തിരുവനന്തപുരത്ത് നിന്ന് ബംഗളൂരുവിലേക്ക് എക്‌സപ്രസ് ട്രെയിന്‍ ഉടന്‍ തുടങ്ങുമെന്ന് കേന്ദ്രറെയില്‍വേ സഹമന്ത്രി രാജെന്‍ ഗൊഹെയ്ന്‍ പറഞ്ഞു. കൊച്ചുവേളിയില്‍ നിന്ന് മംഗലാപുരത്തേക്കുള്ള അന്ത്യോദയ ദൈ്വവാര എക്‌സ് പ്രസ് ട്രെയിന്‍ സര്‍വീസ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 2014 ലെ റെയില്‍വേ ബഡ്ജറ്റിലാണ് തിരുവനന്തപുരം മൈസൂരു ട്രെയിന്‍ സര്‍വ്വീസ് പ്രഖ്യാപിച്ചത്.

എന്നാല്‍ ബെംഗളൂരുവിലും മൈസൂരുവിലും പ്‌ളാറ്റ്‌ഫോം ഒഴിവില്ലെന്ന് പറഞ്ഞ് സര്‍വ്വീസ് ഉപേക്ഷിക്കുകയായിരുന്നു. ഇന്ന് കൊച്ചുവേളിയിലെ ചടങ്ങില്‍ സംസ്ഥാന മന്ത്രി കടകംപളളി സുരേന്ദ്രനും കേന്ദ്ര ടൂറിസം സഹമന്ത്രി അല്‍ഫോണ്‍സ് കണ്ണാന്താനവും ഈ ട്രെയിന്‍ സര്‍വീസ് തുടങ്ങാത്ത പ്രശ്‌നം ഉന്നയിച്ചതിനെ തുടര്‍ന്നായിരുന്നു കേന്ദ്ര റെയില്‍വേ സഹമന്ത്രിയുടെ പ്രതികരണം. ബംഗളൂരുവിലെ സ്ഥലപരിമിതിയാണ് ട്രെയിന്‍ തുടങ്ങാന്‍ തടസമായത്.
സിറ്റി റെയില്‍വേ സ്‌റ്റേഷന് പുറത്തുളള യശ്വന്തപുരം, അല്ലെങ്കില്‍ ബാനസവാഡി എന്നിവിടങ്ങില്‍ നിന്ന് ട്രെയിന്‍ തുടങ്ങാന്‍ നിര്‍ദ്ദേശിക്കുമെന്ന് മന്ത്രി ഉറപ്പ് നല്‍കി. സംസ്ഥാനത്തെ റെയില്‍വേ വികസനത്തിന് കൂടുതല്‍ പ്രാധാന്യം നല്‍കുമെന്നും കൊച്ചുവേളി റെയില്‍വേ സ്‌റ്റേഷന്‍ പാസഞ്ചര്‍ സര്‍ക്കുലര്‍ സ്‌റ്റേഷനായി ഉയര്‍ത്തുമെന്നും അദ്ദേഹം പറഞ്ഞു.
കൊച്ചുവേളിയില്‍ നിന്ന് മംഗലാപുരത്തേക്കുള്ള അന്ത്യോദയ എക്‌സ് പ്രസ് ട്രെയിന്‍സര്‍വ്വീസിന് കേന്ദ്രമന്ത്രി ഫ്‌ളാഗ് ഓഫ് ചെയ്തു. ഇന്നലെ രാവിലെ 10 നായിരുന്നു ഉദ്ഘാടന സര്‍വ്വീസ്. ഞായറാഴ്ച മുതലാണ് റെഗുലര്‍ സര്‍വ്വീസ് തുടങ്ങുക. ശനി, വ്യാഴം ദിവസങ്ങളില്‍ രാത്രി 9.25 ന് കൊച്ചുവേളിയില്‍ നിന്ന് പുറപ്പെട്ട് പിറ്റേന്ന് രാവിലെ 9.15 ന് മംഗലാപുരത്തും വെള്ളി, ഞായര്‍ ദിവസങ്ങളില്‍ രാത്രി 8 ന് മംഗലാപുരത്തുനിന്ന് പുറപ്പെട്ട് പിറ്റേന്ന് രാവിലെ 8.10 ന് കൊച്ചുവേളിയിലും എത്തുന്നതാണ് റെഗുലര്‍ സര്‍വ്വീസ്.

സംസ്ഥാനത്തെ രണ്ടാമത്തെ അന്ത്യോദയ എക്‌സ്പ്രസാണിത്. എറണാകുളം പാറ്റ്‌നയാണ് ആദ്യ അന്ത്യോദയ എക്‌സ് പ്രസ്.
മുന്‍കൂര്‍ സീറ്റ് റിസര്‍വേഷനില്ലാത്ത എല്ലാകോച്ചുകളും അണ്‍ റിസര്‍വ്്ഡ് സീറ്റിംഗ് മാത്രമുള്ള ട്രെയിനുകളാണ് അന്ത്യോദയ എക്‌സ് പ്രസ്. സാധാരണ അണ്‍റിസര്‍വ്ഡ് എക്‌സ്പ്രസ് കോച്ചുകളിലെ ടിക്കറ്റ് നിരക്കിനെക്കാള്‍ 15 ശതമാനം അധികമായിരിക്കും ടിക്കറ്റ് നിരക്ക്. മംഗലാപുരം കൊച്ചവേളി അന്ത്യോദയയില്‍ 18 കോച്ചുകളുണ്ട്. ആധുനിക എല്‍.എച്ച്.ബി.കോച്ചുകളാണിതെല്ലാം. കുടിവെള്ളം, മൊബൈല്‍ റീച്ചാര്‍ജ്ജിംഗ് ,ലഗ്ഗേജ് റാക്ക്, ബയോ ടോയ്‌ലറ്റ് തുടങ്ങിയ സൗകര്യങ്ങളുണ്ട്. സീറ്റ് പക്ഷെ ബക്കറ്റ് സീറ്റല്ല, നീളത്തിലുള്ള കുഷ്യന്‍ ബഞ്ച് സീറ്റുകളാണ്.കൊച്ചുവേളിയില്‍ നിന്ന് 11.50 മണിക്കൂറുകൊണ്ട് മംഗലാപുരത്തെത്തും.
കൊല്ലം, എറണാകുളം, തൃശ്ശൂര്‍, ഷൊര്‍ണ്ണൂര്‍,കോഴിക്കോട്, കണ്ണൂര്‍ തുടങ്ങി ആറിടങ്ങളിലാണ് സ്‌റ്റോപ്പുള്ളത്.ആലപ്പുഴ വഴിയാണ് സര്‍വ്വീസ്. കൊല്ലത്ത് മൂന്ന് മിനിറ്റും തൃശ്ശൂരില്‍ രണ്ടുമിനിറ്റും ഷൊര്‍ണ്ണൂരില്‍ പത്തുമിനിറ്റും മറ്റ് സ്‌റ്റേഷനുകളില്‍ അഞ്ച് മിനിറ്റ് വീതവും സ്‌റ്റോപ്പുണ്ട്. ട്രെയിന്‍ നമ്പര്‍. 16355/16356.