കര്ത്താവ് എന്റെ ഇടയനാകുന്നു; എനിക്കു മുട്ടുണ്ടാവുകയില്ല... ആളും ആരവുമില്ലാതെ രണ്ട് വെള്ളക്കുപ്പായവുമായാണ് കുമ്മനം ഡല്ഹിയില് എത്തിയത്; ബൈബിള് വായിച്ച് കുമ്മനത്തെ മിസോറാം ഭവന് സ്വീകരിച്ചപ്പോള് ബൈബിള് വചനത്തില് മുഴുകിയിരുന്നു; കുമ്മനം രാജശേഖരന് മിസോറാം ഗവര്ണറാകുമ്പോള് വരവേറ്റ് സാധാരണക്കാരും
കുമ്മനം രാജശേഖരനെ ട്രോളുന്നവര് പോലും സമ്മതിക്കുന്നതാണ് കുമ്മനത്തിന്റെ ലാളിത്യം. കുമ്മനം ഇന്ന് മിസോറാം ഗവര്ണറായി ഇന്ന് സത്യപ്രതിജ്ഞ ചെയ്ത് രാജ്ഭവനില് താമസം തുടങ്ങും. കൂറ്റന് ലഗേജുകളും കുടുംബവും പരിവാരങ്ങളും ഒക്കെയായി വന്നുകയറുന്ന വി.ഐ.പികളെ കണ്ടിട്ടുള്ള ഡല്ഹി മിസോറാം ഭവനിലെ ജീവനക്കാര് കൈയും വീശി പരിവാരങ്ങളുമില്ലാതെ കയറിവന്ന നിയുക്ത ഗവര്ണറെ ആശ്ചര്യത്തോടെ നോക്കി. ചെങ്ങന്നൂര് തിരഞ്ഞെടുപ്പു ഗോദയില് നിന്നു നേരെയെത്തിയ അദ്ദേഹത്തിന്റെ പക്കല് ആകെയുണ്ടായിരുന്നത് ഒരു വെള്ളക്കുപ്പായം മാത്രമായിരുന്നു. മാറിയുടുക്കാന് വസത്രമില്ലെന്ന് മനസിലാക്കിയ റസിഡന്സ് കമ്മിഷണര് പി.കെ. ഗുപത ആളെ വിട്ട് ഷര്ട്ടും മുണ്ടും വരുത്തിച്ചു. അതു വയക്കാന് രണ്ട് ചെറിയ ട്രോളി ബാഗും.
തലസ്ഥാനത്തെ മിസോറം ഭവനിലെത്തിയ നിയുക്ത ഗവര്ണര് കുമ്മനം രാജശേഖരനെ ബൈബിള് വായിച്ചു കൊണ്ടാണ് വരവേറ്റത്. പാസ്റ്റര് ഡേവിഡ് ലാല്റാം ലിയാനയുടെ നേതൃത്വത്തില് നടന്ന ബൈബിള് വായനയിലും പ്രാര്ത്ഥനയിലും ഭവനിലെ ജീവനക്കാരും പങ്കെടുത്തു. കര്ത്താവ് എന്റെ ഇടയനാകുന്നു. എനിക്കു മുട്ടുണ്ടാവുകയില്ല. പച്ചയായ പുല്ത്തകിടിയില് അവനെനിക്കു തണലേകും; പ്രശാന്തമായ ജലാശയത്തിലേയ്ക്ക് അവന് എന്നെ നയിക്കുമെന്ന സങ്കീര്ത്തന ഭാഗമാണു പാസ്റ്റര് വായിച്ചത്.
ഗവര്ണറായി ചുമതലയേല്ക്കാന് പോകുന്ന നേതാവിന്റെ പകിട്ടേതുമില്ലാതെ വന്ന കുമ്മനത്തിനു യോജിച്ച പ്രാര്ത്ഥനാ വചനങ്ങളായി മാറി. വൈകുന്നേരത്തെ ഗോഹട്ടി വിമാനത്തില് പുറപ്പെടും മുമ്പ് ഗവര്ണര്ക്കു വേണ്ട അത്യാവശ്യ വസ്ത്രങ്ങള് സംഘടിപ്പിച്ചതു മിസോറം റസിഡന്റ് കമ്മിഷണര് പ്രവീണ് ഗുപ്തയും സഹപ്രവര്ത്തകരുമാണ്. ആര്ഭാടത്തിന്റെ വേഷവിതാനങ്ങള് കണ്ടു പരിചയിച്ച വടക്കുകിഴക്കന് സംസ്ഥാനത്തിന്റെ പ്രതിനിധികളെ ഞെട്ടിച്ചു, മലയാളിത്തത്തിന്റെ ലാളിത്യം.
