മികവാര്‍ന്ന രീതിയില്‍ പൊലീസ് പ്രവര്‍ത്തിക്കുന്നതിനിടെയുണ്ടായ അങ്ങേയറ്റം അപമാനകരമായ സംഭവമാണ് അടുത്തിടെ നടന്നതെന്ന് മുഖ്യമന്ത്രി പിണറായി വിജയന്‍. നിയമം തെറ്റി പ്രവര്‍ത്തിച്ചാല്‍ നിയമത്തിന് മുന്നില്‍ പൊലീസും കുറ്റക്കാരാണെന്നും അക്കാര്യത്തില്‍ ഒരു തരത്തിലുള്ള ഒത്തുതീര്‍പ്പുമില്ലെന്നും മുഖ്യമന്ത്രി വ്യക്തമാക്കി. 

തിരൂരില്‍ ഡിവൈ.എസ്.പി ഓഫിസ് കെട്ടിടത്തി!?െന്റ ഉദ്ഘാടനം നിര്‍വഹിക്കുകയായിരുന്നു അദ്ദേഹം. പൊലീസ് ഒരിക്കലും മൂന്നാംമുറ സ്വീകരിക്കരുതെന്നും അങ്ങനെയുണ്ടായാല്‍ ശക്തമായ നടപടിയുണ്ടാകുമെന്ന് പ്രഖ്യാപിച്ചുമാണ് മുഖ്യമന്ത്രി വരാപ്പുഴ സംഭവം ചൂണ്ടിക്കാട്ടിയത്.

മുന്‍കാലങ്ങളില്‍ ഇത്തരം സംഭവങ്ങളുണ്ടായാല്‍ നിയമപോരാട്ടങ്ങളുടേയും ബഹുജന സമ്മര്‍ദങ്ങളുടേയുമെല്ലാം ഫലമായാണ് നടപടിയുണ്ടാവാറുള്ളത്. ഇവിടെ അതിക്രമം തിരിച്ചറിഞ്ഞയുടന്‍ കൃത്യമായ നടപടിയെടുത്തു. കുറ്റക്കാര്‍ക്കെതിരെ ശക്തമായ നിലപാടാണ് കൈക്കൊണ്ടത്. അന്വേഷണവും നടക്കുന്നു. പൊലീസ് ജനമൈത്രി നിലപാട് സ്വീകരിക്കണം. കുറ്റവാസനയുള്ളവരെ ശരിയായ രീതിയില്‍ മനസ്സിലാക്കാന്‍ ഇത് സഹായിക്കും. അവരുടെ മേലെ കണ്ണുണ്ടെന്ന ചിന്തവന്നാല്‍ സമാധാനം സുഗമമാകും.