തലസ്ഥാന നഗരവാസികള്ക്ക് ഇനി കെട്ടിടനികുതി വീട്ടിലിരുന്ന് അടയ്ക്കാം
തലസ്ഥാന നഗരവാസികള്ക്ക് ഇനി കെട്ടിടനികുതിയും ഓണ്ലൈനായി അടയ്ക്കാം. കെട്ടിടനിര്മാണ അപേക്ഷകള് പൂര്ണമായും ഓണ്ലൈന് ആക്കുന്നതിന് പിന്നാലെയാണ് പുതിയ നടപടി. ഈ സാമ്പത്തികവര്ഷംതന്നെ പദ്ധതി നടപ്പാക്കാനാണ് നഗരസഭാ ഭരണസമിതിയുടെ പരിശ്രമം.
നാലുലക്ഷത്തോളം കെട്ടിടങ്ങളാണ് നഗരത്തിലുള്ളത്. ഇതില് അറുനൂറ് ചതുരശ്ര അടിവരെയുള്ള കെട്ടിടങ്ങള്ക്ക് നികുതി ഈടാക്കേണ്ടതില്ലെന്ന് തീരുമാനിച്ചിട്ടുണ്ട്. അതിന് മുകളിലേക്കുള്ള കെട്ടിടങ്ങള്ക്ക് സേവന ഉപനികുതിയും ഈടാക്കും. ഓണ്ലൈന് ആകുന്നതോടെ നികുതി ചോര്ച്ച ഒഴിവാക്കി, നഗരസഭയുടെ തനത് വരുമാനം വര്ധിപ്പിക്കാനാകും. ക്യൂ നില്ക്കാതെ വീട്ടിലിരുന്നുതന്നെ നികുതി അടയ്ക്കാമെന്ന സൗകര്യമാണ് കെട്ടിട ഉടമകള്ക്ക് ലഭിക്കുന്നത്. പദ്ധതി നടപ്പാക്കുന്നതിന് ഡാറ്റാ എന്ട്രി ജോലികള് പുരോഗമിക്കുകയാണ്. ഡാറ്റാ എന്ട്രി പൂര്ത്തിയാക്കിയ കെട്ടിട ഉടമള്ക്ക് നോട്ടീസ് അയച്ചുതുടങ്ങി.
കഴിഞ്ഞ സാമ്പത്തികവര്ഷം നഗരസഭയുടെ നികുതി ഇനത്തിലുള്ള വരുമാനത്തില് 15 ശതമാനത്തോളം വര്ധനയുണ്ടായി. ഓണ്ലൈന് ആകുന്നതോടെ വന് വര്ധനയാണ് പ്രതീക്ഷിക്കുന്നത്.
കെട്ടിടനിര്മാണത്തിനുള്ള അപേക്ഷ ഓണ്ലൈന് ആക്കുന്നതിന്റെ പൈലറ്റ് പദ്ധതി തിരുവനന്തപുരം നഗരസഭയിലും ആറ്റിങ്ങല് മുനിസിപ്പാലിറ്റിയിലുമാണ് നടപ്പാക്കുന്നത്. 18 മുതലാണ് പൈലറ്റ് പദ്ധതി ആരംഭിക്കുക.
തിരുവനന്തപുരം നഗരസഭയിലും ആറ്റിങ്ങല് മുനിസിപ്പാലിറ്റിയിലും ബില്ഡിങ് ഡിസൈനര്മാര്ക്ക് സോഫ്റ്റ് വെയര് സംബന്ധിച്ച പരിശീലനം ആരംഭിച്ചിട്ടുണ്ട്. രജിസ്റ്റര് ചെയ്യുന്ന ഡിസൈനര്മാര്ക്ക് തുടര്ന്നും പരിശീലനം നല്കും.
https://www.facebook.com/Malayalivartha