ഡ്യൂട്ടി ഓഫീസര് നല്കിയ വിമാന ടിക്കറ്റ് നോക്കി പുതിയ ഗവര്ണറുടെ പേരു വായിക്കാന് പാടുപെടുകയാണ് മിസോറാം ഭവനിലെ ജീവനക്കാരന്. ഏറെ പണിപ്പെട്ട് വായിച്ചെടുത്തു. അടുത്തു നിന്ന മലയാളി മാധ്യമ പ്രവര്ത്തകന് തിരുത്തിയപ്പോള് കുമ്മനം രാജശേഖരന് എന്ന് ആവര്ത്തിച്ച് വായിച്ച് ശരിയാക്കി.
ഞാന് കൈയും വീശിയാണ് വന്നത് മിസോറാം ഭവനില് വന്ന മലയാളി മാധ്യമ പ്രവര്ത്തകരോട് കുമ്മനം മനസു തുറന്നു. 2015 ഡിസംബറില് തണുപ്പില് സംസ്ഥാന ബിജെപി അദ്ധ്യക്ഷനാകാന് നേതൃത്വം വിളിപ്പിച്ചപ്പോഴും ഒരു മുണ്ടും ചുക്കിചുളുങ്ങിയ ഷര്ട്ടും മാത്രമായിരുന്നു വേഷം. മൂന്നു വര്ഷങ്ങള്ക്കിപ്പുറം പുതിയ ദൗത്യം ഏറ്റെടുക്കുമ്പോഴും കുമ്മനത്തിന് മാറ്റമില്ല.
നിയുക്ത ഗവര്ണറാണ്. സംസാരത്തിന് നിയന്ത്രണമുണ്ട്. വിവാദങ്ങള് ഒഴിവാക്കാന് പത്രസമ്മേളനത്തിന്റെ തുടക്കത്തിലേ അദ്ദേഹം കാര്യങ്ങള് വ്യക്തമാക്കി. പക്ഷേ നേരിട്ട ചോദ്യങ്ങള് ബിജെപിയെയും അദ്ധ്യക്ഷ പദവിയെക്കുറിച്ചും. വിവാദങ്ങള് സപര്ശിക്കാത്ത മറുപടി. പത്രസമ്മേളനം കഴിഞ്ഞ് മാധ്യമ പ്രവര്ത്തകരെ മിസോറാം കാന്റീനിലേക്ക് ഉച്ചയൂണിനു ക്ഷണിച്ചു. കാന്റീനില് ഭക്ഷണം കഴിക്കുന്ന നിയുക്ത ഗവര്ണറെ ജീവനക്കാര് അദഭുതത്തോടെ നോക്കി.
ഭരണകാര്യങ്ങളില് പരിചയക്കുറവുണ്ട്. അതിനാല് ഭരണകര്ത്താവെന്ന നിലയില് മോശക്കാരനല്ലെന്നും തെളിയിക്കേണ്ട ബാധ്യതയുമുണ്ട്. സംഘടന ഏല്പിച്ച ജോലിയാണ്. അതിനോടു വിമുഖതയില്ല. ഏറ്റെടുക്കില്ലെന്നു പറഞ്ഞിട്ടുമില്ല ഡല്ഹിയിലെത്തിയ നിയുക്ത മിസോറം ഗവര്ണര് കുമ്മനം രാജശേഖരന് പറഞ്ഞു. താന് അധ്യക്ഷനായിരുന്ന രണ്ടര വര്ഷത്തോളം ബിജെപി കേരളത്തിലുണ്ടാക്കിയ നേട്ടങ്ങളെക്കുറിച്ചുള്ള ചോദ്യത്തിന് അതൊക്കെ അടുത്തയാള് വിലയിരുത്തട്ടെയെന്നായിരുന്നു മറുപടി.
https://www.facebook.com/Malayalivartha
