ലൈലാബീവി തിരുവനന്തപുരം ജില്ലയിലെ ആദ്യ വനിതാ സ്റ്റേഷന്‍ ഹൗസ് ഓഫീസര്‍. തിരുവനന്തപുരം സിറ്റി റൂറല്‍ സ്റ്റേഷനുകളിലെ ആദ്യ വനിതാ എസ്.എച്ച്.ഒയെ ലഭിച്ചത് നെടുമങ്ങാട് വലിയമല പൊലീസ് സ്റ്റേഷന്. ഇന്നലെ സ്റ്റേഷന്‍ ഹൗസ് ഓഫീസറായി വി. ലൈലാബീവി ചുമതലയേറ്റു. സ്റ്റേഷന്റെ പൂര്‍ണ ചുമതലയും കേസന്വേഷണവും ക്രമസമാധാനപാലനവുമെല്ലാം ഇനി ലൈലാബീവിയുടെ കരങ്ങളിലാണ്. ആറ്റിങ്ങലില്‍ വനിതാസെല്‍ - വനിതാ ഹെല്‍പ്പ് ലൈന്‍ ചുമതലയിലിരിക്കുമ്പോഴാണ് വലിയമലയുടെ അമരക്കാരിയാകാന്‍ ഭാഗ്യം ലഭിച്ചത്. സംസ്ഥാനത്തൊട്ടാകെ ഒരു ജില്ലയില്‍ ഒരു സ്റ്റേഷനില്‍ വനിതാ എസ്.എച്ച്.ഒമാരുണ്ടാകണമെന്ന പുതിയ തീരുമാനത്തിന്റെ ഭാഗമായാണ് ലൈലാബീവിക്ക് നിയമനം ലഭിച്ചത്. 

നെടുമങ്ങാട് സബ്ഡിവിഷനിലെ പ്രധാന സ്റ്റേഷനുകളിലൊന്നാണ് വലിയമല. കനത്ത സുരക്ഷയും നിരീക്ഷണവും വേണ്ട സ്റ്റേഷാണിത്. ഐ.എസ്.ആര്‍.ഒയും എല്‍.പി.എസ്.സിയും സ്ഥിതിചെയ്യുന്നത് ഈ സ്റ്റേഷന്‍ പരിധിയിലാണ്. ബഹിരാകാശരംഗത്തെ ഇന്ത്യയുടെ സുപ്രധാന വിക്ഷേപണങ്ങളുടെ രഹസ്യ സ്വഭാവമുള്ള സാമഗ്രികള്‍ നിര്‍മ്മിക്കുന്നതും ഇവിടെയാണ്. നെടുമങ്ങാട് നഗരസഭ, ആനാട്, തൊളിക്കോട് പഞ്ചായത്ത് പ്രദേശങ്ങള്‍ സ്റ്റേഷന്‍ നിയന്ത്രണത്തിലാണ്. നഗരസഭയിലെ വാളിക്കോട് അന്താരാഷ്ട്ര മാര്‍ക്കറ്റിനു സമീപമാണ് താമസിക്കുന്നത്.