരകൾ കുറ്റവാളികൾ പിടിയിലാകുമെന്ന പ്രതീക്ഷയോടെ കാത്തിരിക്കും. ഏതാനും ദിവസങ്ങൾക്ക് ശേഷം പ്രതീക്ഷ വിഫലമായെന്ന് തിരിച്ചറിയും.

സി ബി ഐ എല്ലാ കേസുകളും അന്വേഷിക്കുകയാണെങ്കിൽ പോലീസിന്റെ പ്രസക്തി എന്താണ്? സി ബി ഐ ഒരു കേന്ദ്ര ഏജൻസിയാണ്. ലാവ്ലിൻ കേസ് മതി സിബിഐയുടെ പ്രാഗല്ഭ്യം മനസിലാക്കാൻ. ഒരു കോടതി വിധിക്കെതിരെ അപ്പീൽ നൽകാൻ പോലും തയ്യാറാകാത്തവരാണ് അവർ. മാത്രവുമല്ല സി ബി ഐ കൂട്ടിലടച്ച തത്തയാണെന്ന ചീത്ത പേരും നിലവിലുണ്ട്.

വരാപ്പുഴ കസ്റ്റഡി മരണം സിബിഐ അന്വേഷിച്ചാൽ അതോടെ പ്രതികൾ രക്ഷപ്പെട്ടതായി കണക്കാക്കാം. പോലീസിനെക്കാളും പരസ്പര സഹായസഹകരണ സംഘമായാണ് സി ബി ഐ പ്രവർത്തിക്കുന്നത്.